رازەکانی ئەوین و هەناسەکانی دەریا.. رازی شەشەم.. تێکست: ستیڤان شەمزینی
ئەگەر ئەخوازیت عاشق بیت
وەرە زمانێکی تر
بۆ خۆشەویستی بدۆزینەوە
زیندانەکانی عەقڵ
پڕ بکەین لە حیکمەتی فڕین
بە رێنووسێکی تر
خەونی ئازادیی بنووسینەوە
بە رێزمانی عاتیفە،
روانین بخەینە رستەوە
ئەگەر ئەخوازیت عاشق بیت
وەرە هەوا لە هەناسەکانی فیراق پاک بکەینەوە
بەلەمەکانی حەز
بە دەریای لەشدا بئاژوین
بە نێو هەورە رەشەکانی کولتووردا رەت بین
بە سەوزیی بەهار،
پایزی خەواڵو بهێنینە سەما
من تەنها ئەوەم ئەوێت
ژەنگاوی تەنهاییم لە چەمی بزە بشۆمەوە
گۆزە بە تاڵەکانم پڕ بکەم لە شەرابی نیگا
چاوە تامەزرۆکانم پڕ بکەم لە کلی عەشق
داڵغە وێڵەکانم بمگەیەنن بە خەونی ئەوین
من تەنها ئەوەم ئەوێت
بە کەشتی ماچ، سەفەر بکەم بۆ
ئۆقیانووسی دڵنیایی شۆخەژنێک
بە باڵی فریشتەیەک بفڕم بەرەو
باوەشی قەسیدەیەکی بۆنخۆش
بە قاچی شیعرەوە هەنگاو بنێم بەرەو
ماڵی کۆترەکانی غوربەت
بە دەستی عەشقەوە، سڵاو
لە دارستانە زەردهەڵگەڕاوەکانی سەفەر بکەم
هەمیشە دێم
بە کەژاوەی شیعر
بەرەو زەماوەندی عەشقت دێم
بە کانییەک سەرابەوە
بەرەو دەریای رازەکانت دێم
بە جەستەی شەکەتەوە
بەرەو خاچی ئەوینت دێم
بەسەر پشتی ئەسپی خەیاڵەوە
رووەو واقیعت دێم
هەمیشە دەمێنمەوە
تا خانەقای چاوە شەپۆلاوییەکانت هەبن
وەک سۆفییەکی بێ چارە دەمێنمەوە
تا شاری دڵم پڕ بێت لە پەپولەی نازت
وەک ئەستێرەی چارەنووست دەمێنمەوە
تا سێرگی ئاگرینی ئەوینت هەبێت
بەسەر تەنافی ئەڵماسیی دڵتەوە دەمێنمەوە
تا تۆ ڤینۆس بیت، لە نوێژی عەشقدا
بە کڕنووشەوە لە بەردەمتدا دەمێنمەوە
باڵندەیەکی غەمبارم
چەقۆی غەم، زمانی شیعری بڕیم،
بەڵام فرمێسکەکانم هاواریان کرد
ئەی باڵندە باڵ رەنگاورەنگەکە
بە قەد زامی ئەم دوورییە و
هێندەی مۆمە رووخۆشەکانی غوربەت
خۆشم ئەوێی
باڵندەیەکی غەمبارم
هەرچی خوێن هەیە،
لە شیعرم دەچۆڕێ
خوێنی سوور وەک خوێنی
ئەو خەونانەی بە مەلۆتکەیی سەربڕان
خوێنی سەوز وەک خوێنی
ئەو باخچانەی بە هەرزەکاریی خنکێنران
خوێنی پەمەیی وەک خوێنی خۆم
کە بە وتنی “خۆشم ئەوێی”
کەوتە مەوجدان
بێدەنگیم لە دڵتا ئەزرینگێتەوە
من کاتێک بێدەنگم، هەر ئەو کاتە
شیعرێکی پڕ لە ناڵە ئەنووسم
کە وەک بۆمبێکی ئەتۆمی بە بێدەنگی
لە دڵتا ئەتەقێتەوە
منیش بە شیعرێکی تر
ئاسەواری ئەو تەقینەوە ئەنووسمەوە
ونبوونم لە رۆحتدا ئەدرەوشێتەوە
من کاتێک ون دەبم، هەر ئەو کاتە
لە سەفەردام بەرەو هێلانەی
ئەو پاسارییانەی لە خەیاڵمدا نیشتەجێن
کە شەوانی کشوماتت پڕ دەکەن
لە جریوە جریوی یاخیبوون
منیش بە ونبوونێکی تر
داستانی ئەو سەفەرە ئەنووسمەوە
دڵشکان چۆن ئەنوسرێتەوە؟
گۆزەی شکاو چۆن ئەبێتەوە
بەو گۆزە لێوڕێژە دڵخۆشەی
بەر لە شکان ئاوی لە باوەش ئەگرت و
چاوی لە کانیاوێکی شەرمن دائەگرت
دڵشکان چۆن ئەنوسرێتەوە؟
چرا شکاوەکان چۆن ئەبنەوە
بەو کانگا رووناکە نورپرژێنانەی
بەر لە شکان کۆڵانە نوتەکەکانی شەو و
تاریکی ئاسمانیان ئەدایە بەر تیشک و
لەگەڵ کازیوەدا چاویان ئەچووە خەو
وەک رەشەبا مەبە
کە بە خێرایی دێت و تێدەپەڕێت،
لە هیچ شوێنێکیش نیشتەجێ نابێت،
بەڵام دوای خۆی پریاسکەی خەون
هەڵدەڕژێت و شلۆقی جێدەهێڵێت
وەک خۆر بە، کە شەوان
لە پشتی تاریکییەوە
خۆی حەشار ئەدا و
سپێدان بە زەردەخەنەوە دێتەوە
وەک سەفەر مەبە
کە رسی هەموو ئارامییەک
ئەکاتەوە بە خوری و
نیشتمان لە خۆی زویر ئەکات
لە کۆتاییشدا
دڵی هەرچی خەیاڵە ئەیشکێنێت
وەک باخ بە، پڕ بە لە گوڵ و درەخت
سڵاوی باران بسەنەوە و
بین بنێ بە جۆگەوە
تا لەنێو سینگتدا
گوڵە یاس شین ببێت
