Skip to Content

لەئێوارە کۆڕێکی شیعریدا بۆ بەڕێزان( حەسەن شافعی و جەعفەر شێخولیسلامی)دا، پێگەی ڕۆشنبیری ئۆتاوا  دەستبەکاربوونی خۆی ڕاگەیاند

لەئێوارە کۆڕێکی شیعریدا بۆ بەڕێزان( حەسەن شافعی و جەعفەر شێخولیسلامی)دا، پێگەی ڕۆشنبیری ئۆتاوا دەستبەکاربوونی خۆی ڕاگەیاند

Closed
by ئازار 19, 2017 General

دوای نیوەڕۆی ڕۆژی یەکشەممە ڕێکەوتی ١٢ی مارسی ٢٠١٧دا، لە ئۆتاوا/کەنەدا. بەگێڕانی ئێوارە کۆڕێکی شیعری بۆ بەڕێزان( حەسەن شافعی و جەعفەر شێخو لیسلامی)، پێگەی ڕۆشنبیری ئۆتاوا ڕاگەیەندرا.
سەرەتا جەلال قادر بە هەواڵی گیانلەدەستدانی کەڵە ڕۆشنبیری ئازادیخواز وپێشکەوتوخواز وچەپی کوردستان( حەمەی مەلاکەریمی مودەریسی) ساتێک بێدەنگی وەستانی ئامادەبوانی ڕاگەیاند بۆ ڕێزلێنان لەماندووبوونی ئەو کەهەر لەوڕۆژەدا بۆدواجار وەک شێرکۆ گوتەنی( کاکە حەمە..پیاوێک لە کاغەزی ڕۆژنامە) لەزانیاریەکانی هەتیوی کردین.
بەدوای ئەوەدا تابلۆ جەلال بەخێرهاتنی ئامادەبوانی کرد و بەرنامەکانی ئەو ئێوارەکۆڕەی بەکورتی باسکرد.
ئاراس ڕەشید یەکێک لەئەندامانی پێگە، دوای خۆشحاڵی دەربڕینی بۆ ئامادەبوانی کۆڕەکە، هاتە سەر باسکردنێکی کورتی چۆنیەتی دەستبردن بۆئەم پڕۆژە ڕۆشنبیریە کە بەهاوکاری لەگەڵ بەڕێزان(سیروان عبدڵا و جلال قادر) ئەنجامدراوە. پاشان ڕایگەیاند کە پێگە ڕێکخراوێکی قازانج نەویستی ڕۆشنبیری گشتیە، و هەوڵ دەدات دەستبەرێت بۆ بڵاوکردنەوەی هزری پێشکەوتوخواز و شارستانی لەڕێگەی ئەدەب وهونەر وبوارە جیاجیاکانی کۆمەڵایەتی و سیاسی و فەلسەفی و زانستی.
لەدرێژەی قسەکانیدا ئاسۆ وئامانج و هەیکەلەی ڕێکخراوەکەی باسکرد.
نۆرە هاتە سەر شاعیری خۆشەویستی ئۆتاوا بەڕێز( حەسەن شافعی).بەدەنگە بەسۆزەکەی سوپاسگوزاری خۆی بۆدەستبردن بۆئەم پرۆژەیە دەربڕی و کورتەیەک لەژیانی کۆمەڵایەتی و سیاسی وئەدەبی خۆی باسکرد. بەهاوکاری ڕێکخەری مۆسیقای کۆڕەکە بەرێز جلال قادر ئامادەبوان تێکەڵ بوون لەگەڵ هەوای شیعرە جۆراوجۆرە کانی( خۆشەویستی وهەجوو ونیشتمانی) بەڕێز شافعی. ئەم بڕگەیە پتر لە ١:٣٠ خایاند. کە بەئامادەبوانەوە دیار بوو حەزیان دەکرد زیاتر درێژەی هەبێت.
بەدواییدا بڕگەی هەرجارەی بڕگەیەکی ڕانەگەیەندراو دەستی پێکرد، کە بڵاوکردنەوەی کتێبە تازە چاپکراوەکەی بەڕێز( جلال قادر) بوو. لەو بڕگەیەدا بەڕێزیان باسێکی چیرۆکی ناو کتێبەکەی کرد و هەرلەهەمان بۆنەدا دوای واژۆکردنی خۆی لەسەر کتێبەکان. هەریەکە لە بەرێزان حەسن شافعی و جەعفەر شێخولیسلامی کتێبێکیان بەدیاری پێشکەشکرا.
تابلۆ جەلال بەڕێز جەعفەری بانگێشتکرد بۆ بەجۆشدانەوەی ڕۆحی ئامادەبوان لەڕێگەی خوێندنەوەی چەند شیعرێکی جۆراوجۆر و بەپێشەکی ژیاننامەی خۆی دەستی پێکرد. لەناو یادەوەریەکانیدا مام هێمنی شاعیری دەهێنایەوە ناو قسەکانی. کە شاعیر خۆی لەخانەوادەی ئەو شاعیرە گەورەیە. بەرێز جەعفەر بەجۆرێک چووبوە ناو خوێندنەوەی شیعرەکانی کەباسی غوربەتی تێدابوو، ئامادەبوانی پەلکێشکردبوو لەگەڵ ئەو سەفەری شیعر خوێندنەوەیە.
دوای ئەوە بڕگەی مایکی ئازاد کرایەوە بۆ گفتوگۆی گشتی لەسەر کۆڕەکە و پرۆژەی پێگەی ڕۆشنبیری بەگشتی.
لەماوەی ٣-٤ کاتژمێری پڕاوپڕ لەشیعر ومۆسیقا و پیشاندانی مێزکتاب. یەکەم ئێوارەکۆڕ بەدەستگوشین و دەستخۆشیکردن لەیەکتر و هیوای بەردەوامی پرۆژەکە کۆتایی پێهات.


پێگەی ڕۆشنبیری ئۆتاوا/ بەشی ڕاگەیاند
١٣ی مارس ٢٠١٧

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish