Skip to Content

لە ئەمڕۆوە بیر لە تەنیایی مەکەرەوە .. تێکست: ستیڤان شەمزینی

لە ئەمڕۆوە بیر لە تەنیایی مەکەرەوە .. تێکست: ستیڤان شەمزینی

Closed
by تشرینی دووه‌م 19, 2020 General, Poems

فریشتەکەم
زۆر گەڕام تا تۆم دۆزییەوە
بینیم تۆ هەمان فریشتەی نێو خەونەکانم بوویت


فریشتەکەم.. دەستم بگرە
با سەما بکەین
با گۆرانی بۆ ئەشق بڵێین


فریشتەکەم.. لە دووریی تۆ
لەناو بەستەڵەکی ئەشقدا توامەوە


فریشتەکەم.. هەست بە سەرما دەکەم
بە سۆزی گەرمت لەم زەمهەریرە دەرمبێنە


فریشتەکەم.. خەریکی خوێندنەوەی تۆ بووم
کەچی بینیم باسی خۆم دەکەم


ئەمڕۆ لە دڵی ناسکی تۆدا
خەریکە وەک مۆم ئەتوێمەوە


من و تۆ لە یەکتر ناچین
نا. نا.. من و تۆ یەکێکین


لە ئەمڕۆوە بیر لە تەنیایی مەکەرەوە
کەرتێک لە خۆتت دەستکەوتەوە


تۆ گەورەترین جادووگەریت
بە وشەکانت رۆحم ئەهێنیتە سەما


عەشقێک لە ناخمدا چرۆی کردووە
هەرگیز جەستەم توانای هەڵگرتنی نییە


عەشق سەرچڵییەکی نەفرەتلێکراوە و
هەمیشە پاڵەوانە راستەقینەکانی دۆڕاون


دۆڕانی راستەقینە لە عەشقدا
رۆژی کەژاوەی زێڕینە


مرۆڤی دۆڕاو لەم گەردوونەدا نییە
مەگەر ئەوەی عەشقی نەناسیبێ


ئەگەر خۆت بە براوە بزانیت
دڵنیابە هەرگیز ئاشق نەبوویت


عەشق گەمەی دۆڕاوەکانە
هەرگیز خەون بە بردنەوەوە مەبینە


مەعشوقەکەم
پێش غروبی تەمەن
پێکێک لە شەرابی عەشقم بنۆشە


مەعشوقەکەم
پێش غروبی تەمەن
ئێوارەکانم پڕ بکە لە پێکەنین


مەعشوقەکەم
پێش غروبی تەمەن
بەخەندەیەک لەگەڵ ژیان ئاشتم بکەرەوە


مەعشوقەکەم
پێش غروبی تەمەن
بهێڵە بۆنی رێحانەی رۆحت بکەمەوە.

Previous
Next
Kurdish