Skip to Content

دیسان نوزە نوز.. نەوزاد بەندی

دیسان نوزە نوز.. نەوزاد بەندی

Closed
by September 10, 2022 General

جاران بێ نوێژەبارانەیش ، باران ئەباری ..
بە ڕۆژ و بە هەفتە ، شەقامەکانی
بۆ ئەشۆردین .. تۆزی غەریبی لە قژ وسەرشانمان ئەتەکان ..
خەمی وشکەساڵیمان نەبوو ، ڕێک وەک موچە ، کەس بیری سەری مانگی نەبوو ..چونکە له کاتی خۆیدا باران قژی تەڕ و ..موچە گیرفانی پڕ ئەکردین …هیچیان لە دیداری خۆی دوانەدەکەوتن …فێری وشکەساڵی و درۆ و قۆڵبڕین نەبووبوون ..
ئێستا لە جیاتی باران ، خۆڵ دێ .. دوکەڵ دێ .. ئەنفلۆنزای باڵندە و شەمشەمەکوێرە دێ ..ئەو هەموو مەلایە ئەڕۆنە قەراغ شار و بە شین و شەپۆڕەوە ، نوێژە بارانە ئەکەن ، نابارێ و دڵیان ئەشکێنێ ..
جاران زانکۆ خۆڕایی بوو ..
خوێندن ..بەشی ناوخۆیی ..نەوت ..بەتانی .. دۆشەک ..قەرەوێڵە ..سەرین ..لاویی ..پیاسە ..پێکەنین ..زانیاریی …
بە خۆڕایی بوون …و کە تەواویشت ئەکرد ، دایانئەمەزراندی ..
ڕایشت کردایە بۆ ئەوروپا ، مافی پەنابەریت مسۆگەر بوو
ئێستا لە باخچەی ساوایانەوە هەتا زانکۆ ، ئەبێ ساڵانە پارەیەکی زۆریان بۆ بژمێری و
کە تەواویشت کرد ، داتنامەزرێنن …
ڕایشکەی بۆ ئەوروپا ، مافی پەنابەریت نادەنێ ..
ئێستا تەنها شێرپەنجە و جەڵتەی دڵ بە خۆڕایین ..
٭ ٭ ٭
لە مێژە شەقامێکی حەمامیم نەدیوە نمەی باران بە پەرچەمەکانیەوە بێ ..
لە مێژە فێرخوازێکم نەدیوە بە شانازییەوە بە بێ بۆنە ، لای خوێندنگاکەی ڕەسمێ بگرێ
( ئەزانن بۆ ئەڵێم فێرخواز ؟ ئاخر بڵێم خوێندکار ئەڵێن یەکێتیە و ..بڵێم قوتابی ئەبم بە پارتی )
لە مێژە ئاسمانێکم نەدیوە ، بە بێ دۆعا و نوێژە بارانە ، ملپێچێکی سپی لە مل کردبێ ..
لە مێژه بۆنی باران ، بە بێ بەرامبەر ، دابەش نەکراوە ..
لە مێژە پاک و خاوێنیم نەدیوە دەوام بکا ..
لە مێژە هاوڕێکانم وەک ددانی پیاوێکی هەشتا ساڵان ، زۆربەیان کەوتوون و ..ئەوانەی ماونەتەوە ، خوار و زەرد و پوکاونەتەوە ..
لە مێژە حوکمەتم نەدیوە ..ئەرێ حوکمەت چۆن بوو هاوڕێیان ؟؟ باڵای چەند بوو ؟ جلەکانی .. چاویلکەکەی ناقیس چەند بوو ؟ عەترەکەی ؟ سەعاتەکەی ئۆڵما بوو یان نیڤادا ؟

ـــنەوزاد بەندی ـــــــــــــــ

(وێنەکە وێنەی کاک کامەران چڕوستانی هاوڕێمانە ، زانکۆی موسڵ و باران و ڕۆژی زانکۆ و بۆنی خاکی بۆ گەڕاندینەوە ، سوپاسی ئەکەم )

Previous
Next