پارچه‌كانم كۆكه‌نه‌وه … ستار ئه‌حمه‌د
كاتێك بارزان
كێشی سووری
لەزامی چیا دەبەست و
گەرمیان رێرەوی مێشوولەی
هەڵدەپاچی
خۆرئاوا خۆری
لەبەژنی سەحرا دەبەست
خۆرهەڵات دەبووە سایەی
مێرگەكان و
سەگی هۆڕی پێ دەناسین
شا بۆ قوربانی جەژنەكان
لەڕێی چاوڕەشەكانی خواروو
بەقەد لقی دارخورماوە
هەڵی واسین
نازانم گەر بیرتان مابێت
سنوور تەلبەندی كەناری و
كۆتری خۆزگەی كوێستان بوو
نانی دەمی كۆرپەكانمان
گلێنەی برژاوی شێخ سەعیدو
جەرگی قازی قارەمان بوو
لەتەنها وەرزێكی سوورا
ئەوەبوو كۆرپەی مەهاباد
چاوی ئازادی هەڵهێنا
ئبتر كێچ كەوتە كەوڵی فارس و
دەرپێی كوناوی ئابڕوویان
لەپێی ئافرەتی عەرەب كرد
ویستیان كوڵوانەی گردەمەند
پڕ لەژاری ستەم بكەن
سەری لوتكەیان داپاچی
ئامێزی چیایان هەڵكۆڵی
هەڵەبجەیان
لەبۆنی سێوا غەرق كردو
باشوریان گواستەوە باكوور
گارەیان هێنا بۆ زۆنكاو
دوكان خوناوی دەنۆشی
سیروان بۆ قومێك با خنكا
سەربەستیان لەبار برد
بۆ جووت بوونێك
كەوتنە گیان یەك
هێندە مەراقی پەڕین بوون
ردێنی چقڵیان دەرهێنا
دوو وڵاتی چڵ برژاویان
خنكان لەنێو دەریای خوێنا
بەمەش پارچەیەك لەجەستەم
كونی تێكەوت
خاكم پڕبوو لەخوێن و نه‌وت
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
