Skip to Content

سێیەمین خولی فێستیڤاڵی سترانی “هاوار” لە کەمپی “بەرخۆدان”ی عەفرین بەڕێوەدەچێت

سێیەمین خولی فێستیڤاڵی سترانی “هاوار” لە کەمپی “بەرخۆدان”ی عەفرین بەڕێوەدەچێت

Closed
by September 6, 2021 Cinema, General

مەنسوور جیهانی ـ

سێیەمین خولی فێستیڤاڵی سترانی “هاوار” بە بەشداری گۆرانیبێژان و گرووپەکانی مۆسیقا لە کەمپی “بەرخۆدان” لە عەفرین بەڕێوەدەچێت.

سێیەمین خولی فێستیڤاڵی سترانی “هاوار” HAWAR بە بەشداری گۆرانیبێژان و گرووپەکانی مۆسیقا و بە دروشمی “بەهاری نوێی” Buharek Nû، لە لایەن ئیدارەی فەرهەنگ و هونەری ناوچەی عەفرین و بە هاوکاری بزووتنەوەی فەرهەنگ و هونەری “میزۆپۆتامیا” Mesopotamia لە سێ قۆناغدا لەوانە: قۆناغی یەکەم لە ڕۆژانی 7 تا 9ی سێپتەمبەری 2021، قۆناغی دووهەم لە ڕۆژانی 14 تا 15ی سێپتەمبەری 2021 و هەروەها قۆناغی سێهەم لە ڕۆژی 20ی سێپتەمبەری 2021 بە شێوەی ئۆنلاین لە کەمپی “بەرخۆدان” لە ناوچەی عەفرین لە ڕۆژئاوا بەڕێوەدەچێت.

سێیەمین خولی فێستیڤاڵی سترانی “هاوار” کە لە کاتژمێر 7ی ئێواری ئەمڕۆ دووشەمە 6ی سێپتەمبەری 2021 لە ڕێوڕەسمێکی تایبەتدا دەکرێتەوە؛ “بەرخۆدان بە کەڵک وەرگرتن لە فەرهەنگ و هونەر” ناویی لێنراوە و لەم ڕێگایەوە لە هەموو ڕەوت و لایەنەکانی کۆمەڵگای مەدەنی جیهان داواکراوە کە یارمەتی ئاوارەکانی عەفرین بدەن تاکوو بگەڕێنەوە بۆ شار و زیدی خۆیان.

مەبەست لە بەڕێوەچوونی ئەم ڕووداوە دووساڵانە گۆرانییە، پەروەردەکردن و بارهێنانی بەهرەمەندانی لاو و تازەپێگەیشتووە بە شێوازیی زانستی مۆسیقای ڕۆژ، تاکوو مەقام و گۆرانییە جوانەکانی مۆسیقای کوردی بە شێوازی جۆراوجۆر، پێشکەشی کۆمەڵگای کوردستانی بکەن.

بە دەستپێکردنی ئیدارەی سەربەخۆ و پێکهێنانی ناوەندەکانی ئیدارەی فەرهەنگ و هونەر لە کانتۆنی عەفرین و بەدواداچوونی شێوازە جۆراوجۆرە ڕۆشنبیرییەکان بۆ ئاشنایی هەرچی زیاتریی خەڵکی لەگەڵ کەلتووری خۆماڵی و نەتەوەیی خۆیان، ئەم ڕووداوە مۆسیقاییە دەستی بە چالاکی کردووە.

ئیدارەی فەرهەنگی کانتۆنی عەفرین Afrin، لە ساڵی 2015 فێستیڤاڵ سترانی میراتی “هاوار”ی Festîvala Stranê لە ناوچەی ئیستڕاتیجی عەفرین دامەزراند و زۆر گه‌نجی دەنگخۆشی ناساند کە لە بەرهەمەکانیدا گۆرانی و مه‌قامی ڕەسەنی کوردییان پێشکەش کرد، تاکوو ڕەوتی توێژینەوە بە بەڵگەکردنی ئەم گۆرانییە هەرمانانە لە گوندەکانی زنجیرە چیاکانی “کۆرمینگ” Kurming بە دروشمی “ڕۆشنبیری لە هەر ماڵێک بوونی هەیە” دەستپێبکات.

فێستیڤاڵی سترانی “هاوار” لە ساڵی 2015 و 2016 بەڕێوەچوو و پاشان بە هۆی هێڕش و دەستدرێژی هێزە سەربازییەکانی تورکیا و داگیرکردنی نایاسایی عەفرین و ئابڵۆقەی ئەم شارە کوردییە؛ چالاکییە هونەرییەکانی وەستا و ئەمساڵ دیسانەوە بە هەوڵی شێلگیرانەی هەندێک لە هۆگرانی جیدی فەرهەنگ و هونەری ئه‌م ناوچه‌یه، چالاکییە مۆسیقاییەکانی خۆی دەستپێدەکاتەوە.

ناونیشانی فێستیڤاڵی سترانی “هاوار” لە کێوی ناودار و بەرزی “هاوار” یەکێک لە شاخە بەرزاییەکانی “جبل الاکراد” Jabal al-Akrad وەرگیراوە کە هێمای خۆڕاگری کوردەکان دێتەئەژمار و لە نووکی ئەم کێوەدا ئاسەواریی قەڵای “جەبەل هاوار” بەدیدەکرێت کە مێژووەکەی بۆ سەدان ساڵ لەمەوپێش دەگەڕێتەوە کە بەشێکی گرینگە لە مێژووی ناوچەی عەفرین.

کێوی “هاوار” لە مێژووی ناوچەکە و لە بیروەری خەڵکیدا، پێگەیەکی تایبەت و مومتازی هەیە؛ تا ڕادەیەک کە زۆربەی هونەرمەندانی ئەم ناوچەیە، بە هۆی جیاوازییه‌که‌ی، لە گۆرانییە ڕەسەن و حیماسییەکانی خۆیاندا ناوی ئەم شاخەیان بردووە و لەگەڵ بیرەوەرییه‌کانیدا ژیانیان بەسەر بردووە و بوونی ئەم شاخە، بۆیان بۆتە سەربەرزیی و سیمبولی خوڕاگریی و لەناخیاندا پێگە و پایەیەکی بەرزیی هەیە.

بۆ زانیاریی زیاتر
https://hawarfestival.com/

https://www.facebook.com/hawarsongfestival

بەڕێوەبەرایەتی ڕاگەیاندنی گشتیی سێیەمین خولی فێستیڤاڵی سترانی “هاوار”.

Previous
Next