Skip to Content

مەعدەنی سیاسییەکان … کۆشش محمد

مەعدەنی سیاسییەکان … کۆشش محمد

Closed
by ته‌مموز 13, 2020 General

کتوومت سیاسیەکان ناو برینەکانمان دەکێڵن تا دەنگیان بۆ سەوز ببێت، ئێمەش زەردبین و ڕەنگمان بەدیاریانەوە بپەڕێت، سیاسییەکان بە پێڵاوەوە، لەمسەر تا ئەوسەر بەناو میحرابەکانی عەشقمان بۆ ئازادی دەگەڕێن بە شوێن قازانجدا، بێ لەگەمە، سیاسییەکان وزەی خۆیان لە فیچقەی پژاوی خوێنی دەمارەکانمانەوە وەردەگرن، غەمەکانمان ئاو دەدەن تا گەورەتر بێت و سێبەریان بۆ بکات.
سیاسیم بینیووە، بە بزماری لافیتە بانگەشەی بەدڵی مرۆڤدا هەڵواسیوە!
سیاسی وا هەیە، ئێسک و پڕووسکی ئەنفالکراوەکانی هەڕاجکردووە تا پارەکەی بدات بە مارسیدسی ئێس کڵاس بۆ نەوەی نەوەکەی.
سیاسییەک وتی، ئاخ بۆ هەڵەبجەیەکی تر!
سیاسیەکی تر دەیووت، خەریکە کەسابەتم نامێنێت وای بۆ کوشتنی سەت پێشمەرگەی تر.
سیاسییەک درۆی کرد کەچی بەڕاستی بوو بە ئەندام پەڕلەمان، گوێم لە سیاسییەک بوو جوێنی دەدا بە سیاسەت! چونکە بۆی باشتر بوو.
سیاسییەک ئۆتۆمبێلێکی درعی کڕی، لە قازانجی ئەو بارە فیشەکەی کە ناردبووی بۆ داعش، سیاسیش هەبووە وەک قەرەقۆزەکان پێمان پێدەکەنێت! پێکەنینەکەشی گریانێکی قووڵ بووە.
بینیومە سیاسی هیچ مێزێک نەماوە تا لەسەری کۆببێتەوە مێزی کۆنکان نەبێت، جۆکەرەکەشی دزیوە کەچی سیاسییەکە بەسەر مێزەکەیا نەتەقیوەتەوە، ئەوەندە جەبان و حاڵ داماو بووە کەچی سیاسیش بووە.
سیاسیم بینیوە، بەسەر دەبابەی هێرشبەری دوژمنەوە، بینیویشمە بەسەر دەبابەی بەرگرییەوە، هەمیشەش کولفی کول بووە.
سیاسییەک وتی، دواهەمین کەس لەسەر زەوی لەشێوەی سیاسییەکانە.
گرێ کوێرەی سیاسی بۆ ئەوەی لەمێشکمان دەربچێت و تووڕ هەڵیدەین، دەبێ وابکەین گەر بەدەستیش نەکرایەوە ئەوا بەدەم بکرێتەوە.

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish