Skip to Content

ژنێكی پڕ پڕ له‌ درۆم.. چنوور نامق

ژنێكی پڕ پڕ له‌ درۆم.. چنوور نامق

Closed
by September 6, 2021 General, Poems


له‌رۆژێكی وه‌ك ئه‌مڕۆدا
پێش هه‌زار ساڵ
چیتر
نه‌متوانی گوڵه‌كان ئاوده‌م
بومه‌ ئینجانه‌ی چوار ته‌مه‌ن بۆ ژاكانیان
لێوم بۆ هه‌ر باده‌یه‌ك برد هه‌ر گاڵته‌جاڕ بوو وه‌رزی دڵ
شه‌كره‌ زه‌قنه‌بوته‌ لێوم كه‌ ناتوانم
تامی ماچه‌كان بكه‌م و
نزای ئه‌وین بمباته‌وه‌ بۆ كۆشی خۆی
ئه‌ی بۆ بمبا؟
كه‌ نه‌متوانی ببم به‌ژنێكی زانا له‌ واڵاكردنی ده‌رگاكان بێ‌ ته‌قه‌ته‌ق
كه‌ نه‌زانبووم له‌ ئاودێریی شتڵه‌كانی تامه‌زرۆیی
له‌هه‌ڵدانی ریزه‌ ماچه‌كان له‌ بادا…
ئێستا خۆم ئه‌توانم بڵێم
له‌شاری دڵ فاشیلترین ژنی ئه‌م مێژووه‌ سه‌رسپییه‌م،
هیچ
كتێبێكی عه‌شق نه‌ما پیاسه‌ی بێ‌ مه‌یلیی تیانه‌كه‌م
به‌بێ‌ ئه‌وه‌ی توانام هه‌بێ‌ نۆته‌ سوره‌كانی ئه‌وین وه‌رگێڕمه‌ سه‌ر زمانه‌كانی په‌پوله‌
به‌بێ‌ ئه‌وه‌ی بوێریكه‌م چه‌پكه‌ گوڵێك بده‌مه‌ ده‌ستی یاره‌وه‌
هه‌زار ساڵه‌ له‌ قوتابخانه‌كانی ئه‌وین له‌ پۆلێكم
له‌دایكمه‌وه‌ بۆم ماوه‌
ترس
خورپه‌
پێنه‌كه‌نین
هه‌زار ساڵه‌ فێری ته‌قوی و تاعه‌ت ئه‌كرێم،
ژنێكی نه‌وێری به‌ر باران چۆن ئه‌توانێ‌ په‌ڵه‌ بدا؟
چۆن ئه‌توانێ‌ به‌ته‌ماشا هاتوچۆی هه‌وره‌كان راگرێ‌؟
چۆن ئه‌وێرێ‌ ئه‌ستێره‌كان بگرێت به‌ده‌سته‌كانیه‌وه‌؟
چۆن ئه‌توانێ‌ شه‌پۆله‌كان به‌گیر بێنێ‌؟
زه‌نگ
ده‌نگ
هێڵی سوور و
فرمانه‌كان
مه‌كه‌ و
مه‌ڕۆ
هه‌زار ساڵه‌ شێتم ئه‌كا
هه‌زار ساڵه‌ گریان ژیرم ئه‌كاته‌وه‌ و به‌خۆی ئه‌گری
ژنێكی پڕپڕ له‌ درۆم
له‌ نمایشی هه‌تاییدا وا وشك ئه‌بم
هه‌زار ساڵه‌ پێكی ترساو هه‌ڵئه‌ده‌م و له‌ پۆلی ئه‌وین قوتابیم
به‌بێ‌ ئه‌وه‌ی چه‌پكه‌ گوڵێك بده‌مه‌ ده‌ستی یاره‌وه‌
به‌بێ‌ ئه‌وه‌ی بوێریكه‌م
وشه‌ی عه‌شق وه‌رگێڕمه‌ سه‌ر زمانه‌كانی باڵنده‌
به‌بێ‌ ئه‌وه‌ی توانام هه‌بێ‌
ماچێك له‌ بادا هه‌ڵبده‌م……


٥-١١-٢٠٢١

Previous
Next