Skip to Content

میللەتێکی ئاو تیا وەستاو.. نەوزاد بەندی

میللەتێکی ئاو تیا وەستاو.. نەوزاد بەندی

Closed
by ئه‌یلول 6, 2021 General

زۆر سەیرە ، بڕۆ لە ڕەشماڵێکەوە بیگرە هەتا کۆشکێکی شاهانە ، تەماشا ئەکەی ئاو لە تەنیشت گەلییەکاندا وەستاوە و پەنگی خواردۆتەوە ، ناگاتە گەلییەکان و بڕوات و نەجاتی بێ ..ئایا ئەمە هەڵەی وەستای کاشییە ؟ یان هی وەستای کۆنکرێت ؟ هەڵەی ئەندازیارە یان کاری ڕاکێشانی زەوی و مەد و جەزری کێشکردنی مانگە ؟ یان کورد خۆی وەک چۆن میللەتێکە ئاو لای داوە بە هەمان شێوە ، میللەتێکە ئاو تیای وەستاوە ؟ ..نازانم ..
لەوەیش سەیرتر ، بڕۆ سنکێکی مەڕ مەڕ یان ستیل بکڕە ، تەماشا ئەکەی لە گۆشەیەکیدا ئاو ئەوەستێ و ناگاتە ئاوەڕۆکەی ..
ئەڵێم تۆ بڵێی ئەم ئاو نەگەیشتنە گەلییە ، ئیشی بازرگانی ماسیحەکان نەبێ ؟ ئێ ئەگەر ئاو لە سوچ و قوڕنەکانا نەوەستێ ، کێ ماسیحە ئەکڕێ ؟ بڕۆ سەیری ئەو بازاڕە بکە ، بەسەر ماسیحەدا ئەڕوخێ ، ماسیحەی درێژ ، مام ناوەند ، کورت ..کورتتر .. تەنانەت ماسیحەی ئەوەندە بچووک لە بازاڕدایە ئەتوانی کونێکی تێکەیت و کلیلەکانتی پێوە بکەیت ، واتا بیکەی بە مەدالیا ..
ئەچیتە هەر ماڵێ سێ ماسیحەی لە حەوشە داناوە ، دوو ماسیحە لە بالکۆنەکان ..ماسیحەیەک لە مەدخەلەکە ..دوو دانەی بچوک لەسەر سنکی مەتبەخ ..ماسیحەیەک لە حەمام و دووان لە WC ..
ئەچیتە هەر مارکێتێ ، لە دوورەوە و لەبەردەم مارکێتەکەدا ،کۆمەڵێ توڵ ئەبینی چوون بە ئاسماندا وەک سوچەڕ وایە ، ئەوانە کلکە ماسیحەن ..یان هەندێ دوکان ماسیحەکانیان بە بنمیچی چەتری دوکانەکانیاندا هەڵواسیوە ، ئەڵێی خاچی کڵێسانە ، لە پڕ ڕەشەبا دانەیەکیان ئەخاتە خوارەوە و ئەیکێشێ بە بناگوێی موشتەرییەکدا ، ئیتر خەجاڵەتم و قوربانتم هەزاری بە فلسێ ..
ئاو تیا وەستان و ماسیحە ، دوو گیانن لە یەک جەستەدا ..وەک گوێز و گوێزشکێن ..وەک نینۆک و نینۆککەر ..وەک کورد و چاکسازیی ، لە دژی یەک ئیش ئەکەن و بە بێ یەکیش نایانکرێ ..
میللەتێکی ماسیحە بە دەست و ئاو تیا وەستاوین ..هەندێ ئەڵێن قەدەری ئیلاهییە .. هەندێ ئەڵێن جا ئەوە چیە ..هەندێکیش ئەڵێن جا کوا باران تا ئاو بوەستێ .. شتی تریش زۆر ئەڵێن ، کە ناکرێ لێرەدا باس بکرێ ..
ماسیحەتان باش .. ئاوی وەستاوتان باشتر ..

ــن.بەندیــ

Previous
Next
Kurdish