Skip to Content

بانگەوازی یەکەمین خولی پلان و سیناریۆی هەڵبژاردەی کورتە فیلمی “لاو” بڵاوکرایەوە

بانگەوازی یەکەمین خولی پلان و سیناریۆی هەڵبژاردەی کورتە فیلمی “لاو” بڵاوکرایەوە

Closed
by ئایار 9, 2021 Cinema, General

مەنسوور جیهانی ـ

بانگەوازی یەکەمین خولی پلان و سیناریۆی هەڵبژاردەی کورتە فیلمی “لاو” لە لایەن ڕێکخراوەی فیلمسازی “لاوان فیلمی موکریان” بە بەرپرسیاریی “ئیبڕاهیم سەعیدی” سینەماکاری بەرئەزموونی کورد لە شاری مەهاباد بڵاوکرایەوە.

ڕێکخراوەی فیلمسازی “لاوان فیلمی موکریان” لە پێناو ناساندن و بردنەسەرێی ئاستی سیناریۆنووسی ناوچەکە، هەوڵیداوە کە یەکەمین خولی پلان و سیناریۆی هەڵبژاردەی کورتە فیلمی “لاو” لە نێوان سیناریۆنووسانی پارێزگاکانی ئازەربایجانی ڕۆژئاوا و کوردستان بەڕێوەببات.

بابەتی سیناریۆکان، سەربەستن و کاتی ئەو بەرهەمانەی کە ڕەوانە دەکرێن، بە لانی زۆرەوە 15 خولەک ڕەچاوگیراوە و لە نووسەران و هونەرمەندان، داوا کراوە کە بەرهەمەکانی خۆیان تاکوو ڕۆژی 15ی جۆزەردانی 1400 هەتاوی (5ی جوونی 2021 زایینی) بە ناونیشانی ئیمەیلیlavanfilmfest@gmail.com ڕەوانە بکەن. جێی ئاماژە پێدانە کە سیناریۆی هەڵبژاردە، لە قۆناغی بەرهەمهێناندا پشتیوانی لێدەکرێت.

سیناریۆ و پلانەکان کە بە بڕوای ئەندامانی لێژنەی دادوەرانی ئەم ڕووداوە سینەماییە مەرجی پێویست و گونجاو و دیاریی کراویان هەبێت؛ لە پێناو باشتربوونی بەرهەمەکاندا، لە کارگەیەکی کارای سیناریۆنووسیدا لە ڕێکخراوەی فیلمسازی “لاوان فیلمی موکریان” بە ئامادەبوونی مامۆستایانی لێهاتوو و شارەزا بەشداریان پێدەکرێت.

ناونیشانی نووسینگە: مەهاباد، شەقامی سەرباز، نزیک بە سێ ڕیانی کەشناسی (وەفایی)، پلاکی 72، قاتی دووهەم، ڕێکخراوەی فیلمسازی “لاوان فیلمی موکریان”، ژمارە تەلەفوونەکانی نووسینگە: +9844-42239818و +989143421140.

ڕێکخراوەی فیلمسازی “لاوان فیلمی موکریان” لە پێناو ناساندن و بردنەسەرێی ئاستی سیناریۆنووسی ناوچەکە، بە ڕاگەیاندنی بانگەوازی یەکەمین خولی پلان و سیناریۆی هەڵبژاردەی کورتە فیلمی “لاو” بە بەڕێوەبەرایەتی گشتیی “ئیبڕاهیم سەعیدی” سینەماکاری ناوداری مەهابادی و بە هاوکاری و هاوڕێیەتی ژمارەیەک لە کارناسان و پسپۆڕانی شارەزای بوارە جۆراوجۆرە سینەماییەکان، چالاکییە هونەرییەکانی خۆی دەست پێکرد.

“ئیبڕاهیم سەعیدی” بەڕێوەبەریی ڕێکخراوەی فیلمسازی “لاوان فیلمی موکریان”، دەرچووی کارناسی سینەما لقی مۆنتێری لە زانکۆی سینەما تیئاتری زانکۆی هونەری تارانە کە زیاتر لە 35 ساڵە لە بوارە جۆراوجۆرەکانی سینەمادا سەرقاڵی چالاکییە و بە درێژایی ئەم ساڵانە مۆنتێری فیلمە بەرچاوەکانی سینەمای کوردستان و ئێرانی لە ئەستۆدا بووە، لەوانە: “پەڕینەوە لە غوبار”، “بیرەوەرییەکانی سەر بەرد” و “تاقیکردنەوە” لە دەرهێنانی “شەوکەت ئەمین کورکی”، “باز هم سیب داری؟” (دیسان سێوت پێیە؟)، “جن زیبا” (جنی جوان) و “سنگر روبەرو” (سەنگەریی ڕووبەڕوو) لە دەرهێنانی “بایرام فەزلی”، “ڕەشەبا” و “بووکی باران” لە دەرهێنانی “حوسێن حەسەن”، “انتهای زمین” (ئەوپەڕیی زەویی)، “از تهران تا بهشت” (لە تاران تا بەهەشت) و “یک کامیون غروب” (لۆرییەک ڕۆژئاوابوون) لە دەرهێنانی “ئەبوالفەزل سەفاری”، “دم سبح” (بەرە بەیان) لە دەرهێنانی حەمید ڕەحمانیان، “بی تابی بیتا” (بێتابی بیتا) لە دەرهێنانی “مێهرداد فەرید”، “عاشق ها ایستادە می میرند” (عاشقەکان بە پێوە دەمرن) لە دەرهێنانی “شەهرام مەسلەخی” و هەروەها “ماهی گوشوارەدار” (ماسی گوارەبەگۆ) لە دەرهێنانی “عەلیڕەزا سەعادەت نیا”.

ئەم سینەماکارە بەئەزموونە کوردە، مۆنتێری بۆ بەڵگەفیلمەکانی “خانە مادری ام مرداب” (ماڵی دایکایەتیم تاڵاو) و “از پس برقع” (لەو پەڕیی ڕووبەند) لە دەرهێنانی “مێهرداد ئۆسکویی” ئەنجامداوە و هەروەها مۆنتێریی و وێنەگرتنی بۆ زیاتر لە 150 کورتە فیلم و فیلمی بڵیند، بەڵگەفیلم و چیرۆکی لە کارنامەی هونەریی خۆیدا هەیە.

“ئیبڕاهیم سەعیدی” دەرهێنانی بۆ فیلمی سینەمایی “ماندوو”، بەڵگەفیلمی “دایکانی من” بەرهەمی هاوبەش لەگەڵ “زەهاوی سنجاری” سەبارەت بە کۆمەڵکوژی ئەنفاڵ بە دەستی ڕژێمی بەعس و کورتە فیلمەکانی “ژوان” و “ژیلەمۆ” و بەڵگەفیلمەکانی “شینگێڕیی پەرێشانی” و “ڕۆژگیران” بەرهەمی هاوبەش لەگەڵ “مێهرداد ئۆسکویی” لە ئەستۆدا بووە و بەم بەرهەمانە لە فێستیڤاڵە جۆراوجۆرەکانی فیلم لە ئاستی جیهاندا بە شێوەیەکی سەرکەوتوو بەشداریی کردووە و خەڵاتی گرینگیشیان بەدەستهێناوە.

بۆ زانیاری زیاتر:

لاپەڕەی فەرمی ڕێکخراوەی فیلمسازی “لاوان فیلمی موکریان” لە ئینستاگڕام:
@lavanfilm_institute

لاپەڕەی فەرمی “ئیبڕاهیم سەعیدی” لە ئینستاگڕام:
@ebrahimsaeedi_official

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish