وەرزە سەوزەکانی ئەوین.. وەرزی دووەم.. شیعری: ستیڤان شەمزینی
بیرم دەکردەوە ماڵێکت بۆ چی بکەم
لە تەنیشت تیشکی خۆرەوە
بیرم دەکردەوە ژوانێکت لەگەڵ ببەستم
لەژێر لافاوی بە جۆشی ماچەوە
****
تەنیاییەکانم پڕن
لە تەمی رۆژانی سەرمەستیم
بە عەشقی بێ بنی تۆوە
تەنیاییەکانم خاڵین لە خۆم
وەختی بوومە پوشێ
بەدەم زریانی شێتی ئەوینتەوە
****
رۆژێک دێ لات نابم، بەڵام بانگم بکە
لە بری من شیعرەکانم وەڵامت ئەدەنەوە
شەوێک دێ بووبم بە غوبار، بەڵام بانگم بکە
لە بری من ئەستێرە ئاوڕ ئەداتەوە
****
ئازیزەکەم دوێنێ من دێوانانە هاتم
ئەوە تۆ بوویت دەرگاکەت داخستبوو
سبەی تۆش قەرەجانە بەرەو لام دێی
ئەوە منم
تەمی نێو دەفتەری بیرەوەرییەکانت
****
تۆ دەڕۆیت
ئەوە منم نیگا ئاگراوییەکانت
لە چاوەکانمدا بۆ ئەبەد هەڵئەگرم
تۆ دەڕۆیت، ئەوە منم بە چوارمێخەی
ژان و فرمێسکەوە لە خاچ ئەدرێم
****
بە رووبارم گووت، پێناسەت بکات
گەرووی وشک بووەوە و هیچی بۆ نەوترا
بە هەورم وت، پەسنی میهرەبانیتم بۆ بکا
زمانی لاڵ بوو بە هەناسەبڕکێوە گریا
****
کتێبی پیرۆزی عەشقم چەندان جار خەتم کرد و
لە هەموو دێڕێکدا خۆم بە کوژراویی بینییەوە
خونچەیەک بووم، ئەوینت وەک گەڵایەکی زەرد
دامی بەدەم هەڵمەتی شێتترین رەشەباوە
****
وا نەزانی کانگای شیعرم وشک ئەبێت و
دڵی دیوانەکانم ئەوەستێ
پەیمانم بە شیعر داوە، تاکو تۆ هەبیت
پرچی تەڕترین هۆنراوەت بۆ دابهێنم
****
من و تۆ، لە پەرستگای گەڵاڕێزاندا
نوێژمان بۆ پایز دەکرد
بەڵکو پێکەوە هەڵمانوەرێنێ
من و تۆ، لە پەرستگای باراندا
کڕنووشمان بۆ بەهار ئەبرد
بەڵکو لە ئامێزی یەکترا سەوزمان بکاتەوە
****
ئەو عەشقەی تۆ وای کرد
مەیخانەکانم خۆشبوێ و
سەرم بۆ هەمیشە بە ئەوینت مەست بێ
ئەو عەشقەی تۆ وایکرد شیعرم خۆشبوێ و
رۆحم بۆ تاهەتایە لە کۆڵانی بەیتێکا بزر بێ
****
