وەک شیعرێ تێدەپەڕێ …شیعر/ کاوە عوسمان عومەر
وویستی شتێک بڵێ،
گەر نەشگەڕێتەوە،،
بێ ئاگادارکردنەوەی پێشوەختە دێ،،
وەک تارماییەک..
لە ماڵێکی چۆڵ،
وەک شیعرێکی نەنوسراو،،،
وەک بەلەمێکی وێڵ،،
بەسەر شەپۆلی بیرەوەری..
شارێکی بیرکراوا،
تێپەڕێ…
پەیمانیدا،،،
گەر باهۆزی سەفەریش…
پۆلە پەپولەی ڕۆحی بەرێ،،
وەک نۆتای گیتارێ لە خەو،،
وەک لێزمە عیشقێ،،
وەک تەمێ، خێوێ، وەک سەرابێ،،
لە بێستانی ئەندێشەیدا،،
بێت و بچێ،
پەیمانی دا،،،
گەر چرپەشی نەگاتە جێ،،
گەر پەنجەشی بەر ڕوخساری..
تەزیوی ژێر هەورێکی ..
چاو پڕ فرمێسکا نەکەوێ،،
لە هەیوانە چۆڵ و جێهێڵراودا،،
وێنەی پەریئاسای دەرکەوێ،،
گەر ڕەشەباش هەواڵی نەهێنا،،
گوڵە تەڕە مەستەکان ..
لە ماڵێکی خەوتوو لە ڕابردوودا،،
بە پەنجە کریستاڵیەکانی بجوڵێنێ ،،،
پەیمانیدا،،
گەر کات و شوێنیش…
بوونە دوو دیوار،،
بوونی ئەفسانەی لە هەموو شوێنێ بی..
لە باخچەکەدا وەک شیعڕێ تێپەڕێ،،
بە شنەبای هەناسەی،،
لقی دارە خەوتوەکان بشەکێنێ،،
لێرەنابێ، ..
بەڵام بە لێوی خونچە قورمزیەکان،،
گوڵاوی بەهارێ…
لە شەوێکی هاوینا بێنێ،،
لێرە نابێ،
بەڵام لە سۆمای مانگێکی مەستا،،
زەردەی لێوی بێ،،
لێرە نابێ،،
لە چنگی زیوینی..
لێزمەی ئێوارەیەکی درەنگا..
بریشکەی پڕ ئەسرینی..
چاوەکانی دەرکەوێ..
هەرگیز لێرە نابێ،،
بەڵام پەیمانیدا،،
بە باڵە فڕێی…
قازە ئەرخەوانیەکانی عیشقا ،،
بگاتەوە هەمان جێژوانێ،،
پەیمانیدا،،،
لە خوڕەی ئاوی فوارەی گزنگێ،،
ڕوخسارێ لە خەیاڵێکا،،
بەرجەستە بێ ،،
ببێتە پەیکەرێ لە جوانی،،
لە نێو گەڵا پەمەییە ڕژاوەکانی …
دارستانێ،،
نوقم لە زوقم و تەما..
هەمیشە چاوەڕوان بێ
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
