Skip to Content

ژیان، نهێنییەکی گەورەی ناخمانە.. شیعر: سهراب سپهری وەرگێڕانی: پشکۆ ناکام

ژیان، نهێنییەکی گەورەی ناخمانە.. شیعر: سهراب سپهری وەرگێڕانی: پشکۆ ناکام

Closed
by May 19, 2021 General, Poems


” بە یادی هەمیشە زیندووی ئینسان پەروەر : عوسمان چێوار..”


——————


شەوێکی ئارام بوو،
چوومە هەیوانەکە تا لە خۆم بپرسم :
ژیان یانی چی..؟!
دایکم بە سینییەک چاوە
چەپکێ گوڵی لە زەردەخەنە
پێشکەش کردم
خوشکەکەم بە لەتێ نانەوە
هات و لەتەنیشت حەوزەکە دانیشت
باوکم دەفتەرێکی شیعری هێنا
پاڵی لێ یایەوە
شیعری جوانی خوێنەوە
و
منی بردە ئارامیی جوانی بێ گومانیی
بە خۆمم ووت :

ژیان ، نهێنییەکی گەورەی ناخمانە
ژیان ، نێوانی لەدایک بوون و مەرگمانە
ڕووباری دونیا وەک خۆی بەردەوامە
ژیان ، خۆشتنە لەو دەریایە
كاتی رۆشتنمان بە هەمان ڕووتیی
ئەو کاتەی کە هاتینە ناوەوە
دەستمان لەناو” لەپی دەست”ی ئەم ڕووبارە
بە دوای چیەوە بوو..؟!
هیچ …………………

ژیان قورسایی تێڕوانینێکە، کە لە یادەوەرییەکانا ئەمێنێتەوە

شایەد ئەم حەسرەتە بیهودەیەی لە دڵتایە
بکوژی بڵێسەی گەرمی ئومێدت بێ
ژیان درک پێ کردنی هەمان ئێستایە
ژیان پەرۆشیی گەیشتن
بە هەمان” سبەی”یە کە نایە..

تۆ نە لە “دوێنێ”یای ،نە لە سبەی
گەنجینەی ئەڕۆ . پڕە لە حزوری تۆ
شایەد ئەو خەندەیەی ئەمڕۆ دڵتەنگی کردی
دوا فورسەتی لەگەڵ ئومێد بوونا بێ
ژیان یادێکی سەیرە کە لە سینەی خاکەوە
لە جێ ی خۆی ئەمێنێ

ژیان ، سەوزترین ئایەتی ئەندێشەی گەڵایە
ژیان ، خەیاڵی دەریایانەی دڵۆپێکە
لە ئارامی ڕووبار
ژیان ، چرۆ کردنی بێستانێکە
لە باوەڕی تۆوی دانەوێڵەیا
ژیان ، باوەڕی دەریایە لە ئەندێشەی ماسیا
لە کاتی جێ تەنگیا
ژیان ، لێکدانەوەی ڕووناکی خاکە
لە ئاوێنەی عەشقا
ژیان ، تێگەیشتنی لێ حاڵینەبونەکانە
ژیان ، پەنجەرەیەکی کراوەیە بە ڕووی دونیای بوون” وجود ” ….

تا ئەم پەنجەرەیە کراوە بێ
جیهان بۆ ئێمەیە
ئاسمان ، نوور ، خودا ، عەشق
شادی بۆ ئێمەیە
فورسەتی بە کراوەیی مانەوەی
ئەم پەنجەرەیە بهێڵینەوە
ڕێگە لە نوور نەگرین
ڕێگە نەگرین لە ئارامیی پڕ میهرەبانی شنەی شەماڵ
پەردە لەسەر تەختی دڵ لابەین
بەڕووی ئەم پەنجەرەیەیا
بەپەرۆشەوە سڵاو بکەین
ژیان ، عادەتی خزمەت کردنە لە پێزانینەوە
قورسایی خۆشبەختی من ، قورسایی قایل بوونمە

ژیان ، شایەد شیعرەکە بێ کە باوکم خوێنیەوە
چای دایکم کە گەرمی کردینەوە
نانی خوشکم کە بە ماسییەکانی بەخشی
ژیان ، شایەد ئەو خەندەیە بێ کە دڵتەنگی کردم
ژیان ، لە نێوان دوو بێ دەنگیا
نەرمەگۆرانی ژێر لێوی پاک و بێگەردە
ژیان ، یادی لەدایک بوون و مەرگمانە
لەحزەی هاتن و ڕۆشتنمان ، لەحزەیی تەنیایی یە
من دڵم ئەیەوێ
قەدری ئەم بیرەوەریە بدۆزمەوە

“””””””””””””””””””’
31/3/2021

شیعر: سهراب سپهری
وەرگێڕانی: پشکۆ ناکام

Previous
Next