Skip to Content

قاوه‌یه‌ك له‌گه‌ڵ فه‌یروز … عه‌بدوڵا ساڵح

قاوه‌یه‌ك له‌گه‌ڵ فه‌یروز … عه‌بدوڵا ساڵح

Closed
by ئه‌یلول 7, 2020 General

ڕۆژی 1 / 9 / 2020 ئیمانویل ماكرۆنی سه‌رۆكی فه‌ره‌نسا بۆ دووه‌م جار، دوای كاره‌ساتی ته‌قینه‌وه‌ی به‌نده‌ری به‌یروت، سه‌ردانی لوبنانی كرد ، ناوبراو یه‌كسه‌ر له‌فرۆكاخانه‌وه‌ بۆ قاوه‌ خوارنه‌وه‌یه‌ك ، وه‌ك خۆی ڕایگه‌یاندبوو ، ڕووی كرده‌ ماڵی هونه‌رمه‌ندی ناوداری لوبنانی خاتوو فه‌یروز ، ئه‌م بازدانه‌ به‌سه‌ر ڕێوڕه‌سمی پرۆتۆكۆلدا په‌یامێك بوو بۆ گه‌وره‌ به‌رپرسانی ئه‌و ووڵاته‌ و بازدان بوو به‌سه‌ریاندا . ئه‌م سه‌ردانه‌ باس وخواسی زۆری لێكه‌وته‌وه‌ و بوو به‌ خۆراكی سه‌ره‌كی ڕاگه‌یاندنه‌كان، به‌تایبه‌تی سۆشیال میدیا ڕۆژنامه‌كان، و ئاكام وبه‌ركه‌وته‌كانی تا ئه‌مڕۆش به‌رده‌وامه‌ .
جیا له‌هه‌ر ئامانجێكی سیاسی كه‌ ماكرۆن به‌دواوه‌یه‌تی له‌م سه‌ردانه‌یدا بۆ لای فه‌یروز ،كه‌ ئه‌مه‌ مه‌به‌ستی ئه‌م نوسینه‌ی من‌ نیه‌، سه‌ردانێك بوو له‌ بارودۆخێكی سه‌ختدا كه‌ ئه‌مڕۆ‌ لوبنانی پیا تێده‌په‌ڕێ، لوبنانێك كه‌ به‌دوای ساڕێژ كردنی برینه ‌قوڵه‌كه‌وه‌یه‌تی‌، ئه‌و برینه‌ی له‌‌ ئه‌نجامی ئه‌م ته‌قینه‌وه‌ گه‌وره‌یه‌ی به‌یروت به‌ر جه‌سته‌ی كه‌وتوه‌ و ئه‌و ته‌نگژه‌‌ ئابوری وسیاسی وكۆمه‌ڵایه‌تیه‌‌ی ده‌یان ساڵه‌، له‌ئه‌نجامی سیاسه‌ت وده‌سه‌ڵاتی تایفه‌گه‌ری تاقمێكی‌ تفه‌نگ به‌ده‌ستی شه‌ڕی ناوخۆی لوبنان، به‌ده‌ستیه‌وه‌ ده‌ناڵێنێ ، سیاسه‌تێك كه‌ ئه‌م ووڵاته‌ی، به‌تایبه‌تی دوای ئه‌م ته‌قینه‌وه‌یه‌ ، به‌ره‌و هه‌ڵدێرێكی نادیار و ترسناك بردوه‌ .

هونه‌ر ، به‌هه‌موو به‌شه‌كانیه‌وه‌ په‌یامێكی مرۆڤ دۆستیه،‌ ئه‌ركی هونه‌رمه‌ند گه‌یاندنی ئه‌و په‌یامه‌یه‌ ، سواره‌ی ئیلخانی زاده‌ له‌به‌یتی سه‌یده‌واندا ئاوا باسی هونه‌ر ده‌كا: ( به‌لای منه‌وه‌ كۆمه‌ڵ به‌وكه‌مایه‌تیه‌ ناڵێن كه‌سودێكیان هه‌یه‌ جیا له‌سودی‌گشتی وه‌ هونه‌رێكیان هه‌یه‌ به‌پێچه‌وانه‌ی هونه‌ری كۆمه‌ڵ ،چینی پێكهێنه‌ر واته‌ ئه‌و كه‌سانه‌ كه‌ زوربه‌ن و هه‌میشه‌ ڕوویان له‌ ژیانی مرۆڤایه‌تی وبه‌رز كردنه‌وه‌ی پله‌و پایه‌ی ژیانی ئینسانیه‌…. ئه‌وانن كه‌ هونه‌ریان ئێسك سوك وله‌دڵ نزیك وخوێن شیرینه‌ ) .
پێم وایه‌ كه‌س نیه‌ نكولی له‌وه‌ بكا كه‌ هونه‌رمه‌ندی گۆرانی بێژی به‌ناوبانگ، خاتوو فه‌یروز، ئه‌م په‌یامه‌ی تا ئاستێكی باش گه‌یاندوه‌ ، كه‌م وا هه‌یه‌ عاشقانی هونه‌ر وگۆرانی ، به‌زمانی عه‌ره‌بی، سه‌ره‌تای ڕۆژه‌كه‌یان به‌ده‌نگه‌ به‌سۆزه‌كه‌ی فه‌یروز ده‌ست پێنه‌كا ، كاركردی ئه‌و ده‌نگه‌ سیحراویه‌ ، نه‌ك ته‌نیا لای عه‌ره‌ب زمانه‌كان ، به‌ڵكو تا گۆشه‌و كه‌ناری به‌شێكی به‌رچاو له‌ وڵاتانی جیهانیش ڕۆشتوه‌‌ و خاوه‌نی ده‌نگه‌كه‌ی كردۆته‌ شایسته‌ی ڕێز وخۆشه‌ویستی ، ده‌نگێكی ده‌گمه‌ن كه‌ پێم وایه‌ دووباره‌ بوونه‌وه‌ی له‌ كورت ماوه‌دا ئه‌سته‌مه‌‌ .

مێژووی ژیانی ئه‌م هونه‌رمه‌نده‌ ئه‌وه‌مان پێده‌ڵێ كه‌ به‌رده‌وام نه‌یویستوه‌ پێشوازی له‌ پاشا وسه‌رۆكه‌كان بكا وله‌نزیكایه‌تی لێیانه‌وه‌ خۆپارێزی كردوه‌ ، به‌تایبه‌تی ئه‌وانه‌ی عه‌ره‌ب زمان، چه‌ندین جار داخوازی ئه‌وانی بۆ دیدار ڕه‌تكردۆته‌وه‌ ، هه‌ربۆیه‌ ڕازی بوونی به‌پێشوازی له‌ ماكرۆن له‌ماڵه‌كه‌ی خۆیدا بۆ قاوه‌ خواردنه‌وه‌یه‌ك، له‌ ڕووی مه‌عنه‌ویه‌وه‌ ، شانازیه‌كی گه‌وره‌یه‌ به‌خشیویه‌تیه‌ ئه‌و سه‌رۆكه‌ و خه‌ڵاتێكی پڕبه‌هایه‌ بۆ ماكرۆن، به‌ر له‌وه‌ی ناوبراو باڵاترین خه‌ڵات ومیدالیای فه‌ره‌نسای پێببه‌خشێ . لێره‌دا پرسیاره‌كه‌ ئه‌وه‌یه‌ كام خه‌ڵات ومیدالیایه‌ پڕ به‌هاتره‌ !؟ ئه‌وه‌ی هونه‌رمه‌ند ده‌یبه‌خشێته‌ سه‌رۆك یا پێچه‌وانه‌كه‌ی ؟ ماكرۆن به‌پێی خۆی چۆته‌ ماڵی فه‌یروز و ئه‌و نه‌چۆته‌ كاخی سه‌رۆكایه‌تی فه‌ره‌نسا ! ئه‌م په‌یامه‌ پێمان ده‌ڵێ كه‌ باڵای هونه‌ر كاتێك ده‌كه‌وێته‌ به‌ر‌ده‌ستی هونه‌رمه‌ندێكی شایسته‌ به‌و هونه‌ره‌، هه‌میشه‌ بڵند تر وبه‌رزتره‌ له‌باڵای سیاسه‌ت ، ئه‌ویش كام سیاسه‌ت ؟ با نه‌چمه‌ نێو ئه‌و بواره‌وه‌و و وه‌ڵامه‌كه‌ی بۆ ئێوه‌ی خوێنه‌ر جێبهێڵم !
ئه‌م هه‌ڵوێسته‌ به‌ناچاری ئه‌وه‌مان بیرده‌خاته‌وه‌ كاتێك به‌شێك له‌وانه‌ی له‌سه‌ر هونه‌ر هه‌ژمار ده‌كران چۆن چۆنی چنگ له‌سه‌رشان، به‌فیتویه‌ك، به‌ره‌و كاخه‌كا‌نی سه‌دام ده‌ڕوشتن له‌پێناو چه‌نگێك پاره، هه‌ندێكیان ئێستاش له‌ ژیاندا ماون، چۆن ده‌كرێ ئه‌وانه‌ به‌ جه‌واهیری و فوئاد سالم ، وه‌ك نمونه‌ ، به‌راورد بكرێن، مێژوو له‌ دوتوێ خۆیدا ئه‌و هه‌ڵوێستانه‌ فه‌رامۆش ناكا !! ئه‌م جۆره‌ هونه‌رفرۆشانه‌ ، به‌ جیاوازی بواره‌كانیان ، گۆرانی ، مۆسیقا ، ئه‌ده‌ب ، وێنه‌كه‌شان ، شانۆگه‌ری ،…..هتد ، ته‌نانه‌ت ڕۆژنامه‌نوسیشی له‌گه‌ڵدا بێ، به‌داخه‌وه‌ ویژدان فرۆشی و قه‌ڵه‌م فرۆشی ده‌كه‌ن ، كه‌م نین ئه‌وانه‌ی له‌كوردوستانه‌كه‌ی لای خۆشماندا ئه‌وبازاڕه‌یان به‌گه‌رمی ڕاگرتوه‌ !
دووباره‌ ئه‌م هه‌ڵوێسته‌ مه‌بده‌ئیه‌ی فه‌یروزی هونه‌رمه‌ند په‌یامێكه‌ بۆ هه‌موو ئه‌و ده‌سه‌ڵاتدارانه‌ی به‌زۆر خۆیان به‌سه‌ر كورسی ده‌سه‌ڵاته‌وه‌ چه‌سپاندوه‌ ، به‌تایبه‌تی له‌ ناوچه‌ی ڕۆژهه‌ڵاتی ناوه‌ڕاست، وله‌وانه‌ش كوردوستانه‌كه‌ی لای خۆمان، په‌یامه‌كه‌ له‌ دووتوێ خۆیدا ده‌ڵێ : باڵای هونه‌ری ڕاسته‌قینه‌ ، هونه‌رێك كه‌ ده‌رد وئازاره‌كانی كۆمه‌ڵ ڕه‌چاو بكا وهه‌ڵیانداته‌وه‌ وله‌گه‌ڵیا بژی و ده‌ست بخاته‌ سه‌ر برین وئازاره‌كان وڕێگا چاره‌یان نیشانبدا، زۆر به‌رزتر و وبڵندتره‌ له‌ (( ته‌خت وعه‌رشی )) ده‌سه‌ڵاتداریه‌تی ئێوه‌ .
به‌ڵێ ئازیزانم ، ئه‌وه‌ فه‌یروزه‌، به‌ده‌نگه‌ به‌سۆزه‌كه‌ی شوێنێكی له‌نێو دڵی جه‌ماوه‌ره‌ به‌رینه‌كه‌یدا كردۆته‌وه‌ ، به‌‌م هه‌ڵوێسته‌ دروسته‌ی دواییشی ئه‌وه‌نده‌ی تر ئه‌و جێگایه‌ی قایمتر كرد ، ئه‌وه‌ فه‌یروزه‌ شادی خۆشی ده‌خاته‌ دڵانه‌وه،‌ بۆیه‌ مه‌حاڵه‌ به‌راور‌د بكرێ به‌و (( عه‌رشه ‌فشه‌ڵه‌ی)) له‌ پێناو مانه‌وه‌و به‌رده‌وامی خۆیدا دڵان هه‌ڵده‌قرچێنێ وئاواته‌كانیان ده‌خاته‌ ژێر گڵ . ‌


عه‌بدوڵا ساڵح
7 / 9 / 2020

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish