Skip to Content

گۆشە نیگاکانی ڕۆژانە.. نەوزاد بەندی

گۆشە نیگاکانی ڕۆژانە.. نەوزاد بەندی

Closed
by December 5, 2021 General

گەنجێ بە تی شێرتێکەوە ، گاڵتە بە زستان ئەکا ..
پێکەنێنێ لە لووتکەکەی قاقادا ئەڕوا دەنگ بە گریان ئەدا ..
پیرەمێردێ بە پاڵتۆیەکەوە ، ئەیەوێ هاوین تووڕە کا ..
کۆمەڵێ بازرگان خۆیان مات داوە لە تەنیشت قەیوان و کۆڕەکا ..
کچێ بە بۆتۆکسێکەوە ،
بە نیازە کۆمەڵێ گەنج سەرخۆش کا ..
زانکۆیەک بە گردبوونەوە ، بە تەمایە قاسەی ئاغاکان بۆش کا ..
دوو هێزی ئاڵودە بە برنج و فاسۆڵیا ، هێشتا مێشولەیەکیان نەخستۆتە خوارەوە ..
هەورێ فێری پیاسە بووە ، هەفتەی جارێ دێ بە لانجە و لارەوە ..
شارێکی گەورە کراسێکی قەناعەتی تەسکی لەبەر کراوە ..
هەزاران بڕوا نامە ، لە دەوری تورێکی قوڕاوی ، خێمەیان هەڵداوە ..
ئایفۆنێ هەزاران جنێو و جڕت و تانە و تەشەری لێ بار کراوە ..
نەخۆشخانەیەک هەزاران لەشساغی دروون نەخۆش ، تێی داوە ..
سەرقەبرانێ تایبەت بە نووسەری تیرۆر کراو ..
تەندەری خۆ کوشتن ، تایبەت بە کچی هەژار و شاعیری لە بیرکراو ..
پەیکەرتاشێکی جیهانیی ، لە چایخانەی کرێکاران ، کەوتۆتە ژێر پێلەقەی خەمۆکی ..
دەریایەک نەوت ، برسێتی توند گرتوێتی بەرۆکی ..
زانست و زانیاریی ، وەک چڵم بە لووتی نەخوێندەوارێکا هاتۆتە خوار ..لێی ئەخوا و لێی ئەخواتەوە ..
دکتۆرایەک ، گێزەر و گون لە یەکتر جیاناکاتەوە ..
شتی تریش ..

نەوزاد بەندی

Previous
Next