Skip to Content

دارستانێک لە تەمتومان … شیعر/ کاوە عوسمان عومەر

دارستانێک لە تەمتومان … شیعر/ کاوە عوسمان عومەر

Closed
by ئه‌یلول 30, 2020 General, Poems

خۆزگەیەک بۆ گەیشتنە..
کڵپەی چاوی ئاسمان،
دەربازبونێ ،
لە چەقۆی ڕۆشتن..
لەسەر ملی باڵندەی خەم،،،
تا شەونخونیەک لە دارستانێ..
لە تەم نەبینی،،
دەروازەی تەمتومان ناکرێتەوە،،
ئەبێ مەنزڵگەی ئەرخەوانی مانگ..
بەفرمێسکی نمەی شیعر..
چەند دووربێ ،،
بەڵام زۆر نامێنێ..
لە زەریای شەوێکی ڕەسشپۆشا،
دەربازم بێ،،
تا بۆنی گوڵاوی …
شنەبای سپێدە بکەمەوە ، سیسرکێ،،
دیارە جێماوە لە نێو ئەبەدیەتی ..
گژو گیایەکی تەڕ، خەونی..
خاڵخاڵۆکەیەکش پێش کەوتنەخوارەی..
ئاورنگی عیشقێک
……
لە ڕێگادا، بە چرپەیەک پێی ووتم،،
کات نەماوە، بچینەوە ئەو شوێنەی …
بریسکەی ئەستێرەکان،،
لە چەمی ئێوارەدا…
ئەبوونەوە بە پەری ئاو،،،
ساتێ بۆ مەرگ،،
ساتێکیش بۆ ئاوێزان،،
بە پرچی ڕژاوی هەتاوێک،،،
لەوانەیە برینی کراوەی ڕۆژەکان،،،
نەهێڵێ فریای بینینی..
سەمایەکی تری پۆلە کۆترە..
ئاڵتونیەکانی سەرمێرگی…
خۆشبەختی بکەوین،،
چەند خۆشە، هەورێکی مەست..
بەدەر لە کیمیای زانست و ماتماتیکی…
هاوکێشە سەختەکانی لۆژیک…
بکەیتە پێخەفێک،،
چیای تەمتومان..
شیبێتەوە بۆ وشە سرکەکان، درەخت،،
لەسەر پەنجە بڕوێتەوە ، چرای..
داگیرساوی چاوی ئەویش..
ڕێگای نووری خۆدۆزینەوە بێ..
…………
نزرگە کانی چاوەڕوانیش ئەبێ،،،
چەندە دووربن ،،
لە لێوی خوێنینی..
خونچەکانی بێهودەیی؟،
ساتێ پێش مەرگ و…
ساتێ دوای مەرگ،،
لە ویستگەیەک بەرەو شاری گومڕایی،
بینیمەوە، پاش ساڵانێک…
لە بەرد و خۆڵ و سەراب،
وەک پەیکەرێک لە تەم دەرکەوتەوە،،
چرکەکانیش خەریک بوو،،
لە گریان بوەستن،،،
وەڵامەکان باڵی فڕینیان قرتا بوو،،
بۆیە دیدەنی ترم سپاردەوە،،
بە شەپۆلە مەستەکان،،،
بەدەر لە کات و شوێنە کان.
………….
گەر ویستت بمبینیتەوە،
دارستانێ لە تەمتومان ناونیشانمە،،
سۆراخی ئەسپە هەڵهاتوەکانی
بەهەشت ئەکەم،،
تا بگەمەوە قەراغ وڵاتێ،،
نێوان ڕەشەبا و بەستەڵەک،،
کە لاتم،،
هەموو شتێک ئەبریسکێتەوە،،
ئاو ئاوریشمە،،
جەستە ئۆقیانوسی فڕیو،،،
شوێن و کات ،،
پانتایەکی بەرجەستە..
لە بونێک لە ئەفسانەی زیوینا
………..
هەڵەی شوێنێکە،
چیتر کۆیناکاتەوە،،
بە لمی وریوی ڕۆحی کۆچەرێک،،
هەیە بوونی،،
بە هەڵە لە تۆڕی ماسی ..
شوێن و کاتەکانا فڕێدراوە.
هەشە پێش کاتەکان هاتوە، هەشە
شوێنەکان بیریان چوە،
کە ئەو هەیە، هەشە
بێ شوێن ، بێ کات…
لە دورخەی نامۆیدا ئۆقرەی گرتوە،،
بەڵام گەرتۆ هەبی،
نەشوێن ، نەکات
لە یەک دورن، نە ڕۆح…
پێیان نامۆیە، کە نەشبی،،،
شوێنەکان لە کۆتایی میلۆدیای…
ئێستا پەراوێزن ،،
…………
شنەبایەکی سەرگەردان
لە نێوان مەرگێکی هاتوو..
مەرگێکی ڕۆشتوو..
یاداشتی شوێنەکان بە شەقامەکانا ،
ئەنوسێ دوای تۆ،
کتێبێکە تەنیایی…
هۆنراوە بە هۆنراوە،،
لە ڕۆحا پاشماوەی..
نوسینی سەر بارانی لێ جێدەمێنێ،،
کلیلی دەرچوون نیە، تۆ..
لە هەر شوێن و کاتێکا هەبیت،،..
لەگەڵ خۆت ئەتبرد،،
کلیلی سندوقی
کریستاڵی دڵ،
تەنها بەلەمێک لەوشە وخەم..
ئەمێنێتەوە، ناچارە سەفەر،،
لەسەر لەپی ئەستێرەی…
چارەنوسا بۆت بنوسێ،،
کۆچەری خۆی شوێنە، یان جێگەکان
پەرداخی ڕژاوی دوورین؟
زەریا لە چاوتە،
یان چاوت،،
زەریای قوووڵی کات ئەخولقێنێ؟
………………
کوپێ قاوە،،،
لە ژێر مانگێکی شین..
لە غەریبی و..
چنگێ شیعری شیرین،
لەگەڵ تۆدا خۆشە،،
ئەو ژنە گوڵپۆشەش،،
کە خەرمانی یادەوەریە لەبیرچوەکانی ..
بە پاسکیلێکەوە بردە…
دارستانێ،،
لە جادووی جوانی چرکەیەکا وونبوو

……………………
کام ئاگر بە کڵپەترە،،،
گەر ساتێ
بۆ مەرگ مابێ؟
تا چاو بڕکا لمە، هەڵبەتە..
دەربازبوون گەڕانە،،
بۆ دەروازەی گزنگێک،،
لەوبەر ڕۆخی ئەندێشە،،
چارە، تەنها پەرتووکێ ..
لە شەونم ونوورێ،،
لە دڵ خۆیدا،،
کورسیەک لەسەر شەپۆل،
کوخێک لە شیعر،
دارستانێک لە تەمتومان
لە ڕۆح خۆیدا،
تەنها پەرادیسە.

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish