مروارییەکانی ئەوین.. مرواری سێهەم/ شیعر: ستیڤان شەمزینی
پێم بڵێ لەکام گۆشەی شیعردا
پەنهان و بێ سرتە هەناسەت ئەدا؟
بیرمە کەوتیتە خەرەندی کتێبێکەوە
بە تیشکی حەرف وشیعرەوە!
ئەستێرەناس نیم بەڵام تۆم
لە هەموو ئەستێرەکان پێ ڕەونەقدارترە
شێخی سەنعانم و لەئافاتی رۆژگاری شوومدا
توند توند دەستم بگرە!
شارێکی کەشخە بووم
پێش ئەوەی بکەومە ژێر زرێباری فرمێسکەکانت
بەبێ تۆ دەوارێکی کۆن و شڕم
بەدەم هەڵمەتی گورگانەی ڕەشەباوە
پێش ئەوەی لافاوی مەرگ بمبا
بە ماچەکانت پڕم بکە لە ژیان
لە دوای مەرگیش
بە تەنها باوەشێکت وەک کانی ئەژێمەوە
گوێ لە موناجاتی موغێکی ئاشق بگرە
پێش وەرینی گوڵی تەمەن
لە هەر دێڕێکی ئەو موناجاتەدا
سەدان بزەی خنکاو بدۆزەرەوە
تۆ لەززەتی ماچە تەڕە شەونمییەکانتم
پێ ببەخشە
من هەزاران دێڕە شیعرت
بۆئەکەمە قردێلەی پرچت
بۆ چەند ساتێکیش
بێ بەگەرمی لەشی ناسکت دامپۆشە
پەیمان بێ منیش مەجنونانە
سەدان ساڵ لە عەشقتا ڕۆئەچم
تۆ هەر بۆ یەک جار
خەیاڵێکی ڕەنگاوڕەنگی خۆتم بدەرێ
منیش لە سەدان
خەونی زەرد و سووردا یادت ئەکەمەوە
تۆ یەکجار بە نێرگزەجاڕی باوەشی گەرمت
ئاشنام بکە
منیش دەیان جار بۆ پەیکەری جوانیت
کڕنووش ئەبەم
من ئەو کائینەم دوای سەراب کەوتووم
بۆیە هەمیشە ستایشی ئاو ئەکەم
لە نێو تەمە پرتەقاڵییەکانی خەیاڵدا
خۆم ئەدەمە بەر پرشنگی عاتیفەت
بە زمانی پەپوولە و گیا، بە خوێنی شیعر
زەردەپەڕی عەشقت ئەنووسم
بە فڵچەی گەڵا و بە بۆیاخی پەلکەزێڕینە
رەسمی لەت لەتبوونم ئەکێشم
سوێد – ستۆکهۆڵم
