مروارییەکانی ئەوین.. کۆتا مرواری.. شیعر: ستیڤان شەمزینی
دڵۆپە فرمێسکەکانم کۆبکەرەوە
رووبارێکی مەحزونی لێ دروست بکە
لە شیعرەکانما سۆراغی خۆت بکە و
تاجی شاژنی عەشق لەسەر بنێ
ئەوە من و هەستەکانمن لەبەردەمتا
کڕنووش بۆ جوانیت ئەبەین
ئەوە خۆم و دیوانم مۆم ئاسا
بۆ بزەیەکت لەسەرخۆ ئەتوێینەوە
خوێنی تۆیە لە لەشمدا دێت و ئەچێ
و هیچ کات ناسرەوێ
ئەوە بولبولی شیعرمە
بۆ پەسنی جوانی جادوویت ئەخوێنێ
ئەوە خوێنی تۆیە ئەڕژێتە
ناو دەمارە مردووەکانی هەستم
ئەوە منم لەڕۆژانی تەنهایی یاوەر و
لەغوربەتا هەموو کەستم
ئەوە خوێنی تۆیە وەک هاژەی تاڤگە
لە دەروونما مەوج ئەدا
ئەوە پرشنگی ئەوینی منە
سەر بە تاریکی ماڵی دڵتدا ئەکا
ئەوە خوێنی تۆیە ئاور
لە ساردیی هەناسەی تەزیوم بەرئەدا
ئەوە لافاوی نیگاکانمە
کە تۆ رووەو قووڵایی چارەنووسم ئەبا
ئەوە خوێنی تۆیە لە منا
وەک جۆگەیەک بەرەو مەزرا ڕێ ئەکا
ئەوەش دڵی منە
وەک تەرمێک بە کپی کەوتووە لەبەر پێتا
پێش ئەوەی ئەستێرەیەک
لە تاریکی شەودا خۆی بکوژێ
منت بە جۆرێ چزاند
سەر دانەنەوێنم بۆ تینی هیچ ئاگرێ
پێش ئەوەی هەموو شت
رەنگی ئاوابوونێکی ترسناک بگرێ
بینیم رۆحی ناسکت هێند تەزیوە
وەک کۆترێ هەڵدەلەرزێ
پێش ئەوەی خۆر لە کاتی ئاوابووندا
لەناو دەریادا بخنکێ
زەردەخەنەکەتم بینی
لەگەڵ نەوڕەسەکان بۆ نادیار ئەفڕی
یەک ماچت
لە گۆڕی غەریبیی هەزار ساڵە زیندووم ئەکاتەوە
وەک چۆن تاکە نیگایەکی ساردت
دەرگای ژیانم لێ دائەخات
گەر دەستم بگا بە لەشی تۆ
شەستەبارانێکم سەوزت ئەکەمەوە
گەر دەمم بگا بە دەمت
شەرابێکە بۆ تاهەتایە خورمات ئەکاتەوە
ئەڵمانیا – کەنار رووباری راین
سوێد – ستۆکهۆڵم سۆلنا
