چل و دوو خولەک شیعر بۆ شوانە ، یان چل و دوو شوانە بۆ شیعر … نەوزاد بەندی

• نەوزاد بەندی –

[ بە بۆنەی بردنەوەی خەڵاتی دووەم لە ڤێستڤاڵی ڕێژنەی شیعریی ، چەند ووشەیەک بۆ شوان سەعید ]

شوانە ..
ئێستا سەعات یەک و هەژدە خولەکی دوای نیوە شەوە و
هەر ئێستا بوو بە یەک و نۆزدە خولەک ..
لەگەڵ ئەوەی سبەینێ دیدارم لەگەڵ فیتەر و
یەک دنیا بێگاری تردا هەیە ،
کەچی حەزم کرد بە کۆمەڵێ ووشەی ماندووی خۆم ،
تەپ و تۆزاویت بکەم ..
ئێ توخوا لێرە گوڵ کوا ،
هەتا گوڵبارانت کەم ؟
لێرە گوڵ کوا ..شوانە .لێرە گوڵ کوا ؟
ئاخر توخوا
شوانە ، لێرە گوڵ کوا ؟

لەم قەفەزە ژەنگاوییەدا ،
کە سەدان ساڵە ژەنگ گرتوویەتی و
کەچی یەک تەلیشی ناپسێ ..
ئاخر توخوا تۆ شتی وات بینیوە ،
قەفەزێک سەدان ساڵە ژەنگ خواردبێتی و
یەک تەلیشی نەپسێ ؟؟
ئەزانی بۆ سەدان ساڵە
ژەنگ گرتوویەتی و یەک تاڵیشی ناپسێ ؟
ئەزانی بۆ ..؟
چونکە خۆمان ..
بە دەست و پەنجە و لوولاقمان ،
ڕۆڵی شیشەکانی قەفەز ئەگێڕین و
ئەوەندە لە ئازادی ئەترسین ،
هەر نەبێتەوە .
تەنانەت دەرگایەکیش بکرێتەوە ،
خۆمان حازر کردووە ببین بە دیوار ..
تەنانەت دیکتاتۆرێکیش کۆرونا بیکوژێ ،
ئامادەین لەسەر پشتی خۆمان
ببین بە تێڵاو دار
لە پێی خۆمانا ببین بە سندم
لە مەچەکی خۆمانا ببین بە کەلەپچە
لە ملی خۆمانا ببین بە پەتی سێداره
له موچەی خۆمانا ببین بە پاشەکەوت و
لێبڕین ..
ئەزانی چەند حەزمان لە کارەساتە ؟
شوانە ..ئەزانی هەموومان ئاڵودەی
کۆیلایەتی بووین ؟
تۆ ئەزانی لەگەڵ نەهامەتیدا گەز گەز باڵا ئەکەین ؟
لەگەڵ نەبوونیدا ، ژنەکانمان ئاوس ئەبن ..
تۆ ئەزانی لەگەڵ درۆدا چەند ڕێکین ؟
لەگەڵ خیانەتا چەند ڕوو سوورین ؟
تۆ ئەزانی لەگەڵ ترسنۆکیدا ،
چەند شانازیمان تیا ئەڕوێ ؟
مەدالیا بە مەدالیا ئەڵێ خۆت لادە ،بەسنگمانەوە ..
قسەی زل بە بەقسەی زل ئەڵێ خۆت لادە
بە زمانمانەوە ..

ئەزانم تۆ کەیفت بە سیاسەت نایە شوانە ..
ئەترسی ڕەنگی تابلۆکانت لێ تێک دا ..
ئەزانم حەز ناکەی سیاسەت
دەلاقەی باراناوی شیعرەکانت
بە دوکەڵ ڕەشکا ..
ئەزانم حەز ناکەی سیاسەت ،
باخچە پڕ لە هەنگ و گوڵەکانت ،بۆ پڕ کا لە بۆنی کەلاکی گەنیو و ..بەرازی بەلەسە .
ئەزانم ..
بەڵام من کە کوڕی ناو جەنگ و
ڕاکردووی ناو هەرای کودەتا و
ئاهەنگی ناوەختی ناو حیزب و
برینداری ناو تەقەی خۆشی
سەد باره هەڵبژاردنەوەی خاوەنشکۆم ..
زاریشم ببەستم ،
هەمدیسان برژانگم ،
دنیایەک مەشهەدی
نوشوشتی ئەکێشێ .
دنیایەک جڕت ئەنێ بە حەوش دیواری
ئەوانەی
لە کارتۆن پەیدا بوون
کەچی پیس خەریکی
تێکدانی
داهاتووی من و تۆن .

بەس شوانە
حەزم ئەکرد
عەسرێکیان
لەبەردەم چایخانەی شەعبا
یان لەلای گوزەری
عەرەبانەی دوای سەعات دووی
جادەی
کاک ئەحمەد ،
بتبینم ..
تەماشای هەناسە و
حەسرەتی مامۆستا و
عەرەبانچی بکەین و ..
بزانین چەند قورسە ژیان لێرە ..
چەند خێرا کات ئەڕوا ،
بۆ ئەوەی یەک دنیا
مرۆڤی بێ لایەن
نەدەستیان
بگاتە لەتێ نان
نە دەمیان بگاتە قومێ ئاو ..

حەزم کرد
لەبەردەم چایچیەک
بە سینی ،
چای خەڵوز ئەفرۆشێ
ڕاوەستین
چایەکت بۆ بکڕم ..
دوو سیگار گڕ بدەین ..
دوا سیگار ..
نەک لەبەر تەندروستی سیەکان ..
نا ..لەبەر کەمپینێ ،
لە دژی شقارتە ..
ئێ ئاخر میللەتێ ساڵانە گڕ ئەگرێ ،
کفرە کفر شقارتە و
ئاگری
پێ بدرێ ..
تۆ بینیت ئەو تەیرەی
لە عەشقی هێلکەکان ،
مایەوە ..تا سووتا ؟
تۆ بینیت ..؟
تۆ بینیت ، چەند جوانی ،
ئەسوتێ ..
تا زیاتر گیرفانی
مافیایەک
هەڵتۆقێ ؟
تۆ بینیت ؟

ئەزانم هەمدیسان ،
سیاسەت ئەڕواتە
پاوانی شیعرێکت ..
هەمدیسان ،
مرواری
تاقێکت ئەکەوێ و ..
نازانی
چۆن جاڕی بۆ بدەی .

دەی قەینا ..
دوا،سیگار ئەکێشین .
دیوانێک کە هیچ کەس نەیکڕی ..
کە ناکەس تاتوانی
هۆنراوەی لێ دزی ..
ئەیکەمە دیاری بۆت ..

ئەڕۆمە
گەلەری پڕ وێنەی تەماویت ..
ئەڕوانم
بۆ کۆشکی
ڕوخاو و
خەماویت ..
لەو سەری کۆڵانی
کۆپلەیەک ئەوەستم ..
لەبەردەم
تاوێکی ناوەختی دێڕێکتا ،
بێ چەتر ..
چاوەڕێی خۆم ئەکەم بێتە خوار ..
ئەزانی چەند ساڵە ،
بە بێ خۆم ، ئەگەڕێم ؟
هەندێ جار ،
بۆ ساتێ
تارمایی خۆم دیارە و
دیار نیە ..
وەک لەتیف هەڵمەتم
بەسەردێ و ..
هەم یارە و .. یار نیە ..

دوای ئەوە تۆ بڕۆ
پێشبڕکێی شیعرەوە و
منیش
بۆ
سۆراخی پشکۆیەک
لە شارێک ژیلەمۆ

ئێستاکە سەعات بوو
بە یەک و پەنجا و نۆ
خولەکی بەیانی و
هەر ئێستایش
بو
به
دوو