Skip to Content

توڕە.. کەنعان مدحەت

توڕە.. کەنعان مدحەت

Closed
by May 3, 2021 General, Poems

هەمو توڕەییەکم
نوسینێکە
شیعرێکە لە بەرگی کڵپە
رۆمانێکی رووت و قووتی گەڵ و گون بە دەری،
لە ڕیاییکردن و پیاهەڵدان نەفرەتکەر
وشە بە وشەیان بخەنە ژێر گەورەکەری،
هەر دەرچوویەکی حوجرە و پەیمانگای مێشک لە بار بەر
یەک تاقە وشەیان پێ دەستەمۆ ناکرێ!
رەگی ڕەگیان دەگەڕێتەوە بۆ بەردەوامیی ئازاری لە ئاین و
رامیارییەوە سەپێنراو
ئەمە سەدەی بیست و یەکە
نەک ساڵانی قڕوقاتی و
بەسەر ئەم خێڵ و ئەو خێڵا هەڵدان
تێبینی ئەو وەردە جوڵانەوانە بکەن
کە ها ئێستا و کەمێکی دی
لە قاوغی سستییەوە دەردەپەڕن و

  • بێ جیاوازی –
    بەردەبنە قابیل و هابیل
    دەرپێکانیانیش دێننە خوار و بەیەک دەنگ
    هاوار دەکەن:
  • حوکمتان بە کێرمانەوە!
    ئەو گۆمە مەنگە ئەوەندەی خۆشە
    بەردێکی تیا بهاوێژرێ
    لافاو بەزەیی بە کەناری خۆشیا نایەت و
    بەربەستیش ناخوێنێتەوە
    لە هونەرمەندی بە سەلیقە گەڕێن
    بە هەر قەڵەم گرێک
    ئاوا تابلۆیەکی پشکۆیی دەکێشرێ
    من مەغزام لا لە هونەریی گرنگترە
    خۆمم لە ئاینەکەم پێ خۆشەویسترە
    چرای زەینم
    قەت قەت ناکەمە قوربانی
    تاریکیی دەستنووسێکی لە بڤەی بێ بنەما
    شاخی خۆشم
    بە تراویلکە بیابانییەکان ناگۆڕمەوە
Previous
Next