Skip to Content

خەرەندی خەم.. شەماڵ بارەوانی

خەرەندی خەم.. شەماڵ بارەوانی

Closed
by November 17, 2021 General, Poems

لێرە
هەموو شتێک بۆنی بێزاری دەدات
و
خەونەکان بەمنداڵی سەردەنێنەوە

لەم تاراوگەیەی ڕۆحدا
هەڵوەرین بووەتە مەوسمی تەمەنم
و
شەو نییە جانتایەک بێتاقەتی کۆنەکەمەوە

لەم نیشتمانەی غەریبیدا
بۆهەر ڕێگایەک دەڕۆم
دەڕواتەوە سەر خەرەندی خەم
و
کامە وەرزی ساڵ بپۆشم
ڕەنگی پایز و بۆنی نامۆیی دەگرێت

ئەفسووس
لەو مەوتەنەی تەنیاییدا
درەختی بەختم
جگە لەهێشووی ئازار
چیتری لێ ناڕوێت

هەوری چاوەڕوانیم
جگە لە فرمێسکی دابڕان
هیچ ویساڵێک نابارێنێت

لێرە بەهار بەنیوەچڵی جێمان دێڵێت
و
ئاواتەکان زوو دەکوژێنەوە

ئێرە مەملەکەتی هەنسک و ژانە
ئێرە دوورگــەی دڵشکـانــە!

Previous
Next