مه‌سیحی دووه‌م ئاگری بۆ شاعیران له خوداوه‌ند دزی … سه‌باح ڕه‌نجده‌ر
چیا سینگی چل په‌رییه و زه‌ماوه‌ند ڕاده‌گرین
ته‌رمی نوێژ بۆ نه‌كراوی مه‌سیحی دووه‌م
به ئاوێنه و مۆمی داگیرساوه‌وه له شاڕێی شاری ئه‌فسووناوی داده‌نێین
تیشك له ناوی پشوو ده‌دا و خۆی تێدا به‌هێز ده‌كات
ده‌ست له‌سه‌ر شانی گۆڕهه‌ڵكه‌ن لاده‌دا و وزه ده‌داته باڵی باڵنده و دره‌خت و گژوگیا
وزه‌ی باڵی باڵنده
تفه‌نگ و ئه‌سپی سواران ده‌لاوێنێته‌وه
باڵنده‌یێكی ڕه‌وانبێژ ده‌نووكی له ته‌ڕایی دره‌خت و گژوگیا نا
باڵی به‌سه‌ریاندا شۆڕ كرده‌وه و تێنه‌په‌ڕی
هه‌ر به‌سه‌ریاندا سووڕایه‌وه و بڕوای به هه‌موو شتێكی كردن
له هاواریان گوێچكه ماسییه‌كی هه‌ڵدایه‌وه ناو ڕووبار
ده‌نگێك به‌و ناوه‌دا تێپه‌ڕی بیستم
كه‌س له‌ناو نوێندا نه‌ماوه
كێڵگه و باخ چاوه‌ڕوانن جۆگه‌له‌كان بكرێنه‌وه
ته‌رمه‌كانمان چاویان له كێڵگه و باخ داڕێژراون
شاعیرانی شه‌رم له فرمێسك كردوو
له چاوه‌ڕوانیی به‌روبوومیدا دوا به‌شی كتێبی نه‌رم و نیانی شار و شانازییانه
له‌مه‌وبه‌دوا ده‌چنه ناو خاوبوونه‌ی ڕك و ژیان بێزار و بێدار ناكه‌ن
حه‌زده‌كه‌ن له كاتی نووسین و نووستندا په‌نجه‌ره‌كان كراوه‌بن
وه‌رن ئاوێنه‌ی سه‌ر ڕووی به‌ردی سڕ و خوداوه‌ندی گۆزه‌ی باڵنده به ده‌مه‌وه
له چاوی ماتی گوڵه‌به‌ڕۆژه ورد ببنه‌وه
تا خوێن له گورچیله‌ی منداڵه ڕوومه‌ت داچۆڕاوه‌كانمان
نه‌بووه‌ته دڵۆپه‌ی شووم و به‌ده‌م ترسه‌وه نه‌نوون
له‌یلوك و ڕه‌وڕه‌وه‌ی ڕه‌نگ تێكچوویان بنه‌خشێنینه‌وه و ڕه‌نگ
له ئه‌ستێره‌ی سه‌رخۆشی به‌ره‌به‌یان بخوازین
ماچیش له ده‌میان بخۆینه‌وه
ببینین كه له چیا دێنه خواره‌وه
گه‌رد به پێیانه‌وه نییه و به گۆرانییه‌كانیان بریندارمان ده‌كه‌ن
خه‌ونم پێیانه‌وه بینیوه ڕووناكی له سیمای ده‌دان
ئه‌گه‌ر هه‌نگاوێك به سووكی به‌ناو ڕووناكی سیمایان هه‌ڵێنین
هیوایه‌ك بۆ شاری خاڵی و خه‌واڵوو دێته‌دی
ده‌رگای ماڵ به‌ماتی دڵ و چاو پێداخشانه‌وه‌یان ده‌كرێنه‌وه
كڵاوڕۆژنه پێش خۆیان هه‌ناسه‌یان ده‌باته ژووره‌وه
له‌سه‌ر كه‌ل و په‌ل و سینی و پیاڵه و فه‌خفووری ده‌نیشێ
چیا كه سینگی چل په‌ریت
ماڵ ده‌زانێت باسی جۆلانه و جه‌ژنی خۆی بكات
پارچه گۆشتێكی گه‌رم و به شه‌كر و شیر داپۆشراوه
له تۆدا ده‌بێته دڵ و ژیانی ئه‌و ده‌ژی
به ناوی تۆوه له ئاو و ئاسۆ ده‌په‌ڕێته‌وه و ئاماژه‌ی زه‌مین سوور هه‌ڵده‌گه‌ڕێمان ده‌داتێ
ده‌مه‌وێ وێنه‌ی دره‌ختێكی نه‌رم و نیان بۆ باڵنده بكێشم
دوو ده‌ستی كراوه به‌سه‌ریه‌وه بێت
دره‌خت خۆی به باڵنده مه‌ست ده‌كات و ده‌مار و خوێنی فڕین ده‌ڕژێته ده‌موچاوی
منیش باڵنده‌ی ده‌می گۆزه ده‌هێنمه سه‌رشانم و دێمه ناو چیا
چرایه‌ك تانوپۆمه و چاوی پاكده‌كه‌مه‌وه
له‌مه‌وبه‌دوا باڵنده به‌رپێمان ئاوڕشێن ده‌كات و ته‌پوتۆز ده‌كوژێ
به‌ردێك له‌و به‌ردانه هه‌ڵده‌گرێته‌وه بۆ كوشتنی هه‌ڵماندا
ده‌یكه‌ینه ڕوخساری په‌یكه‌رمان
باڵنده له خوانی خودای خوارد و چه‌كی هه‌ڵگرت
