Skip to Content

فیلمی سینەمایی “بارهەڵگریی زێڕ” لە دەرهێنانی توورەج ئەسڵانی بە شێوەی ئۆنلاین نمایش دەکرێت

فیلمی سینەمایی “بارهەڵگریی زێڕ” لە دەرهێنانی توورەج ئەسڵانی بە شێوەی ئۆنلاین نمایش دەکرێت

Closed
by ئه‌یلول 20, 2020 Cinema, General

مەنسوور جیهانی ـ فیلمی سینەمایی “بارهەڵگریی زێڕ” لە دەرهێنان و بەرهەمهێنانی سینەماکاری کورد “توورەج ئەسڵانی” لە ڕێگای ماڵپەڕەکانی “فیلمیۆ” و “نماوا” بە شێوەی ئۆنلاین نمایش دەکرێت.

فیلمی سینەمایی “بارهەڵگریی زێڕ” Gold Runner لە دەرهێنان و بەرهەمهێنانی سینەماکاری کورد “توورەج ئەسڵانی” و لە نووسینی هاوبەشی “توورەج ئەسڵانی” و “هادی نادی” کە لە فیستیڤاڵە جۆراوجۆرە نێودەوڵەتییەکانی فیلم لە ئاستی جیهاندا نمایشکراوە و چەندین خەڵاتی گرینگی بەدەستهێناوە، بە هۆی باروودۆخی سینەماکانی ئێران و بڵاوبوونەوەی پەتای ڤایرۆسی کۆڕۆنا، نمایشە ئەنتەڕنەتییەکەی لە ڕێگای ماڵپەڕی “فیلمیۆ” بە ناونیشانی www.filimo.com و ماڵپەڕی “نماوا” بە ناونیشانی www.namava.ir دەستی پێکردووە و هۆگرانی هونەریی سینەما دەتوانن بە کڕینی بلیت ، لەم دوو ڕێگایەوە بە شێوەی ئۆنلاین ئەم بەرهەمە سینەماییە ببینن.

لە فیلمی سینەمایی “بارهەڵگریی زێڕ”دا کۆمەڵێک ئەکتەری ناوداری سینەمای ئێران تیایدا ڕۆڵیان بینیوە، لەوانە: خاتوو ژالە سامتی، ئەکتەری ناوداری کورد سەعید ئاقاخانی، پەیام ئەحمەدی نیا، لوتفوڵڵا سەیفی، حەسەن زاهیدی، داوود محەمەدئابادی، عەلیڕەزا مێهران، ئومید ڕووحانی، محەمەد فەراهانی، مەحموود شەفیع خانی، ڕەزا شەفیع خانی و ئەمین فەرزانە.

“بارهەڵگریی زێڕ” کە لە لایەن کۆمپانیای بڵاوکەرەوەی نێودەوڵەتی “ئاڕت هوود” Arthood لە ئاستی دنیادا بڵاودەبێتەوە، بۆ یەکەمین جار لە سی و حەوتەمین خولی فیستیڤاڵی فیلمی فەجر لە وڵاتی ئێران نمایشکرا و کاندیدی خەڵاتی باشترین فیلمی یەکەم و دووهەمی ئەم ڕووداوە گرینگەی سینەمای ئێران بوو.

ئەم فیلمە لە یەکەمین بەشداریی نێودەوڵەتی خۆیدا لە بەشی پێشبڕکێی سەرەکی “ڕەوتە نوێیەکان New Currents لە بیست و سێیەمین خولی فیستیڤاڵی نێودەوڵەتی فیلمی “بووسان” Busan لە وڵاتی کۆریای باشوور، چووە سەر پەردەی سینەماکان و کاندیدی خەڵاتی باشترین فیلمی یەکەم و دووهەمی ئەم ڕووداوە گرینگەی سینەمای ئاسیا بوو.

ئەم بەرهەمە سینەماییە لە درێژەی بەشدارییە نێودەوڵەتییەکانی خۆیدا لە بەشی پێشبڕکێی “سینەمای جیهان” World Cinema لە حەوتەمین خولی فیستیڤاڵی نێودەوڵەتی فیلمی “دهۆک” Duhok لە هەرێمی کوردستان نمایشکرا و “توورەج ئەسڵانی” بۆ دەرهێنانی ئەم بەرهەمە سینەماییە خەڵاتی “بەهرەمەندی نوێی” New Talent بەدەستهێنا و لە لایەن ئەندامانی لێژنەی دادوەرانەوە، خەڵاتی “گەڵای مێو” و لەوحەی فەخری پێبەخشرا.

“بارهەڵگریی زێڕ” لە دوایین بەشداریی نێودەوڵەتی خۆیدا لە بەشی پێشبڕکێی فیستیڤاڵی نێودەوڵەتی فیلمی “چاتراپاتی شیواجی” Chhatrapati Shivaji لە وڵاتی هیندستان، چووە سەر پەردەی سینەماکان و خەڵاتی باشترین سیناریۆی ئەم ڕووداوە سینەماییە بە “توورج ئەسڵانی” و “هادی نادی” بەخشرا.

هەندێک لە ستافی فیلمی سینەمایی “بارهەڵگریی زێڕ” بریتین له:
دەرهێنەر: توورج ئەسڵانی، نووسەرانی سیناریۆ: توورج ئەسڵانی و هادی نادی، بەڕێوەبەریی وێنەگرتن: حەسەن ئەسڵانی، دیزاینی دەنگ: عەلی عەلەوەیان، مونتاژ: ئەمیر ئەدیب پەروەر و حەمید عەلیقولیان، دەنگهەڵگر: محەمەد ساڵحی، موزیک: مەسعوود سەخاوەت دووست، بەرپرسی بەرهەم: سەعید هاشمی، دیزاینی دیکۆر و جلووبەرگ: مەجید عەلی ئیسلام، میکیاج: ڕەزا عەڕەبی، دانانی سەرمایە: فریشتە جوغەتایی و توورج ئەسڵانی، ڕاوێژکاریی بەرهەمهێنەر: مەنسوور سوهراب پوور، بەرنامەداڕێژ: عەقیل تەقی زادە و بەڕێوەبەریی ڕاگەیاندن: مەنسوور جیهانی و مەنووجێهر جیهانی.

پەیجی فەرمی فیلمی سینەمایی “بارهەڵگریی زێڕ” لە ئینستاگرام:
https://instagram.com/goldrunnermovie

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish