Skip to Content

رازەکانی ئەوین و هەناسەکانی دەریا-3-.. تێکست: ستیڤان شەمزینی

رازەکانی ئەوین و هەناسەکانی دەریا-3-.. تێکست: ستیڤان شەمزینی

Closed
by January 14, 2022 General, Poems


رازی سێیەم

ئەی مەرگ لێگەڕێ
با رازەکانی ئەوین بۆ مانگەشەو باس بکەم
با هەناسەکانی دەریا لە شەپۆلەکاندا هەڵمژم
با لە مەیخانەی عەشقدا پێکی توانەوە بنۆشم
ئەی مەرگ لێگەڕێ
با گۆرانی بۆ ئەو گوڵە بڵێم
لە رۆحی یاردا چرۆی کردووە
با شیعر بۆ ئەو ئەستێرانە بنووسم
وەک پاساری لە شەوانی تەنهاییمدا دەجریوێنن
با ئەشک بۆ ئەو کۆترە سەرگەردانانە بڕژم
لە کاروانی عەشق جێمان و
بە دیار وەسوەسەی ئینتیحارەوە سەریان نایەوە


من دزیم لە گەنجینەی عەشق کرد
سۆزی شمشاڵێکم دزی
شەوانی مەنفای ئەهێنایە سەما
فرمێسکی ژنێکی رووتم دزی
خۆی لە نوری خودا هەڵدەکێشا
من دزیم لە گەنجینەی خودا کرد
بارانێکی قەشەنگم دزی
وەک جامێ شەراب لە چاوی
ژنێکی کۆچەریی ئەڕژا
ئەستێرەیەکی ئارامم دزی
لە ژێر تاڤگەی تیشکەکانیدا
شەهوەت و هەوەسی لێ ئەچۆڕا


لە مەملەکەتی رۆشناییەوە هاتووم
هاتووم بۆ ئەوەی
خەنجەری رووناکی لە جەستەی
ئیبلیسی تەنهایی بچەقێنم و
بە پەنجە گوڵگوڵییەکانی موحیبەت
سەمفۆنی عەشق بژەنم
لە کیشوەری تیشکەوە هاتووم
هاتووم بۆ ئەوەی
بە پێنووسێکی نورانی
مێژووی تاریکی فیراق بنووسمەوە و
بە ماچێکی ئێجگار تامەزرۆ
رووبارێک لە لەزەت بخۆمەوە


بەم رۆژگارە بە دواتەوەم، بەڵام تۆ
وەک نەورەسێکی تەلیسماویی
بە باڵێکی ئەفسووناوییەوە لە فڕیندایت
منیش لە سەرزەمینی روئیاوە
وێڵی باڵێکی قەقنەسیم بمگەیەنێت
بە هەرێمی ئاوەدانی ئایندەت
بەم رۆژگارە بەدواتەوەم، بەڵام تۆ
وەک دەریایەکی یاخیبوو
بە شەپۆلە تووڕەکانتەوە لە هەڵچووندایت
منیش بە سەدای بریسکاویی خەیاڵ
دڵی نووستوی تۆم بێدار ئەکردەوە


هەناسەکانی تۆ بۆنی دەریای لێ دێت
دەریایەک پڕ لە شەپۆلی گومان
دەریایەک پڕ لە پشکۆی دڵشکان
دەریایەک پڕ لە یادگاریی غەمبار
دەستەکانی تۆ بۆنی دەریای لێ دێت
دەریایەک ماندوو لە درۆی پیاوان
دەریایەک تووڕە لە ژانی سەفەر
دەریایەک پڕ لە بەلەمی چاوەڕوانی
تۆ خۆت دەریایەکی گەنجیت
ئالوودە بە خەونێکی پیرەوە


بیرم دەکردەوە تۆ کێی؟
هەر جارەی خەیاڵێک ئەیبردمەوە
جارێک ئەمووت تۆ لەگەڵ باران باریویت
جارێک ئەمووت لە تیشکی هەتاو جیا بوویتەوە
جارێکی تر گومانی ئەوەم دەکرد
تابلۆیەکی بە فڵچەی فەنتازیا رەنگ کراویت
بیرم دەکردەوە لە کوێوە هاتوویت؟
هەر جارەی خەیاڵێک ئەیبردمەوە
جارێک ئەمووت لە باوەشی جوانییەوە هاتوویت
جارێک ئەمووت لە دەربەندی خەیاڵەوە هاتوویت
جارێکی تر گومانی ئەوەم دەکرد
فریشتەیەکی لە نیشتمانی زامدارمەوە هاتوویت


نازانم چۆن پێت بڵێم، ئارەزوومە
وەک کلوە بەفر بەسەر ئاگری سینەتدا ببارێم
بە مقەستی شیعر کراسی شەرمنیت بدڕم و
وەک چەند دڵۆپە فرمێسکێکی قەتیسماو
بڕژێمە چاوە ئاگرییەکانتەوە
نازانم چۆن پێت بڵێم، ئارەزوومە
وەک موچڕکەیەک بە لەشتدا تێپەڕم
بە دەستی قەدەر دار گێلاسی عەشق
لە ناو هەناسەکانتدا بڕوێنم و
وەک نامەیەکی تازە گەیشتووی دڵداریی
بە تامەزرۆییەوە بمخوێنیتەوە


ئەوەی لە کۆتاییدا ئەمێنێتەوە
بارانی چاوەکانی منە
کە هەرگیز خۆش ناکاتەوە
راوەستانی ئەبەدیی منە
لە تەرمیناڵی چاوەڕوانیدا
مەیینی خوێنی منە لە بەستەڵەکی مەنفا
ئەوەی لە کۆتاییدا ئەمێنێتەوە
ئاوڕ نەدانەوەی تۆیە
لە گمەگمی شیعرەکانم
خەنجەری تۆیە
لەسەر ملی کۆتری ئاواتم
بێدەنگی وەحشەتناکی تۆیە
لە ئاست ناڵە ناڵی خەونە سەوزەکانم


لە چاوی تۆوە ئەڕوانمە
ئەو ئاوێنانەی درزی زەمەن لە دڵیاندایە
ئەو ماسییانەی لە بێدەنگی دەریا بێزارن
ئەو تیشکانەی لە باوەشی ئەستێرەوە ئەڕژێن
ئەو شیعرانەی چاویان فرمێسکی تێزاوە
لە چاوی تۆوە ئەڕوانمە
ئەو پەروانانەی بە پێکێک عەشق سەرخۆش ئەبن
ئەو زریانانەی بە نیگایەک هێور ئەبنەوە
ئەو باخانەی گوێ لە گۆرانی پاسارییەکان ئەگرن
ئەو تریفانەی، خۆشەویستی سەوداسەری کردن


هێشتا هەست بەوە ناکەیت
خەریکە لە رێگە پێچاوپێچەکانتدا ون ئەبم
خەریکە دەبمە رۆمانێکی نەنوسراو
خەریکە دەبمە قەسیدەیەکی کزۆڵە
خەریکە ئەبمە دەریاوانێکی یاخی و
مەرجان لە قووڵایی رۆحتدا ئەدۆزمەوە؟
هێشتا هەست بەوە ناکەیت
خەریکە دەبمە دەنگی گریانێکی دوور
خەریکە دەبمە ئیسماعیلێکی سەربڕدراو
خەریکە دەبمە حکایەتێکی خنکاو
خەریکە دەبمە گۆڕستانێکی لێڵ
پڕ لە خەون و رووناکی کوژراو؟


هێشتا هەست بەوە ناکەیت
خەریکە لە رێگە پێچاوپێچەکانتدا ون ئەبم
خەریکە دەبمە رۆمانێکی نەنوسراو
خەریکە دەبمە قەسیدەیەکی کزۆڵە
خەریکە ئەبمە دەریاوانێکی یاخی و
مەرجان لە قووڵایی رۆحتدا ئەدۆزمەوە؟
هێشتا هەست بەوە ناکەیت
خەریکە دەبمە دەنگی گریانێکی دوور
خەریکە دەبمە ئیسماعیلێکی سەربڕدراو
خەریکە دەبمە حکایەتێکی خنکاو
خەریکە دەبمە گۆڕستانێکی لێڵ
پڕ لە خەون و رووناکی کوژراو؟


Previous
Next