ونبوون.. سەردار جاف
کە جگەرەکەم پێ دەکەم
ئاوێ تەزيوو
تەژی لە ڕۆحی سپيم و لە تەنهایی فريشتەييم
کە جگەرەم لە نێو پەنجەکانم دەنێم
بادەی ڕۆژانی گەنجی دنەم دەدا
بە ئەوڕۆوەی گرێ دەدەم
جارێکی دی
بە هزر دێ رۆژانی زووی هەڵەشەييم
…. …. …. …. ….
کراسەکەت بۆنی گەڵا و بەڕووی لێ دێ
دڵۆپ دڵۆپ
ئاونگ بارووتی سپێدان
لە دامێنی ئەو کراسە
قوڵپی هەناسەم مردووە و
خەڵکی لە جێی باوان بێزار
وشکەساڵی کۆتەرەدار
ڕەنگی کراس دارەدارە و
گڕوگاڵی زمانيشم جريوەی باڵندەی سەر دار
لە تەنگەبەری دەربەنەتا
بوومە لرفە و گڤەی شەوبا
هەستم شەپۆلی ڕووبارە
رۆحيشم سەرمەست و شێتی دەم ڕەشەبا
کە کراس بە ئاودامانی دارەوەيە
سروشت تەژی لە بەستەڵەک
هێور هێور … بە ئاسپایی
ڕەشبەڵەکی ڕووتبوونەوە
جێژوانی نەبوونيمان بە دەم ڕێوە دەشێوێنێ
پەنجەکانم ختوکەی گريانی خەو با
هەڵمی ونبووی وەهم دەبووم
ڕايەڵەی فريودانم
مينا خێوێ
باريکتر لە پردی سيرات
پەڕينەوە
لە نێو دوو دژ
بەستەڵەک و ڕێ دژوارێ
تاوسانێک و ڕێ نشيوێ
باڵابوون لە نێو سروشتا
کێشمەکێشمی ژين و مەرگ
نغرۆبوونی خۆری وارێ
تەزووی سڕبوون
باخچەی غوربەت
بۆنی شانێل
ئاسنەڕێی فرە جەمسەر
ڕووخساری ونبووی هەوارێ
کە مانگە شەو پەيامێکی خوداییە
لە سەفەری بادەی ونبوون بگەڕێوە
ئاوڕێ تر بدەرەوە
شەرابی ڕێ
نيوەی تەمەن بە ميراتی بۆ خۆی دەبا
بە قايەغی لاساريا هەڵمەزنێ
ديوێکم سەرماو ڕچينە
ئاوی ديکە گەرم و سوتان
يادەکانمان
لە سەر بستە خاکی ڕووتەن
بوونە لەرەی ميلۆدييەک
ڕوو لە ونبوون نايەنەوە
وێناکانی نيشتيمانيش
بوونە دوێنێ و لە پشتەوەن
بە هەزار نزای دايکان و
دەريای ئەشکی باوانمان
مەحوو دەکرێن ناژێنەوە
دەنگی شيعر
پڕ لە بێ دەنگی کۆڕەوە
کەشکۆڵی ئازارەکانی لە کۆڵناوە
تەپوتۆزی گەرمەسێری لێ نيشتووە
لێوانڕێژی زەنوێرانن
سەرچۆپی تاوان بەر نادا
گەرووی گڕ و پڕ نەعرەتەی
ژيلەمۆيەکی لێڵاوە
Bad Camberg 27 . 12. 2021
