پەیامێک بۆ ژنانی قارەمانی ئێران.. حەمید تەقوایی
وەرگێڕانی بۆ کوردی :کاوە عومەر
با چەکی بێ حیجابی بە شێوەیەکی بەهێزتر بەکاربهێنین!
سڵاوی بێکۆتایی بۆ ئێوەی ژنانی جەسور و ئازادی ئێران!
ئێوە هێزی پێشڕەوی ئەو شۆڕشەن کە بڕیارە حکومەتی تاوانکارانی کۆماری ئیسلامی هەڵپیچن. بوونی ئێوە لە هێڵی پێشەوەی خۆپێشاندانەکانی شەقام لەگەڵ ئەو حیجابانەی کە هەڵتاندا و لە هەوادا ئەشەکایەوە یان ئەتان خستەناو ئاگرەوە، وەک سیمبول و ئاڵای ئەو شۆڕشەی کە حکوومەتی نەگریسی کۆماری ئیسلامیی ڕووخاند، لە مێژوودا تۆمار دەکرێت.
ئێستا لەگەڵ دەستپێکردنی مانگرتنی سەرتاسەری، ڕیزەکانی ئێمە خەڵکی شۆڕشگێڕی خەڵک بەهێزتر و فراوانتر دەبن. لەم بەرەیەدا ئێوەی ژنان دەتوانن سەرکردە بن. دەتوانن هێزێکی چالاکبن کە بانگەواز و ڕێکخستنی مانگرتنەکان بکەن.
بەڵام دەبێت مەیدانی خەبات فراوانتر بکەین. دەتوانین چەکی بێ حیجابی نەک هەر لە خۆپیشاندانی سەر شەقامەکان بەڵکو لە هەموو شوێنێک بەکار بهێنین. ئەگەر حیجاب چەکی ئامرازی دەستی کۆماری ئیسلامی بێت بۆ سەرکوتکردنی ژنان و لەوەش زیاتر وەسیلەیەک بێت بۆ ژێردەستەکردنی هەموو کۆمەڵگا، ئەوا نەپۆشینی حیجاب دەتوانێت چەکێکی کاریگەر بێت بە دەستمانەوە بۆ شکستپێهێنانی ئەم حکومەتە دژە ژنانە!
تەنها ئەوەندە بەسە کە لە هەموو شوێنە گشتیەکان حیجاب نەپۆشین. با حیجابەکان لە قوتابخانە و زانکۆکان، لە فەرمانگەکان، لە کارگەکان و هەموو شوێنێک فڕێ بدەین و داوای مانگرتن لە دژی حکوومەتی دژە ژنی کۆماری ئیسلامی بکەین. بەبێ حیجاب بەشداریکردن لە گردبوونەوە ناڕەزایەتییەکان لە زانکۆکان و شوێنەکانی کاردا بکەین و حیجابەکانمان بخەینە ژێر پێ.
ئێستا قوتابییە پێشەنگەکان، کە قوتابی ئامادەییەکانی کچانن، ڕایانگەیاندووە کە حیجاب لابەرن. ئەم بزووتنەوەیە دەتوانێت مۆدێلێک بێت بۆ هەموو ژنان. حیجاب فڕێ بدەنە زبڵدان لە هەموو شوێنێک و حیجابی بەبێ حیجاب ڕابگەیەنن!
ئەم بزووتنەوەیەی ئێمە وێڕای خۆپیشاندانی سەر شەقام و مانگرتنی سەرتاسەری، بەرەیەکی سێهەم لەدژی کۆماری ئیسلامی دەکاتەوە کە ٥٠ لەسەدی کۆمەڵگا دەگرێتەوە. ئەبێت حکومەت لە هەموو لایەکەوە گەمارۆ بدرێت و بخرێتە سەر ئەژنۆ. کۆماری ئیسلامی بە حیجابەوە هاتووە، بەبێ حیجاب گۆڕی گوم دەکات!
بژی هەموو ژن و پیاوی سەربەرزی ئێران!
هەرچی زیاتر فروانتر بێت مانگرتنی سەرتاسەری!
لەناوبچیت کۆماری ئیسلامی!
٢٧ی ئەیلوولی ٢٠٢٢
