Skip to Content

نمە لمی تەنیایی … شیعر/کاوە عوسمان عومەر

نمە لمی تەنیایی … شیعر/کاوە عوسمان عومەر

Closed
by تشرینی دووه‌م 2, 2020 General, Poems


من دەرگا بۆ کۆتاجار
لە خۆم دائەخەم
پەڕەی کتێبەکەش
لەسەر دواهەمین رستە
ئەنوشتێنمەوە
بە نمە بارانی بێهودەییش ئەڵێم
چیتر لە پەنجەرەکە نەدا،
لەو دیو ژورەکەم
پارچەیەک نوسین هەڵئەواسم
باچیتر کەس،،
ئەو پیاوە هەڵهاتوە
لە جیهانێکی دڕندە و
وێران و نایەکسان..
بێزار نەکا


ئێوارەیەک ،
تابلۆی ڕوخسارێکی..
خەمگینی جێهێشت
بێ مەل لە ئاسمان
بێ هەور
بێ خەندەی گوڵ
بێ چرایەک لە چاوی گزنگ
تەنهاو تەنها
بەلەمێکی دوور
نوقم لە هەڵم و تەم،
ڕەنگە تەرمی دڵێکی پێ بێ
زەریا نەبێ
شوێنێ
بۆ ناشتنی دڵێ کوانێ


لە ژێر کورەی ئاسمانا
شت زۆر ئەگوزەرێ
سوێی پەلی دارێکی ووشک
بۆ چۆڕێ باران،
خەونی مەلێکی تەرە
بۆ گەڕانەوەی بێستان و ڕوبار
لە شارێ ،
ڵێزمە لمەی خەم
کردیە بیابان


لە ژێر کورەی هەتاوا
ڕۆحی هەژارەکان ئەسوتا
ئێستاش کۆیلەکان زۆرن
سپارتاکۆسەکان وونن
لە نەمانی پاڵەوانەکان
با بچین پاڵەوانە مردوەکان
لە خەوی مەرگ هەڵسێنین


مێزێک ، لەتێ نانی کۆن
کاسێ شەرابی سوور،
وەک خوێنی هەڵتۆقیوی دڵ
چاوێک پڕە لە ئاسمانێک
تەڕە پێڵووی هەورەکانی،،
ڕێگایەک بەرەو ڕۆحێکی چۆل
ژورێکی تاریک
شەمەندەفەرێک
دوا مەزڵگەی
زەمەنێکی
بەسەرچووە


پێێ ووت ..
واز لە نوسینەوەی شەپۆل بهێنە
تۆ نازانی ئەم وڵاتە
نە بە زەریا ئاشنایە،
نە باڵی مەلەکانی
فێری دورە فڕینی
ئاسمانی ئازادی ڕەهایە

وێنەکە کارێکی هونەری فۆتۆگرافەری ئەڵمانی
(Susann Mielke)
بە سوپاسەوە لە پەیجی فەرمی خۆی وەرگیراوە

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish