وشە بابردوەکان … کاوە عوسمان عومەر

ستوونەکانی شەقام، خەمی..
ڕوناکیان لێ ئەڕژێ…
ئەوێک کۆڵانێ…
بە دوای خۆیدا ڕائەکێشێ، ڕەهێڵە…
لە دڵیایەتی کاتێک…
نوستووی ژورێک، بێ چرا..
دەرگای پۆڵاینی لەسەر حەز داخست
……………………………………………..
شوێن بزر ئەکەین، دڵ…
هەر پەمەییە، ئەدرەوشێتەوە،،،
لە باوەشی خانمی ئەستێرە! فانووسی…
سپێدە، بە دەستی تۆوەیە،،
یان ئەوە خۆرە،،
چاوت ڕایئەژەنێ.
……………………………………………..
پەنجەرەش ،،،،
لە شیرینی خەوا،،
ماچی ناسکی مانگ،،
بۆ مەچەکی گوڵێک،،
لە تاریکی شەوا،،
پەروانە یەک،،،
مەست بە سوتانی خۆی،،
فیشەکێ لە هەوادا،،
با دڵ تییغ کا،،
خۆ سەفەر،،
هەموو برینەکانی شیعر…
تیمار ناکا.
……………………………………………..

دڵۆپە بارانێک،،،
شەرم ئەکات ، درەنگانێ…
بوەرێ،،،
ئاخر دڵۆپێک ،،
کوا زامی لێوی تینووی…
بێستانێکی ووشک…
ئەشکێنێ.
……………………………………………..

گرفتاری هەموو ئەوانەی…
لەسەر کورسیەکان دانیشتن،،
کەسی تریش نەهات،،،
دوو ڕێبواری ماندوو،،
دڵیان دوو هەناری شکاوی..
پڕ خوێن و برینە، ،،
شەماڵێک لەوانەیە..
ڕێبوارێکیان دوور بەرێ،،،
شازادەی کاتیش،،
لەوانەشە،،
ڕێبوارەکەی تر…
بکاتە بەردی نوستوو،،
چاوەڕوانی..
هەر لە ئێستاوە،،
پێی پێ ئەکەنێ!
……………………………………………..

دیوارەکە…
ئەوەندە زامی جێ هێشتنی دیوە،،،
پێستی سپی چرچبوو،،
ئەژنۆکانی ڕووت،،،
نوسینێک، نزیک بنمیچەکە،،
وێنەی سەری کۆترێک..
ئەویش بە پەنجەی کات…
کوژاوەتەوە.
……………………………………………..

باشترە ، قسەکان کۆکەینەوە،،
بۆ ویستگەی شەمەندەفەرێکی تر،،،
فوارەکە هەڵناگیرێت،،،
لە جانتاکەمانا،،
تێشووی سەفەر بە دەست بەتاڵی خۆشە،،
ڕێگا سەختە، ژیان شتێک نیە،،
بە ڕۆشتنێک بیبەیتەوە،،
یان بە هاتنێک، دڵێک ئاشت بێتەوە،،
ووشەیەک، لەو کەین و بەینی …
مەرگ و ڕۆچوونە ،
هاتەخوارەوە، بایەکی لاسار…
فریا کەوت،،
لە نەمانی دوو لێوا،،
ئەو هەڵی گرتەوە.
……………………………………………..

چیرۆکی لم ڕژانت کورت کەرەوە،،
بیکەرە ڕۆمانێ لە ئاو،،
شیعرێک ، کێ زاتی کرد،،
بیڵێ، لەبەردەم پایزێکی ..
زویر و دڵ شکاو،،
شەوی گوناح و سزا،،
جارێکی تر ڕێگا نادا..
شەپۆل بگاتە پەنجەرە،
جلی کاتژمێر…
با بەتەنافی بێهودەییەوە بێ ،
شنە با بیبا و بیهێنێ.
……………………………………………..

شەو زۆر جار…
دەست لەملانێی شەقامە…
پێکەوە ڕۆژنامە بابردوەکان،،،
یاری پێئەکەن، دەنگی گریانی منداڵێک،،،
ژێر هاتنی شەمەندەفەرێ ئەکەوێ…
باخچەیەک لە باخەوانەکە تۆرا، ،،
گوڵەکانی خستە سنددوقی تاریکی..
دەنگی پێی چاوەڕوانی،،،
لە دەرگای ژنێکی تەنیای ڕەشپۆشی دا،،،
هەموو ساڵێک گوێی لە و جۆرە دەنگەیە،،،
چراکەی کوژاندەوە،،،
با دەنگی پێڵاوی تەنیایی..
لە هەیوانەکە هەر تەقەی بێ ، بڕوا و بچێ..
ئەو ژنە ڕەشپۆشە،،
بە بەلەمی خەفەتا خەو بردی..
چیتر دەنگی پێی ووشەکانی شنە با…
ڕایناچڵەکێنێ…

وێنەکە کارێکی هونەری فۆتۆگرافەری ئەڵمانی
( Michael Schwarzenberger )
بە سوپاسەوە لە پەیجی فەرمی خۆی وەرگیراوە.

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.