بێدەسەڵاتترینەکان.. شیعری کەنعان مەدحەت

درمەکە،
لە چڵەکانی هەرە سەرەوە
تەشەنەی مۆخ و ڕیشەی کردووە
فریشتەکان..
بە هەڵە مەجوون
بێدەسەڵاتترینەکانی، دەرهەق بە مافی خۆ،
خۆمانین،
خۆ،
خۆ….!

دوای بەر شەق دران و کەسایەتی سڕینەوە..
برینە هەوکراوەکانمان بە لەفافی، ئاشتیخوازانە..
بۆ ئەپێچن.
ڤالیۆم بۆ خەو
مەڵحەم و شروب بۆ چاکبوون
لە کۆڕی دڵدانەوەی بینەرانیشا
بە مەرجی لێخۆشبوون
تیکرا دەچڕین:
( – خوا گیرۆدەی لەمە خەراپترمان نەکا).

سەرەڕای سەپاندنی دەیان دەیان سزا و
فشار و ئیمبارگۆ و
چی و چیتر
پەپوولە و پاسارییەکانی
سەر چڵە دارەکانی ئەوبەرمان
خەریکی جووتبوون و
زاوزێ و
تێپەڕاندنی ڕابوردو و تاڵیی
ئەندێشەکانیانن….
گەدەیان پڕ،
زەوقیان لە جێ..
گاڵتەیان بە دابارین و هەڵکردنی
ڕەشەبا دێ.
ئەمانیش وەک تەم و شێی هەناسەسوار
ترپەترپی سوار
هەڵدەمژن.
بە ڕووبەڕوو بوونەوە و تەڕ
وەک وشک سووتان..
هەوڵ بە بەر گرتنی تروسکە دەدەن!
دەڵێین برسیمانە، برسی….!
نیگاری دوبەی و
باڵەخانە و میوانخانە و شەوخانەکانی هەولێر
لەسەر سفرە و سینیمانا دەکێشن.
دەڵێین لە پێستەوە بۆ ئێسک،
سەرما دایگرتوین!
پاشەکەوت نەکردنی، قرچەی هاوین
بە گوناحی مە دەزانن و
سزا دەدرێین..

هەر ئێستا،
ئا لەم ئیستگە دانپیانەنراوەدا دامگرن
ئەم لێخوڕە،
تراویلکە نەفەسانەی
زەین لە ئەژنۆ و شەل و نابینانا
کورت بین و
بێکەڵک و
بێحەد گەمژە و
کەمتەرخەمن….
بە پێ داگرتنی لەمەم زیاتر
شەڕی دونیا و قیامەت بە گەل دەفرۆشن!

کەنعان مەدحەت

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.