Skip to Content

ژمارەی دووبارەکراو … کەنعان مدحەت

ژمارەی دووبارەکراو … کەنعان مدحەت

Closed
by نیسان 21, 2020 General, Poems

لە سەر پەناکورسییە لە بیرکراوەکەی
ژێر پیرەداری
جێ دەمەتەقێی چۆلەکان
بێتۆیی
بیرتم دەخاتەوە.
ژمارەیەکی کوژاو لە گەڵا و
چڵی دوو ساڵە و
ئاوات..
چۆن ئەو هەمو پیاوانەی
بە خەونی موتوربەکردنی تیلەچاو
گیانیان دەرهات..
تایبەت ئەو دەمانەی
کە لە زانکۆوە
شەکەت
شەکەت
تارمایی لە خۆ بێهێزترت
پێشی دەخستی و
دەهاتی..
یادت
لەم پیرەدارە شڵەژاوە
پترتر
دەمشڵەژێنێ
بێباکی و
تێپەڕبوونی بێخوێندنەوەمت
منی لە سەر تەختە کورسیی لە بیرکراو
لە خۆ دەتۆرێنێ
ئا ئەو پیاوە پرج تەنک و تەرایە
سەردەمانێ
زایەڵە و
تیشکی ئاڵۆسکاوتی
تا درەنگانێ.. دائەهێنا
چۆن لمی تەڕی کەنار
لە ژێر دەستیا
تێکەڵ و
خەنەیی.. ڕادەکشای
ئا ئەو پیاوە
من
وا بە دەسکە گوڵ و
دیوانە شیعرەوە
لەسەر هەمان پەناکورسی جێژووانمان
چۆڕاوە چرکەکانی کاتژمێری
جاران دەهۆنمەوە
بێ ئەوەی لا
لە ژمارە خۆ دووبارەکراوەکەم
بکەیتەوە
٢٥/١٠/٢٠١٣
کفری

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish