مانیفێستی عەشق… بەشی هەژدە… تێکست: ستیڤان شەمزینی
شەرابی هەستت تاکە شەرابە مەستم بکا
بۆم تێکە لەو شەرابە، با ئەشقت نقووم بکا
پێش ئەشقت نەمامێک بووم، ئێستا درەختێکی پەلوپۆدار
پێش ناسینت، کوێرە کانی بووم هەنووکە بووم بە رووبار
تۆ هەر ئەوەندە یەک جار، بڵێ خۆشم ئەوێی
من هەزار پرد لێ ئەدەم رووەو رۆحی ناسکی تۆ
تۆ بە من ئەڵێی، جادووگەری وشە و ئەشقیت
بێ ئاگای لەوە، کانگای وشەکانم دڵی تۆیە
قوڵپی گریانەکەت، ئەکەم بە درێژترین قەسیدە
تۆش موروی پێکەنینەکانم بکە بە ملوانکە بۆ خۆت
بەرلەوەی ئاشق بم، پەڕەسێلکەیەک بووم سست و تۆراو
دوای ئەشقت، بووم کۆترە شینکەی ئاسمانی خۆرەتاو
جوانیی کانییەکی روونە لە دڵی تۆوە هەڵدەقوڵێ
خۆشەویستی شنەبایەکە لە رۆحی تۆوە هەڵدەکا
لێوت بخە سەر لێوم، دڵت بنێ بە دڵمەوە
رۆحت گیر بکە لە رۆحم
ئەمەوێ دڵۆپ دڵۆپ بڕژێمە ناوتەوە
کە تۆم بینی
با ستیانەکەت لە رەنگی چاوم کاڵتر بێ
دەستت بۆنی مێخەکی شیعرەکانی لێبێ
ماچەکانیشت تاڤگە بن ئاوی چێژیان لێ بڕژێ
خودا بیری کردەوە لە چی دروستم بکا؟ زۆر بیری کردەوە
تاکو لە کۆتاییدا منی لە نازی تۆ و گڵی ئەشقت ئافراند
هەست بە حوزنێکی قووڵ ئەکەم لە قوڵپی پێکەنینەکەتا
ئەزانی من تەنانەت ئەو حوزنەشم، زۆر خۆش ئەوێ؟!
من ئەو گووڵە بەهارییەم کە لە پایزی دڵتا ئەڕوێم
بە نەسیمی فێنکی هەناسەت هەموو رۆژ ئەشنێمەوە
هەزار پێناسە و لێکدانەوەیان هەیە بۆ من
کەچی من یەک پێناسە زیاترم نییە:
ئاشقێکی دێوانە و هیچی تر
هەرچەند دوور بڕۆم، لێت نزیک دەبمەوە
هەرچەند لێتەوە نزیک بم، لێت دوور دەکەومەوە!
نامەیەکی زۆر زۆر درێژم بۆ ناردیت
لە رۆحی نیتشە و سەرکەشیی دیدالیۆس
کەچی واتزانی، شێت بووم
لە دووریی هەزاران میلەوە خۆم ون کرد
لە رۆحی تۆدا جارێکی دی خۆم دۆزییەوە
