Skip to Content

رازەکانی ئەوین و هەناسەکانی دەریا.. تێکست: ستیڤان شەمزینی

رازەکانی ئەوین و هەناسەکانی دەریا.. تێکست: ستیڤان شەمزینی

Closed
by January 10, 2022 General, Poems


رازی دووەم

لە ئاسمانی دڵی ئەم شاعیرەدا کڕێوەیە
بەفر ئەبارێت سوور سوور
هەروەک خوێنی ئەو عاشقانەی
بە وشەی خۆشم ئەوێی
ئاگر لە جەرگیان هەڵایسا
لە بەیتەکانی ئەم شاعیرەدا رەهێڵەیە
باران ئەبارێت بە لێزمە
هەروەک فرمێسکی ئەو عاشقانەی
لە دووری یەکتر
دەریای ئەسرینیان شەپۆل ئەدا

بە چاوی دڵ ئەتوانم بتبینم
ئەو کاتەی لە پەنجەرەی خەمەوە
ئەڕوانیتە تابلۆی خۆرەتاو
ئەو ساتەشی دەرگای ئومێد
بە رووی زامە سەرمەدییەکاندا دائەخەیت
بە زمانی رۆح ئەتوانم بتدوێنم
ئەو کاتەی لەناو کەشتیی خەیاڵدا
گۆرانییەکی کۆچەریی ئەچڕیت
ئەو ساتەشی بەدەم بای شەماڵەوە
لانکی ئارەزووەکانم رائەژەنیت

ئەبێت بڕۆم
بە شەمەندەفەری دڵتەنگی و
لەگەڵ کاروانی خەمدا
چونکە باڵندەی دڵم هێندە تەزیوە
لە تەنوری ئەوینی تۆدا نەبێت
لە پەنا هیچ ئاگردانێکدا گەرم نابێتەوە
ئەبێت بڕۆم
بە ئەسپە شێکەی شیعر و
هەر خۆم و خەیاڵە سەرابییەکانم
چونکە کەشتی ئەو هەموو دوورییە
لە سۆمای چاوی تاوسیتدا نەبێت
لە هیچ کەنارێکی تردا لەنگەر ناگرێت

بۆ هەر کوێ بڕۆم
ئازارێک لە دابڕان بە سوێتر ئەمناسێتەوە
زریکەی پایزێک ئەمگرێتە باوەش
رووبارێکی سەرخۆش سڵاوم لێ ئەکات
رەشەبای مەراق سۆراخم ئەکات
بۆ هەر کوێ بڕۆم
تەشی خەمێکی قووڵ ئەمڕێسێت
لافاوی غوربەت پوشی رۆحم ئەبا
کێردی تاریکی لە رووناکییەکەم ئەچەقێ
ئەژدیهای تەنهایی قووتم ئەدات
ئیدی بۆ ئەهێڵیت بڕۆم؟

ئازیزم بیرتە سەردەمانێک
ئاوم ئەژەنی کاتێک دەریا بووم
ئەستێرەم لە باوەش ئەگرت
کاتێک ئاسمان بووم
شەڕم لەگەڵ مەحاڵ ئەکرد
کاتێک عاشقت بووم؟
ئازیزم بیرتە سەردەمانێک
بە قەڵەمی تریفە شیعرم ئەنووسی
کاتێک مانگ بووم
بە دەنگی کازیوە سترانم ئەوت
کاتێک خۆر بووم
بە گژ قولەی قافی نەریتدا ئەچووم
کە شمشێری عەشقی تۆم بەدەستەوە بوو

تەنها ئەوەندە دەرفەتم بدەرێ
رۆحم بە شەونمی ماچەکانت تەڕ بکەم
دەستم بخەمە هەوری سینگتەوە و
لەژێر بارانی چاوەکانتدا بخوسێمەوە
تەنها ئەوەندە دەرفەتم بدەرێ
گوێم پڕ بێت لە خوڕەی مۆسیقای دەنگت
هەناسەم تێکەڵ بە شەپۆلە پەمەییەکانی
ئۆقیانووسی ئارەزووت بکەم و
لە فیردەوسی لەشی رووتتدا
بە نەمریی بمرم!

نامەت بۆ ئەنووسم
نامەیەک بۆنی نێرگزی زوڵفتی لێ بێت
نامەیەک تامی هەنگوینی رامووسان بدا
نامەیەک لە نێو هەر حەرفێکیدا
حەزێکی شێتانە خۆی تیا مەڵاس دابێت
نامەم بۆ بنووسە
نامەیەک بۆنی سنەوبەری لەشتی لێ بێت
نامەیەک تامی شیلکی باوەشت بدا
نامەیەک لەنێو هەر حەرفێکیدا
خۆزگەی لێکئاڵان شاڵاوم بۆ بهێنێ

دەرگاکەت دامەخە
بە رووی ئەو شیعرانەی
لە دوورگەی پڕ برینی عەشقەوە دێن
بە رووی ئەو “با”یانەی
لە رۆژهەڵاتی سینگمەوە هەڵدەکەن و
کەشتییە چارۆگەدارەکانی تۆ
بە هێمنی بە دەریای شیعردا دەئاژون
دەرگاکەت دامەخە
بە رووی ئەو نەسیمە سپییانەی
ئەیانەوێت رەنگی رۆژە رەشەکانت بگۆڕن
بە رووی ئەو فانۆسە رووناکانەی
خوێنی من نەوتیانە و
لە نیگا سیحراوییەکانتدا دائەگیرسێن

پێم بڵێ ئێستا تۆ لە کوێی؟
ئەی خەونە ماڵییەکەی شەیدای سەفەر
ئەی پاسەوانی هەسارەی تیشک
ئەی گوڵە ئومێدی زەمەنی ئافات
پێم بڵێ ئێستا تۆ لە کوێی؟
ئەی تەزیوترین باڵداری نیشتمان
ئەی جادووگەری بەنازی دڵ پڕ لە پشکۆ
ئەی گۆڕهەڵکەنی تەرمی تەنهایی

لەسەر لاپەڕەکانی یادەوەریی بنووسە
من وەک باران دڵی شاعیرێکم خوساند
من بووم گوڵەکانی خۆم
لە ئینجانەی چاوی شاعیرێکدا رواند
منم تۆوی میوەی لەزەتم
لە مەزرای دیوانی شاعیرێکدا چاند
لەسەر لاپەڕەکانی یادەوەریی بنووسە
شاعیرێک هات لەسەر بەرماڵی ژوان
فێری نوێژی عەشقی کردم
شاعیرێک هات بە هاڵاوی نیگا
بەستەڵەکی غروری هەڵپڕوکاندم
شاعیرێکم ناسی بە لێوی شیعر
شیلەی خوماربوونی هەڵقوڕاندم

Previous
Next