با ڕێكخراوه‌كانی ژنان دابخرێن! .. ڕه‌سوڵ بۆسكێنی
له‌م چه‌ند ڕۆژه‌ی ڕابردوو كه به‌بۆنه‌ی رۆژی جیهانیی ریشه‌كێشكردنی توندوتیژیی دژی ژنان، هه‌ندێك له كه‌ناڵه‌كانی ڕاگه‌یاندن له‌ڕێگای ته‌له‌فۆنه‌وه گفتوگۆیان له‌گه‌ڵ هاووڵاتیان ده‌كرد، زۆری ئه‌وانه‌ی گفتوگۆیان له‌گه‌ڵ ده‌كردن، ته‌نانه‌ت ژنه‌كانیش له په‌یامه‌كانیاندا ده‌یانگوت: (با ڕێكخراوه‌كانی ژنان دابخرێن، چونكه: ڕێزی به‌ها كۆمه‌ڵایه‌تیه‌كانیان نه‌هێشتووه، كێشه‌یان خستۆته نێوان هاوسه‌ره‌كان، ئاڵۆزیان له خێزانه‌كان دروست كردووه، كێشه‌كانی دادگا و جیابوونه‌وه‌ی هاوسه‌ره‌كان زۆربه‌ی به‌هۆی ڕێكخراوه‌كانی ژنانه‌وه‌یه…هتد)، ئه‌و بێ بتمانه‌ییه مایه‌ی نیگه‌رانیه، له‌كاتێكدا چه‌ندین ڕێكخراوی ژنان و ئافره‌تان و خۆشكان و هی تریش له كوردستان هه‌ن و خۆیان به‌داكۆكیكا‌ری مافی ژنان ده‌زانن و زۆر هه‌وڵیان داوه بۆ پاراستن و هوشیاركردنه‌وه‌ی ژنانی كوردستان بۆ به‌ده‌ستهێنانی مافه‌كانیان، به‌تایبه‌ت یه‌كێتی ژنانی كوردستان، به پاڵشتی (ی، ن، ك) كه هه‌ر له‌سه‌ره‌تاوه باوه‌ڕی وابووه ژنان به‌شێكی دانه‌بڕاوی خه‌باتی سیاسی و مه‌ده‌نی و پێشخستنی هه‌موو كایه‌كانی ژیانی كۆمه‌ڵگای كوردستانن، له‌به‌ر ئه‌وه هه‌ر له‌سه‌رده‌می شاخ و له‌كاتی پێشمه‌رگایه‌تیدا ژنان وێڕای خزمه‌تی پێشه‌مه‌رگایه‌تی و ئه‌ركه‌كانی تری ڕۆژانه‌یان دروست كردنی یه‌كێتی ژنانی كوردستانیان كرده خه‌می خۆیان و چالاكانه تێكۆشان بۆ به‌ره‌وپێش بردنی چاره‌نووسی ژنانی كوردستان و داكۆكی كردن له‌مافه‌كانیان، له دوای ڕاپه‌ڕین و له ناو شاریش په‌ره‌یان به چالاكیه‌كانیان داو یه‌كێتی نیشتمانی كوردستانیش هاوكار و پشتیوانیان بوو بۆ سه‌ركه‌وتنی كاره‌كانیا‌ن، زه‌مینه‌ی ڕه‌خساندووه بۆ ژنانی به توانا و خاوه‌ن باوه‌ڕ، له پێگه حزبی و حوكمڕانییه باڵاكانی كوردستان رابه‌رایه‌تی بگرنه‌ده‌ست، به‌تایبه‌ت مامی گه‌وره‌مان ڕۆڵی زۆرگرنگی له‌و باره‌یه‌وه گێڕاوه، له سه‌رانسه‌ری عیراق و به‌تایبه‌ت له كوردستان،هەمیشە داكۆكیكار و پشتیوانێكی تەواوی مافەكانی ژنان بووە و داكۆكی و پشتیوانییەكەشی نه‌ك به‌قسه بە كردار سەلماندووه. له هه‌مواركردنی یاسای باری كه‌سێتی و ده‌ركردنی هەردوو بڕیاری ژمارە ٦٢ و ٥٩ كە دوو یاسای زۆر گرنگ و دیاربوون لەناوخۆ و دەرەوە، دەنگدانەوەیەكی زۆری هەبوو، كه ڕێگربوون لە کوشتنی ژنان بەناوی شەرەف پارێزییەوە، هەروەها كارکردن بۆ بەدیهێنانی مافەكانی ژنان لەسەرجەم بوارەكانی پەیوەندیدار بە یاسای باری كەسێتی و هەمواركردنەوەی ئەو یاسایانەی كە (ی ن. ک) كاری لەسەركردبێت، له هەمواركردنەوەی یاسای باری كەسێتی و یاسای سزادانی عیراقی.
سه‌ره‌ڕای هه‌موو كه‌موكوڕیه‌كان پیاوی كورد زیاتر له دراوسێكانی ڕێز و پایه‌ی ژنی به‌رز نرخاندووه، له‌به‌ر ئه‌وه ژنانی كورد جیاواز له ژنانی تری ناوچه‌كه، له هه‌موو بارودۆخه جیاوازه‌كاندا ژنانی ئازارچه‌شتوی ده‌روونی و جه‌سته‌یی ده‌ست كلتووری كۆن و ناپه‌سه‌ندی كۆمه‌ڵگا له‌ژێركاریگه‌ری نه‌ته‌وه‌ی سه‌رده‌ست، به‌ڵام سروشتی ژنانی كورد وایكردووه، هه‌رگیز نادادی و جیاكاریی و پاشكۆییه‌تی و سته‌می كۆمه‌ڵایه‌تی قبوڵ نه‌كه‌ن.
وه‌ك ئاماژه‌مان پێدا له‌م سه‌رده‌مه‌ی ئێستاشدا ژنی كورد زۆر چالاكانه هاتۆته مه‌یدان و له‌ڕێگای ڕێكخراوه‌كانی ژنانه‌وه هه‌وڵی شێلگیرانه و به‌رده‌وام هه‌یه بۆ په‌روه‌رده و پاراستنی ژنان و ده‌سته‌به‌ركردنی مافه‌كانیان، له‌كاتێكدا هێشتا زۆر له ژنانی نه‌ته‌وه‌كانی ده‌وروبه‌ر ئازادی و ڕای خۆیان له بواره‌كانی باری كه‌سێتی و هاوسه‌رگیری و گه‌شت و سه‌فه‌ر و ته‌نانه‌ت شوفێریش مافی تایبه‌تی خۆیان وه‌ك پێویست نیه، به‌ڵام ژنانی وڵاتی ئێمه به‌هۆی چالاكی و تێكۆشانی ڕێكخراوه‌كانی ژنان هه‌ر نه‌بێت، له‌م پارچه‌یه، له‌‌هه‌رێمی كوردستاندا ژنان له زۆربه‌ی كایه‌كانی ژیاندا به‌شدارن و پێگه‌ی كۆمه‌ڵایه‌تی و كارگێڕی و سیاسیان هه‌میشه له هه‌ڵكشان و به‌ره‌و پێش چوون دایه، كه‌چی جێی داخه هێشتا خه‌ڵك هه‌بێت به‌تایبه‌ت له‌ناو ژناندا داوای داخستنی ڕێكخراوه‌كانی ژنان بكات، بێگومان ڕێكخراوه‌كانی ژنان ده‌بێ به‌جدی له‌و مه‌سه‌له‌یه بڕوانن، بۆ متمانه به‌خشین و ڕاست كردنه‌وه‌ی ئه‌م نیگه‌رانیه، ده‌بێ ڕێكخراوه‌كانی ژنان به‌كاره‌كانی خۆیاندا بچنه‌وه و زیاتر هه‌وڵ بده‌ن له پاراستن و داكۆكی كردن له مافه‌كانی ژنان، پێویسته شێوه‌ی كاریان بگۆڕن، خۆیان له‌گه‌ڵ بارودۆخه‌كان بگونجێنن و زیاتر له ژنان نزیك ببنه‌وه‌و پیاوانیش ئاراسته بكه‌ن، به شێوه‌یه‌ك له‌گه‌ڵ ژیانی سه‌رده‌م بگونجێ له پێناوی ئه‌و تێكۆشانه‌ی خه‌باتیان بۆی كردووه، بێگومان ئه‌وه‌ی كردوویانه مایه‌ی ڕێز و پێزانینه له داكۆكی له مافی ڕه‌وای ژنانی نه‌ته‌وه‌كه‌مان، هه‌ربۆیه پێویسته ئه‌رك و ماندووبوونی ڕێكخراوه‌كانی ژنان ڕێزی لێ بگیرێت.
