Skip to Content

بە ڕووتی لەبەر بارانی لەزەتدا.. سەڵاح شوان

بە ڕووتی لەبەر بارانی لەزەتدا.. سەڵاح شوان

Closed
by August 3, 2021 General, Poems

دە ببارێ
دە ببارێ
تەنیا لەبەر بارانا دەرگاى
ئەم گەردوونە دێمەرۆیەم لە ڕوودا دەكرێتەوە
چ شیعرێكە سووتێنراوە
وا ئەمشەو بۆچڕووك دنیای داگرتووە
چ غه‌مێكە بەڕەڵڵای ئاسمان كراوە
وا ئەمشەو سایەقەی سەهەنگ
دەرگاى دۆزەخی بەستووە
دە ببارێ
دە ببارێ
با ماسی ماسوولكەكانم لەبرسانا
بەچكەكانی خۆیان نەخۆن
با كەفوكوڵی شیلاوگە و باراناوی
ئارەزووە نەمرەكانم
وشكە چەمی گوناھ بشۆن
دە ببارێ
دە ببارێ
دەزانى خوا لە بارانا
وەك چۆلەكەی سەرمابردوو
خۆی دەهاوێتە كۆشمەوە و ئاگام لێیە
دڵی لەناو دەستما لەسەرخۆ لێدەدات
دە ببارێ
دە ببارێ
تەنیا لەبارانا لەشم
ڕیشە لەناو لەشی نەرمی ئەمشەوەدا دادەكوتێ و
گەڵاكانم
لەناو بڵاچەی تەڕیدا
سوور دادەگیرسێن و بەدەم
هەناسەی تێكەڵبوونەوە
هەڵ دەبن و
هەڵدەچن و
دانامركێن
باران بانگ و خۆڵەمێشی زیندووبوونەوەی لاشەمە و
چاوهەڵهێنانى نەرگزی خەونەكانمە
باران گیانى ئاوداری گشت قەڵەشە ناسكۆڵەكانى
كچۆڵەی ئەم سروشتەیە
كە دەمشواتەوە دەزانم
چۆن بەناو ئاوەڕۆكانیا دابڕژێم و بچمە خوارێ
با چەخماخەت پەریی نەباڵقی شەبەق بێت و ئەمشەو
ختووكەی هەتاوم بدات
خۆم دەزانم
چەند دڵداریم لەگەڵ كچۆڵەی پاراوی
دەمەو باراندا كردووە
چەند مانگ حەزی لە مەلەی ناو
گۆمێكی شەو بەسارەیە
ئەوەندەش گۆم حەز لە لەشی
ڕووتی مانگ دەكات و كەچی بێدەنگیشە
دە ببارێ
دە ببارێ
تەنیا لە بارانا چرۆ
مەمكەكانى دەردەهێنێت و بە ڕووتی
سەما دەكات
ئەگەر نەبارێی ناتوانم
گوێ بۆ دەنگی دەنكە گەنمەكانى ناو خاك هەڵبخه‌م و
پەنجە بخه‌مە ناو لەپی بچكۆڵانەی ڕەگەكانیان
ئەگەر نەبارێی ناتوانم
لەشم تێكەڵ
بە لەشی ئاوداری ئەم گەردوونە بكەم
دە ببارێ
دە ببارێ
تا دەتوانى لەناو گیانمدا ببارێ
تا بۆ تاقە ساتێكیش بێت
چاو هەڵبهێنم و بتوانم
تێكەڵ بە قژە تەڕەكەی
جوانە ژنی ئەم ساتەی خۆم
ببم و بەسەر سینەیدا
وەكو چوڕی شیر
دڵۆپ دڵۆپ بێمە خوارێ

1977 بەغدا

Previous
Next