Skip to Content

پیاوێک لە ئاوریشم.. شیعری: ستیڤان شەمزینی

پیاوێک لە ئاوریشم.. شیعری: ستیڤان شەمزینی

Closed
by July 11, 2021 General, Poems

پیاوێکم لە رەنگی وەنەوشەیی خەونی مناڵێک
کە فەقیانەی هەموو ئازارەکانم کردۆتەوە و
لە باوەشی هەموو دەریاکاندا
مرواری عەشقم دۆزیوەتەوە
پیاوێکم لە ئاوریشم و
نەرمتر لە دڵی شیرەخۆرەم
عاشقتر لەو خۆرەتاوەی
پرچی سپی بەفر دائەهێنێ
سەوزتر لەو سنەوبەرە یاخییەی
کۆڵانی دووەمی عەقاری
پیاوێکم لەوەتی فامم کردۆتەوە
لە ناو کتێبدام و
خوێنم بووەتە حیبر و دڵم لاپەڕە و
جەستەم بووە بە چاپخانە
باڵای هەست و شیعرم
هەر رۆژەی گوڵە قەسیدەیەک ئەگرێ
پیاوێکم لە جنسی نەسیم و
خاوەنی دڵێکی سپی
وەک ئەو گوڵە سپییانەی کۆدەکانیان
هەر لای خۆمن و
لە شەبەقی هەر سپێدەیەکدا
بە دڵ بۆنیان پێوە ئەکەم
پیاوێکم بەو هەموو نەرمییەوە
وەک دڵۆپە ئاو
دڵی بەردیش هەڵدەکۆڵم و
گۆرانی بۆ چرای کوژراو
و رەزی سووتاو و کۆتری باڵشکاو ئەچڕم و
ماندوو نابم لە گەڕان
بەناو تونێلە تاریکەکانی عەدەمدا
بە مەبەستی دۆزینەوەی مۆمێکی دڵشکاو
پیاوێکم هەرچی فریشتەیە ئەمناسن و
چی دار هەنارە خۆشیان ئەوێم و
لەناو کپی و سکوندا
خەیاڵ بە دەنگ ئەهێنم
لە ناو جەنجاڵیشدا
ئایەتەکانی بێدەنگی ئەنوسمەوە و
لەناو قەفەزی ژیانیشدا
بولبول ئاسا ئاوازی ئازادیی ئەخوێنم
پیاوێکم سپیتر لە بەفر و
روونتر لە ئاوێنەی کچێکی شۆخ
پاکترم لە دامێنی مریەم و
بڵندترم لە لوتکەی چیا
سادەترم لە منداڵ و
میهرەبانترم لە پەری پرچ خاو
پیاوێکم بۆ کۆکردنەوەی وشە ئەژیم و
بۆ شیعر ئەمرم
لە ئازارەکانەوە جوانی هەڵدەهێنجم و
لە خەیاڵەکانەوە کانیاوی ئەوین هەڵدەقوڵێ
لە بیابانی فیراقەوە
پەیامی خۆشەویستی و
پێغەمبەرایەتی خۆم ئەنێرم

Previous
Next