Skip to Content

ئیسلامیەکان لەپشتی ناوزڕاندنی ژنانەوەن لەتۆڕە کۆمەڵایەتیەکاندا!.. تاهیر عیسا

ئیسلامیەکان لەپشتی ناوزڕاندنی ژنانەوەن لەتۆڕە کۆمەڵایەتیەکاندا!.. تاهیر عیسا

Closed
by September 6, 2021 General


ئەوەی کە ئەم ڕەوتە دینییە کۆنەپەرستە لەڕێگای هەزاران مزگەوت و واعیزو بانگخوازیەوە و لەڕێگای دەیان کەناڵی تەلەفزیۆنی و ڕادیۆییەوە و لەڕێگای سەدان پەیج و ڕۆژنامە و وەسیلەی پەخشی ئیعلامیەوە، نەیتوانیوە بەر بەم گەشەی پەیوەندیە کۆمەڵایەتیەکانی نێوان هەردوو ڕەگەزی نێرو مێ و تێکەڵ بوون وئاوێتەبوونیان لەگەڵ یەکتردا لەناو جیهانی عەولەمەی ئەمڕۆدا بگرێت، کە ئاستی تەکنۆلۆجیای جیهانی ئەمڕۆ، دنیای لە گوندێکی بچووکدا لێک هەڵپێکاوەو لە باکوریەوە هەتا باشوری و لە ڕۆژهەڵاتیەو هەتا ڕۆژئاوای لە ڕایەڵەیەکی کۆمەڵایەتی سوک وئاساندا پێکەوە گرێداوە، بگرێت و لەڕێگای هێنانەوەی شێرو ڕێوی وەک قال و قیلەوە ناکام و مایە پووچ ماونەتەوەو نەیانتوانیوە نیوەی کۆمەڵگای بەشەری کەژنانن، دەستەمۆو وابەستەی یاساو ڕێسا ئاینیە ودواکوتووە کۆنەپەرستیەکانی خۆیان بکەن، کە لە ئایات و فەرموودەی دۆگمایی دەیان سەدە لەمەوبەردا، هەتا ئەمڕۆکە لەلایەن سیستەمە سیاسییە چەوسێنەرە یەک لەدوای یەکەکانی مێژووی ئەم ڕەوتەدا دەستاو دەستی پێکراوەو تابەمڕۆکە وەک ژەهرێک دەرخواردی چین و توێژی مەحڕومی کۆمەڵگای موسوڵمان نشینی دەدرێت و کە لەهەر جێگاو بڕگەیەکیشیدا دەستیان چووبێتە ژیانی خەڵکەوە و وەک یاساو ڕێساو حوکمڕانی دەوڵەتی و شەریعەتی دۆگمای ئیلاهی، بەسەر خەڵکیدا لەڕێگای شمشێرو سێدارەوە سەپێندراوە، وێڕای ئەوەی دەوڵەتانێک لەڕێگای شەرعیەتی نێو دەوڵەتیەوە وەک عەڕەبستانی سعودیەو ئێران و گەڕانەوەی جارێکی دیکەی تاڵیبان لەئەفغانستان بەگڵۆپی سەوزی ئەمریکا وەک ئیمپریالیزمێکی تاسەر مۆخ دژە ئینسانی، سڵیان لەدەستبردن بۆ بەپڕاکتیککردنی دەقە پیرۆزەکانیان و شەرعیەتە ئیلاهیەکەیان لەبەرچاوی جیهاندا نەکردۆتەوە، هاوکاتیش ئەمڕۆ ناوە ناوە بۆ ترساندن و خەفەو بێدەنگکردن و بێ ئومێدکردن و ڕەشبینکردنی کۆمڵگای ئینسانی لەژیان وخەباتی ڕۆژانەی خۆیدا، ڕێشمەو هەوسارو جڵەوی نموونەهایەکی وەحشەتناکی وەک قاعیدەو بۆک وحەرام (خوێندن حەرام)و داعش و نوسڕەو تاڵیبان و ئیخوانیەکان و چەندین دەستەو تاقمی دڕندەی تری بارگاوی بە دەق وفەرموودە دژە ئینسانیەکانی ناو تاریکایی مێژووی ململانێی هۆزو عەشیرەتە دواکەوتووەکانی وڵاتانی وەک سعودیەو ئەردەن و عێڕاق و فەلەستینی چواردە سەدە لەمەوبەر، بەردەدرێنە ناو مەیدانی خەبات و تێکۆشانی ئینسانهای مەحڕوم و بێبەش لەژیان و ئازادی شایستەی پڕ لەکەڕامەتی مرۆیی، هەتا ئاراستەو ئاسۆ و چارەنووسی هەوڵ وتێکۆشانیان بۆ ژیانێکی باشتریان بەلاڕێدا ببرێت ، وەک لە میسرو تونس و ئەفغانستان وبەتایبەتیش جەهەننەمێک کە بۆ خەڵکی سوریاو یەمەن وعێڕاقیان خوڵقاند، چاوەڕوانی لەمانە خراپتریش بۆ چەندەهەمین جار لەئەفغانستان دەکرێت.

هەموو ئەم هەل و مەرجە دڕاماتیک تڕاژیدیا ئامێزیە لەناو ئەجێندای تەواوی وڵاتانی زلهێزی دنیای ئەمڕۆ و هەموو ئەو ڕایەڵە دەوڵەتی و حکومەتیانەی کە کوللی دنیای سەرمایەداری ئەمڕۆی پێکهێناوە بەبلۆکە بەناو ناکۆکە ئابووری وسیاسیەکانیشیەوە، لەبردنە پێشی وەها سیاسەتێک و وێرانترکردنی ژیانی مرۆڤایەتی ئەمڕۆدا ، کۆک وتەباو هاوبەشن.
ئەوەی کە لەناو جەهەننەمێکی لەم جۆرەشدا، گۆڤەندەکان لێرەو لەوێی کۆمەڵگا نەریتیەکاندا، پەلاماری حوڕمەت و کەڕامەتی ژنان وکچانێک دەدەن کە مافی موتڵەق و ڕەهایان وەک هەر ئینسانێکی دیکەی ئازادی سەر ئەم گۆی زەوییە لە موماڕەسەی ئازادیە هەمەجۆرەکانیاندا هەیە، بێشک بۆ هێشتنەوەی ئەو کەلێنە بەرفراوانەیە، کەلە ناو نەریت و بیرو فکرو فەرهەنگی کۆمەڵگا دواکەوتووە دینی و مەزهەبیەکاندا هەیە، هەتا بتوانن لەم کەلێن و قڵشت و جیاوازیە جێندەریەدا، باشتر کۆنتڕۆڵی ئیرادەی هەر هەوڵ و تێکۆشان و بەرگریکردنێکیان لەخۆیان، بەرپێبگیرێت!! کە ئەمە هەم بەقازانجی دەوڵەت و حکومەتە خۆجیێیەکانی ناو ئەم کلتورو فەرهەنگە دواکەوتوانەیە تەواو دەبێت هەم بەقازانجی ئەو حەڵقانەی دیکە کە وەک زنجیرێک لەئاستی جیهاندا تەواوکەری یەکترن .

بەدیلێک کە دەتوانێت لەم هەل ومەرجەدا سەردەربێنێت، پێویستە لەم گۆشە نیگایەوە بڕوانێتە چارەسەریەکان!؟
واتە جیهانی عەولەمەی ئەمڕۆ کە تەکنۆلۆجیای سەرمایەداری لەگوندێکی بچوکدا وەک ڕایەڵەیەکی سیاسی و ئابووری سەربازی لێکی هەڵپێکاوە، بێشک ناتوانێت بەربەست لەبەرامبەر لێک هەڵپێکانی کلتورو فەرهەنگە جیاوازەکان و دواجاریش ئاوێتەبوونیاندا بکات ، کە ئەمەش قسەیەکی مارکسمان بیر دەخاتەوە کە دەڵێت سەرمایەداری خۆی گۆڕهەڵکەنی خۆی بۆخۆی دروست دەکات، واتە هەتا هەرچی جیاوازییە شارستانیەکان لەباری فەرهەنگ وکلتوورەوە کاڵتر ببنەوە بەربەستەکانیش بۆ لێک نزیکبوونەوەیان و ئاشنایەتی و هاودەردییان کەمتر دەبنەوە، ئەمە ئەو پاڕادۆکسیەیە کە سەرمایەداری ئەمڕۆکە تێی کەوتووە، لەلایەک هەوڵ و تەقەڵای دەستەو تاقمە دینییەکان لەلایەک بۆ بەرگرتن بەم ڕەوتە ڕوولەپێشە مێژووییەو بەم ئاوێتە بوون و بەم هەوڵی ئازادییە فەردیانەی لەناو ئەم جیهانە بچووککراوەدا لەئارادان، لەلایەکیش جیهانەکە خۆی جگە لەم ئاوێتە بوون و تێکەڵبوونە ناچاریانەیەدا شتێکی دیکە هەڵناگرێت،دواجاریش تێکشکاندنی بەربەستە کلتووری و شارستانیە جیاوازەکان،ڕێگایەکی ئاوەڵاتر بۆ وشیاربوونەوەی یەکگرتنێکی سەرتاسەریانەی مرۆڤە ئازادیخوازو یەکسانیخوازەکانی ناو ئەم جیهانە بچووکە دەکاتەوە، کە ئەمڕۆکە هەم ڕۆژئاوا و وڵاتە زلهێزەکانی نایخوازن، هەم وڵاتە کۆنە پەرستە دواکەوتوو نەریتیەکان، بەڵام ئەم پڕۆسێسە ناچاریی وحەتمیەو ئەمڕۆ یان سبەی واتە زوو یان درەنگ هەر ڕوودادات.

تاهیر عیسا
05.09.2021

Previous
Next