شێستوپێنجەم هاوبەند وێنانوسی پێشمەرگەی قۆناغی ڕزگاری نیشتمانی سەردەمی شاخ.. دڵشاد تاقانە

هاوبەندەکانی پێشمەرگایەتی..

براپێشمەرگە..

دەردەسەرەکی گرانتر لەپێشمەرگایەتی چونکە هەست و شۆڕشگێڕی پەروەردەی کردبوو بەڵام زۆر ئاشکرا و ناسراوی ناو گەنجان بوو هەرزوو زوو دەگیرا، دەگمەنە برا پێشمەرگە بووبی لێدان و کوتانت نەخواردبی یا چەند جار زیندانی نەکرابی! لەلایەکی دی ببووە خاڵی ئازاردانی پێشمەرگەکان هەتا وازبهینن و بێنەوە شار، بارگرانیەک بوو زیانی لەپێشمەرگە پێدەدرا. خۆی پێشمەرگایەتی ئاوازی سرودەکی بەجۆشی نیشتمانی بوو، خودەکی سەربەخۆی ئازادیوەر بوو کەچی براکانی لەخۆی زیاتر دەربەدەربوو چونکە لەناوشار و بەردەستی دوژمن بوو. زۆر برا پێشمەرگە لەجێی برایەکەی گولەباران یا هەڵواسرا زۆریشیان توشی دوژمنایەتی بوونەوە، لەوانەیە دەردەسەری زیاتری لەبرا پێشمەرگەکەی بەسەرهاتبی لەئەشکەنجەی دەروونی و جەستەیی. زۆربەیان کاری ڕێکخستنی ناوشاریان دەکرد بەویست و بێ ویست لەکورەی ئاگری شۆڕشەوە گلابوون ئەگەر نەشسوتابن هەردەبی داغکرابن.
سەرەتای هەشتاکانە و ڕەشبگیری ڕێکخستنەکانی شاربوو لەناویاندا مەریوانی کەریماغای نازەنینێ گیرا، هەرچەندە ئەوکاتە تەمەنی کەمتر لەهەژدە ساڵی بوو، بەهۆی بەشداری ڕێکخستن بەشیلاقە و زلە خزێندرایە بەندیخانە. پڕی بوو لەسیاسەتکارە شۆڕشگێڕەکان هەندەکیان یەکێتی، شوعی، بەشەک لەخۆڕاگیراو هەندێکیش لێیان سۆسیالیست بوون بەڵام لەوێ زیندانیەکان وەک سەرکردەکانی شاخ دژەیەک و براکوژ نەبوون بەڵکو هەرهەموویان پارێزەی گیانی یەکدی و و نهێنبەند بوون هاوئازار و ئەشکەنجەبوون. لەژوورەکی تەسک دیوارەکانی پڕ لەنوسین بوون چ لەوانەی ئازادکرابن، چ لەوانەی لەسێدارە درابن، لەپاڵیانەوە بەسەر دەرگاکە وێنەکی دوو قۆری حەسەن بەکر و سەدام حوسێن هەڵواسرابوو. ئەو وێنانە مەریوانی توڕەکرد یەکسەر چنگی لێگیر کرد پارچە پارچە دڕاندی! هەموو زیندانیەکان زراویان چوو لەسزاکەی گەیشتن خراپیان بەسەر دێ. لۆ بەیانی ئەمنە زیندانکارەکە هاتە ژوورێ دیتی وێنەکە نەمایە! پرسی: کا وێنەکانی سەیدولڕەئیس؟ کەس مەتەقی نەکرد و تەنانەت هەناسەش ڕاوەستابوو لەو چرکەدا، کەس نەیدەزانی چ ڕوودەدا! لەوکاتە کەچاوی هەمووان لەسەر ئەمنەکە و چاوەزەقەی ئەمنەکەش لەسەر هەمووان، مەریوان سمێرەختەی پێکەنینەکی کرد! ئەمنەکە جونی پێدا: لۆ پێدەکەنی کەلب ئیبن کەلب؟ مەریوانیش توند وەڵامی داوە: لۆخۆت کەلبی ئیبن کەلبی! ئەمنەکە دایڕسایە لێیدا بەڵام لەبن چنگیشی مەریوان لەباتی هاوار تەماشای هەمووانی دەکرد و بەدەم ئازارەکی قوتدراوە جارجارە زەردەخەنەی دەکرد! هەموو گۆتیان: نازانین وێنەمان نەدیتیە لەوانەیە ئەوانەی پێشمە لێرەبوون بردبیتیان. ئەمنەکە وازیهینا و ڕۆییە دەرێ. چابوو نەیزانی دوای دڕاندنی وێنەکە بەماوەکی زۆر یەک لەزیندانیەکان ئەسعەد هیرانی پارچە پارچەی وێنەکەی وەک بنیشت دەجووی و لە تی پەنجەرەکەی پشتەوە فڕێدەدا دەرێ هەتا دیار نەمینێ. دوای لێکۆڵینەوە زۆربەیان بەردران تەنیا مەریوان گیراوە و بردرا هەیئەی کەرکوکێ زیاتر ئەشکەنجە درا چونکە براپێشمەرگەبوو.

                                 دڵشاد تاقانە

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.