یەکێتی قومبەلەی ژێر ماڵی کورد.. ئومێد محەمەد فەرەج

یەکێتی نیشتیمانی کوردستان، لەسەرەتای دروستبوونییەوە بۆتەنها ئامانجێکی سەرەکی دروستبوو، ئەویش تێکدانی ناو ماڵی کوردبوو. هەربۆیە لەژێر سەرپەرشتی ڕاستەوخۆی وڵاتانی دووژمنی کورد دروستبوو وە لەدیمەشقی پایتەختی سوریای عەڕەبی دروستبوو، کە سوریا یەکێکە لەم وڵاتانەی بەدوژمنی کورد هەژمار دەکرێت و ئامانجی کورتخایەن و درێژخایەنی هەیە بۆ نەهێشتنی کورد، ئاسانترین ڕێگەش ئەوەیە کە ئامانجەکانی بە کوردە ناپاک و خۆفرۆشەکان بپێکێت، ئەوکاتیش لە جەلال تاڵەبانی و برایم ئەحمەد گونجاوتری نەدۆزیەوە، تەبعەن ئەوەی ئەیڵێم بۆ وڵاتانی عێڕاق و تورکیا و ئێرانیش ڕاستە، ئەوانیش دوژمنی کوردن و بەردەوام هەوڵیان داوە بەدەستی کورد ناوماڵی کورد تێکبدەن. جا ئەگەر چاوێکی خێرا بگێڕینەوە بەمێژوودا دەبینین سەرەتای دروستبوونی یەکێتی بەسەرپەرشتی سوریا بوو وە بۆ ئامانجی لێدانی شۆڕشی کوردیی ئەوکات دامەزرا، پێشتریش جەلال تاڵەبانی و برایم ئەحمەد ناپاکیان لەشۆڕشی کورد کردو لەساڵی ٦٦ تەسلیم بە دەوڵەتی عێڕاقی دوژمن بونەوەو تاڕادەیەک شکستیان بەشۆڕشی کورد هێنا. دواتریش لە حەفتاکانەوە هەتا ساڵی ٩١ دەیان جار شەڕی ناوخۆو براکوژیان ئەنجامداو هیچ حیزبێکی کوردی نەما کە شەڕی لەگەڵ نەکەن. دواتریش دیسان لەساڵی ٩٤ تاکو ٩٨ شەڕێکی کوشندەی ناوخۆییان هەڵگیرساند کە تێیدا ٣٦ هەزار گەنجی کورد کوژران، کە هەڵگیرسێنەری ئەم شەڕە یەکێتی بوو چونکە لە هەڵبژاردنی پەڕلەمان دۆڕاو پارتی دیموکڕاتی کوردستان ببوو بەهێزی یەکەم. دواتریش لەساڵی ٢٠٠٠ دیسان شەڕێکیتری خوێناوی براکوژییان لەگەڵ پەکەکە هەڵگیرساند، ڕاستی ئەگەر خیانەتەکانی یەکێتی بژمێرم سەدان لاپەڕەم پێویستە، بۆیە تەنها دواهەمین خیانەتی مەزنی یەکێتی بیردێنمەوە، کە ئەویش ١٦ی ئۆکتۆبەر بوو لە ٢٠١٧ کە خەنجەرێکی ژەهراوییان دا لە پشتی کوردو نیوەی خاکی کوردستانییان هەرزانفرۆشکرد، گەیشتە ئەوڕادەیەی کە ناوییان نا لە یەکێتی نوسینگەی فرۆشتنی زەوی و زاری نیشتیمان.
ئەگەر بگەڕێینەوە بۆ شەڕی ناوخۆی پێشوتری یەکێتی و پارتی تاڕادەیەک ئەوەی زامنی ڕاگرتنی شەڕی ناوخۆبوو ڕێککەوتنی ستراتیجی نێوان یەکێتی و پارتی بوو، بەڵام چەند ھۆکارێک هەبوو کە بەھۆیانەوە رێککەوتننامەی ستراتیجیی پارتی دیموکراتی کوردستان و یەکێتیی نیشتمانیی کوردستان کۆتایی ھات.

یەکێتی خیانەتی لە پارتی کرد، بۆیە رێککەوتننامەکەی نێوانیان کۆتایی ھاتووە. ھەروەھا لە٢٠١٨ فواد حوسێنی کاندیدی پارتی بۆ پۆستی سەرۆک کۆماری عێراق، بەھێزتربوو لە د.بەرھەم ساڵحی کاندیدی یەکێتی، بۆیە ئەوکاتەی ململانێیەکی توند هەبوو لەنێوان ئەم دوو کاندیدە بۆ وەرگرتنی پۆستی سەرۆککۆمار، ئەوسا یەکێتی ھەوڵیدا بە ھێرشکردنە سەر ژیانی تایبەتی فواد حوسێن و ویستی کەسایەتی بشکێنێت، هەروەها یەکێتییەکان ئەوکات وتیان ھاوسەری فواد حوسێن جوولەکەیە و پرسیاری ئەوەیان دەکرد، کە ”ئایا ھاووڵاتییانی عێراق قەبوڵ دەکەن خانمی یەکەمی وڵاتەکەیان جوولەکە بێت؟ ئەمە لەکاتێکدایە ھاوسەری قوباد تاڵەبانی سەرۆکی ئێستای یەکێتی کچی ملیاردێرێکی جوولەکەیە و لایەنگرێکی سەرسەختی ئیسرائیلە.
ئەم هێرشانە تاڕادەیەک کاریگەری خراپیان هەبوو لەسەر کاندیدی پارتی، بەڵام لەئاستی جەماوەریی و سیاسیی یەکێتی گەڕایەوە دواوەو بەپێچەوانەوە ئاستی جەماوەریی و سیاسیی پارتی فراوانتر بوو.
خیانەتی یەکێتی لە پارتی، کە لە چەند بارێکدا ئەنجامی داوە، لەوانە، ھاوکاریکردن و داواکردنی یەکێتی لە حکوومەتی عێراق بۆ بڕینی بەشەبودجەی کوردستان. رادەستکردنی کەرکووک بە میلیشیاکانی حەشدی شەعبی…. ھەستکردنی پارتی بەوەی بە بەردەوام بوون لە رێککەوتننامەی ستراتیجی، یەکێتی لەو تاوانانە پاک دەکاتەوە کە وەک ”غەدرێکی سیاسی“ لە بابەتی ڕیفراندۆم و کێشەی کەرکووکدا کردی.
هەر کەسێک یاداشتەکانی سەرکردە و بەرپرسە باڵاکانی یەکێتی خوێندبێتەوە، تێدەگات کە یەکێتی لەوەتەی دروست بووە ، هێزێک بووە دژی یاسا و دادپەروەری و حوکمی قانون بووە، چونکە وەک هێزێکی سەرلێشێواوی توندڕەوو چەپڕەوی سەر بە قوتابخانەی ستالین، بەکوشتن و تیرۆر و تۆقاندن حوکمی کردووە . بەشی زۆری ئەو تیرۆر و تۆقاندنەش یەکەمجار ئاراستەی ئەندامەکانی خۆی کردووە بۆ ئەوەی ملکەچی خۆیان بکات و چاوترسێنیان بکات . ئینجا ویستویانە سیاسەتی شەڕانگێزانەی خۆیان بە سەر حیزب و لایەنەکانی تردا بسەپێنن.
کوشتنی دەیان کادیر و سەرکردەی یەکێتی و خەڵکی دیکە لە شاخ و شارەکان کە یەکێتی مەفرەزەی تایبەتی تیرۆری هەبوو ، پەڵەیەکی ڕەشن لە مێژووی خوێناوی ئەو حیزبەدا . مرۆڤ تەنیا یاداشتەکانی نەوشیروان مستەفا و مەلا بەختیار بخوێنێتەوە تێدەگات مێژووی ئەو حیزبە چەند خوێناوییە و چەند پڕە لە شەرمەزاری .
لە دوای ڕاپەڕین و لە کاتی شەڕی ناوخۆشدا ، خەڵکی هەولێر و ناوچەکانی تری بندەستی یەکێتی ، حوکمی قەرەقۆشییانەی ئەو حیزبەیان هەر لە یاد ماوە کە کوشتن و تاڵان و بڕۆ وەکو ئاوخواردنەوە بووە بۆ چەکدار و بەرپرسانی ئەو حیزبە.
لە چەند ساڵی ڕابردووشدا ئیرهابێکی بێ وێنەیان بەرامبەر خەڵکی سلێمانی پەیڕەو کردووە و ئەوەی حیسابی بۆ ناکرێت دادگا و یاسایە .چونکە جیا لەو تاڵان و بڕۆ و قاچاخچیەتیەی لەدەروازە سنوورییەکانی سلێمانی دەکرێ کە هەر شەوێک بۆ یەکێک لە سەرانی خۆفرۆشی شازدەی ئۆکتۆبەرە،
ڕۆژ نییە دەیان تاوانی کوشتن لەسنوری سلێمانی ڕونەدات. کوشتنی كاوە گەرمیانی و ئامانج بابانی و لانەی خێزانی و پاسەوانە تایبەتەکەی مام جەلال و تەسلیم کردنەوەی مستەفا سەلیمی و كوشتنی خۆپێشاندەران و دواهەمینییان لەم مانگی ١١ی ٢٠٢١ بوو کە فەرماندەیەکی گەورە بە پلەی عەقید بەناوی موراد کانی کوردە لەلایەن جەللادەکانی باڤڵ تاڵەبانیی کوژرا، ئەمانەو دەیان تاوانی دیکە بەشێکن لە تیرۆر و تۆقاندنەکانی تاقمە دەستەڵاتدارەكەی یەكێتی كە ئێستا لەسەر كەیسی حوکمدراوان موزایەدەیەکی پووچ و بێ مانا دەكەن.
مەکتەبی سیاسی یەکێتی تەنیا ناوێکی بێ دەسەڵاتە و بڕیاردەری یەکەم و کۆتایی سەرانی خاکفرۆشی شازدەی ئۆکتۆبەرن کە دڵنیاین ئەگەر واز لە سیاسەتی شەڕانگێزانەی خۆیان نەهێنن، یەکێتی بەرەو هەڵدێر و کارەساتی گەورە دەبەن. تەبعەن کە کەمێک لەخراپەکانی یەکێتی باس دەکەم، ئەوە بەو مانایە نییە، کە پارتی فریشتەیەو یەکێتی شەیتانە، ڕاستی هەردووک حیزب خراپن و خراپترن لەخراپیی، بەس لێرەدا باسەکەی من بەس لەسەر یەکێتی بوو.

ئومێد محەمەد فەرەج

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.