Skip to Content

چیرۆک بۆ منداڵان.. سەیرانێکی پایزی.. عەلی حەمەڕەشید

چیرۆک بۆ منداڵان.. سەیرانێکی پایزی.. عەلی حەمەڕەشید

Closed


دەمێک بوو تامەزرۆی بینینی دیمەنە جوانەکانی وەرینی گەڵای دارەکان بووم لە وەرزی پایزدا ،بۆیە لەگەڵ باوکم و دایکم و خوشکەکەم ئێوارەیەکی پایز ڕێگەی یەکێک لە سەیرانگاکانمان گرتەبەر ،ھەر گەیشتینە ئەوێ باوکم لایدا و ئۆتۆمبێلەکەی لەو شوێنەدا وەستان کەلە وەرزی بەھار دا چەند جارێک بۆ سەیران ھاتبووین لەوێدا کاتێکی خۆشمان بەسەر بردبوو،ئەو کاتە سەوزایی وەکو فەرشێک زەوییەکەی داپۆشیبوو،گەڵای دارەکانیش سەوز بوون،کەچی ئێستا زۆر جیاوازە و زەوییەکە فەرشە سەوزەکەی گەڵای وەریوە و زەردە ،ئەو کاتە کە شنەی باکە دەھات خۆشی دەخستە دڵمانەوە و گەرماکەی کەم دەکردەوە، ئەمڕۆ ئەو کزە بایە ساردە و ئەگەر بەباشی خۆمان نەپێچایەوە ئەوا دوور نەبوو نەخۆشی نەخستینایە.لەناو گەڵا وەریوەکاندا کۆمەڵێک وێنەی جوانمان گرت،نازانم بۆچی ئەو گەڵایانە ھێندە سەرنجڕاکێش و دڵگیر بوون ،لەگەڵ باوکم ئەو ناوە گەڕاین و یەک یەک سەرنجی دارەکانم دەداو دەستم لە گەڵاکانی سەر زەوییەکە دەدا.گەیشتینە لای دارێک زۆر جوان بوو گەڵاکانیشی سەوز بوون،وتم بابە ئەم دارەیان بۆچی گەڵاکانی نەوەریون و ھەر بەسەوزی ماون؟باوکم تەماشایەکی کردم وەکو بڵێ ئەی خۆت نایزانی؟منیش وتم بابە گیان ھاتەوە بیرم ،ھەندێک دار ھەن چوار وەرزە سەوزن .ئەمەش یەکێکە لەوانە و ئەوانی تریش ھەر پایز ھات گەڵاکانیان دەوەرن.چەندە خۆشە ئەو گۆڕانکارییانەی کە لە سروشتدا روودەدەن ئاوا بەچاوی خۆمان بیان بینین. تا باشتر لێیان تێبگەین و لەبیریشمان نەچێتەوە.کە گەڕاینەوە بۆ لای دایکم و خوشکە بچکۆلانەکەم خواردنێکی خۆشی بۆ دانابووین .تێرمان لێخوارد بەڕاستی زۆر خۆشبوو بەلامەوە و سەیرانەکەی زیاتر لا خۆشکردم.. .

Previous
Next