Skip to Content

غەریزەی ژنبوون.. شەماڵ بارەوانی

غەریزەی ژنبوون.. شەماڵ بارەوانی

Closed
by January 12, 2022 General, Poems

هێشتا
زمانی زەمەن
هێشووی گڕوگاڵی نەگرتبوو
و
خوداوەند سەبارەت
بەخەڵقکردنی پیاو
لەمەلەلدابوو

هێشتا
بیگ بانگ ڕووی نەدابوو
و
ژیان لەمناڵدانی ئەزەلدابوو

بلیتی عەورەت
بۆ یەکەم ئافرەت بڕا
و
مەوسمی ژنبوون
بەتەلیسمی تاوان
قفڵ درا

هەزاران ساڵ بەر لەسوقرات
ژەهریان
کرد بە پەرداخی چارەنووسی
ژنەوە
و
دەیان قەڕن بەر لەمێژوو
لەلایان ئاپۆڕایەک
تاریکیەوە فەزای ژنبوون
بە دڵۆپێک شەڕەف
پێناسەکرا

ئۆه خودایە
ئەوە چ سێوێک بوو
ژنی پێ خەتابار
کرا

لێرە
فەسڵ فەسڵی سمێلە
و
هەر سمێڵە چرۆدەکات

ڕۆژ نییە
دنیایەک شەتڵی حوزن
لەپێدەشتی ڕۆحی ژنا
نەڕوێنن
و
ژمارەیەک غەریزەی ژنبوون
نەخنکێنن

شەو نییە
لەشکرێک گۆچان لەدایک
نەبێت
و
زەمبیلێک خەندەی
ژن بێ سەرو شوێن نەکرێت

لێرە
ڕەگی ژنبوون دەچێتەوە
سەر نەسەبی خەتاو
هەر ڕەنگی ژنە درز دەبات

هەر دڕکی گۆناهەو
لەدەڤەری ژن پێدەگات
و
هەر قامچی شەڕەفە و
بەڵاماری خەونەکانی ژن دەدات

هەر مینتاڵێنتی خێڵەو
بە فێمێنزم بووندا
هەڵدەشاخێت
و
هەر سێدارەی سمێڵە
لەبەرامبەر ئازارەکانی ژن
ختکەدەکات

هەر پروشەی فرمێسکەو
لە هەواری ژن دادەکات

هەر
منارەی مەعبەدەو
بەسەر لۆژیکی ژندا
دەڕمێت

هەر
قوڵبی گریانی
ژنەو
بەسێدارەی نەریتەوە
هەڵدەواسرێت

هەر گۆزەی ژنەو هاڕەدەکات

هەر شکانەو لەسەر باڵی زوربای ژن
چرۆدەکات

هەر فاریزەی
عەورەتەو دەخرێتە ناو ڕێزمانی ژنەوە
و
هەرچی ئایدیاو فەلسەفەو عەقیدەیە
ژنبوون بەهەڵە ئیعراب دەکات

لێرە
چرکەیەک نییە
ڕەوێک ڕدێنی تازە
و
ڕستێک تیوری نێرسالاری
و
حەشاماتێک فەرمودەی
ژن کوشتن
و
مەترێک فەتوای کۆن
و
مشتێک تاشەبەردی مەزهەب
و
دنیایەک قەفەسی ئایدیۆلۆژی
و
دەرزنێک چەقۆی ڕادیکاڵ
گەشەنەکات

ئۆه خودایه
ئەو فەسڵی ژن کوژانەوەیه
هەر لەبن نەهات

ئەو تەمەی ئاسمانی
ئاواتەکانی
ژن
هەر نەڕۆشت و ون نەبوو

ئەو پەردەی نێرسالارییە
هەرنەدڕاو
کون نەبوو

خودایه من تێناگەم
ئەم هەموو
ڕدێن و
چەقۆو
ڕمان و
منارەیه

ئەم هەموو
قەفەس و
مەزهەب و
نەریت و
سێدارەیه

ئەم هەموو
شکان
و
خەتا
و
خیڵ
و
خنکانەیه

ئەم هەموو
تاریکی
و
گوناه
و
درز
و
ئیدەلۆژیاو
و
گۆچانەیه

ئەم هەموو
قامچی و
شەڕەف و
سمێڵ و
تیوری نێرسالاری و
فەرمودەی ژن کوشتنەیە

ئەم هەموو
فرمێسک
و
فاریزەی عەورەت
و
خەتا ئەزەلی و
ئیعرابە هەڵەیه

تۆ ئافراندت
یان پیاو دایهێنا.. !؟

Previous
Next