خاڵی، وه‌ك ئه‌م تایپه له مرۆڤ … عه‌زیز ڕه‌ئووف
ئه‌سپه‌كان ئه‌سپیان ده‌بێت به‌ڵام مرۆڤه‌كان مرۆڤیان نابێت به‌ڵكو ده‌بێت په‌روه‌رده بكرێن تاكو ده‌بنه مرۆڤ. یوستاین گارده‌ر
هه‌ڵه‌یه‌كی گه‌وره‌یه وابزانین برینه‌كان ته‌نها له‌سه‌ره‌وه‌ن. هه‌ڵه‌یه‌كی گه‌وره‌یه پێمان وابێت به ده‌سكاریكردنی سیسته‌می حوكمڕانی كۆی برینه‌كانی كۆمه‌ڵگه سارێژ ده‌كه‌ین. خۆی ئه‌سڵه‌ن برینه‌كان له خواره‌وه‌ن، ئه‌وه هه‌ر خه‌ڵكه ده‌سه‌ڵات دروست ده‌كات و هه‌ر خه‌ڵكیشه ته‌حه‌مولی كۆی برینه‌كانی كۆمه‌ڵگه ده‌كات.
ئه‌وه‌ی نه‌توانێت له سه‌یران و بۆنه‌یه‌كدا ژێر خۆی پاك بكاته‌وه، چۆن ده‌توانێت له هه‌ڵبژاردنه‌كاندا ده‌نگده‌رێكی باش بێت، ئه‌وه‌ی دار به ته‌ڕی بسوتێنێت، ده‌شتوانێت كۆی برینه‌كانی تر هه‌زم بكات، ئه‌وه‌ی له سه‌یرانێكدا نه‌توانێت سه‌وزایی بپارێزێت، ناشتوانێت بیر له ماف و داخوازیه‌كانی خۆی بكاته‌وه. ئه‌وه‌ی ژینگه پیس بكات، ناتوانێت ده‌سكاری پیسی دامه‌زراوه و ده‌سه‌ڵاته‌كان بكات.
هه‌موو هاتن له‌سه‌ره‌وه ده‌یانویست ده‌سكاری دنیای ئێمه بكه‌ن، هه‌مووی خه‌ریكی توڕه‌هاتی پارله‌مان و ئاڵا و سه‌رۆكایه‌تی و كۆی دامه‌زراوه‌كان بوون، بێئاگا له‌وه‌ی له كۆمه‌ڵگه‌یه‌كدا ژیان ده‌كه‌ین، له ژێره‌وه وێران بووه، بێئاگا له‌وه‌ی كه هه‌وادارانی ئه‌م هێزانه، ده‌نگده‌رانی ئه‌م هێزانه، هه‌مان ئه‌و مه‌خلوقانه‌ن ناتوانن ته‌نانه‌ت وه‌ك پشیله‌ش پیسایی خۆیان بشارنه‌وه.
كێیه حورمه‌تی سه‌وزایی ناگرێت، هه‌ر ئه‌ندام و لایه‌نگر و هه‌وادارانی ئه‌م هێزانه‌ن، تۆ هه‌وادارانت فێر نه‌كه‌ی چی له پاشه‌ڕۆی خۆیان بكه‌ن چۆن ده‌توانیت متمانه‌ی ئه‌وه‌یان پێ بكه‌یت ده‌سكاری كۆی دامه‌زراوه‌كانی كۆمه‌ڵگه بكه‌ن، تۆ نه‌توانی مرۆڤێك وه‌ك مرۆڤ په‌روه‌رده بكه‌ی، بۆ ناچی باره‌گاو مه‌كۆ و مقه‌ڕه‌كانت بكه‌یته هێلانه كۆتر، تا له ئاژه‌ڵه‌كانه‌وه فێری ژیاندۆستی بیت، باره‌گاكانت بكه‌ره كولانه‌ی سه‌گ تا هه‌وادارانت فیری وه‌فا بێت، بینای سه‌رۆكایه‌تی و پارله‌مان و حكومه‌ت بكه‌ره ته‌ویله‌ی ئه‌سپ، تا كه‌مێك ڕه‌سه‌ن بن. هیچ مه‌كه‌ن به‌س كه‌مێك به كه‌لله‌سه‌ری هێستر بیر بكه‌نه‌وه تا بتوانن باری خه‌می خه‌ڵك هه‌ڵگرن.
به‌م هه‌موو پارت و گروپ و ڕێكخراو و بزوتنه‌وه‌یه نه‌یانتوانی تاكی كوردی دروست بكه‌ن، به‌م هه‌موو مزگه‌وت و باره‌گا و مه‌كۆ و لق و مه‌ڵبه‌ندانه نه‌یانتوانی مرۆڤێك دروست بكه‌ن لانی كه‌م له مرۆڤ بچێت. هه‌ر ئه‌و مه‌خلوقه‌ی كه ژینگه وێران ده‌كات له بۆنه‌كاندا سێڵفی له‌گه‌ڵ به‌رپرساندا ده‌گرێت، ئه‌ی چۆن خۆیان ده‌زانن كێیان به‌رهه‌م هێناوه و چۆن تاكێكی بێ ئیراده و خۆبه‌كه‌مزانیان دروست كردووه. ئه‌وه‌ی له ئاستی به‌رپرسێكدا خۆی به‌كه‌م بزانێت چۆن ده‌توانێت حورمه‌تی سه‌وزایی بگرێت؟
هه‌موو خه‌ریكی ناونانی به‌رپرسان بوون، جه‌نابی فڵان و جه‌نابی سه‌رۆكه پێشمه‌رگه‌كه و سه‌ركرده خاكیه‌كه و ئه‌میره خواناسه‌كه و سكرتێره شۆڕشگێڕه‌كه و ئه‌مینداره ئیسڵاحخوازه‌كه، له پاڵیشدا تاكێكی بێ ئیراده و بێ متمانه و بێده‌سه‌ڵات، كه ده‌زانێت كوڕی به‌رپرسان چه‌ند كیلۆن و چ بورجێكن و حه‌زیان له چ خواردنێكه به‌ڵام نازانن منداڵه‌كانی خۆیان ئاره‌زووی چی ده‌كه‌ن و چ پۆشاكێك ده‌پۆشن و به كام ڕه‌نگ دڵخۆشن.
خه‌مه‌كان ئه‌وه‌نده زۆرن ته‌نها ده‌كرێت بیانژمێرین نه‌ك له‌سه‌ربان بوه‌ستین. كۆمه‌ڵگه‌یه‌ك ئه‌م هه‌موو پارله‌مانتاره به‌تاڵ و حه‌تاڵه‌ی له كوردستان و به‌غدا دروست كردووه جگه له بارێك به‌سه‌ر خه‌ڵكه‌وه چیترن؟ ئه‌مانه له بی َئیشیا وتار ده‌نوسن،ئه‌و سایتانه‌ش كه بێ ئیش له پشتی كۆمپیوته‌ره‌وه بۆ هه‌واڵ ده‌گه‌ڕێن مقاله‌ی ئه‌مانه بڵاو ده‌كه‌نه‌وه و هه‌واڵیشی لێ دروست ده‌كه‌ن. كۆمه‌ڵگه‌یه‌ك ئه‌م هه‌موو پارله‌مانتاره بێ ئیشه‌ی هه‌بێت، چۆن ڕوویان دێت بێنه سه‌ر شاشه و خۆیان پیشانی ده‌نگده‌ره‌كانیان بده‌ن؟ بێگومان ده‌نگده‌ره‌كانیان كێن؟ هه‌ر ئه‌وانه‌ن ناتوانن حورمه‌تی سه‌وزایی بگرن و وه‌ك به‌شه‌ر پاشه‌ڕۆی خۆیان پاك بكه‌نه‌وه. ئه‌م ده‌نگده‌ره هه‌ر ئه‌م پارله‌مانتاره دروست ده‌كات، ئه‌م پارله‌مانتاره هه‌ر ئه‌م ده‌سه‌ڵاته و ئه‌م دامه‌زراوانه به‌رهه‌م دێنێت، نه به‌شه‌ری ئێمه له ئاسمانه‌وه هاتووه و نه‌ده‌سه‌ڵات خوا نازڵی كردووه.
ئه‌وه‌ی ترسم لێ هه‌بوو ئه‌م به‌ربه‌ریه‌ته‌بوو. ئه‌وه‌ی من خه‌مم بوو فه‌رامۆشكردنی شته بچوكه‌كان بوو.ئه‌وه‌ی من ئاهم بۆ هه‌ڵده‌كێشا ئه‌م مه‌خلوقه‌یه كه ناتوانێت له سه‌یرانێكدا ژێر خۆی پاك بكاته‌وه. كێ كۆترێكی بینیوه ژینگه پیس بكات؟ كه‌س گوێدرێژی بینیوه دار به سه‌وزی بسوتێنێت؟ كوا هێستر سه‌وزایی وێران كردووه؟ ئه‌وه‌ی نه‌توانێت بیر بكاته‌وه دڵخۆشه به توڕه‌هاتی ده‌وڵه‌تی كوردی و به هه‌ڵكردنی ئاڵایه‌ك له ئه‌نقه‌ره و كه‌ركوك ده‌كه‌وێته هه‌له‌كه سه‌ما. دڵخۆشه به دروستكردنی ده‌وڵه‌تی كوردی به‌ڵام دار به گه‌ڵاوه ده‌سوتێنێت، باسی گۆڕینی دنیا ده‌كات به‌ڵام سه‌وزایی وێران ده‌كات، له مزگه‌وته‌كاندا له دوای مه‌لاوه نوێژ ده‌كات، به‌ڵام بۆنی درۆ و دووڕوویی ئاسمان كاس ده‌كات.
وای چۆن ئه‌م كۆمه‌ڵگه‌یه‌یان وێران كرد ئاین و ئایدۆلۆژیاو حزب و بزوتنه‌وه‌كان. وای چۆن هه‌لاهه‌لایان كردین ڕێكخراوه‌كان و به‌رپرس و مه‌لا جنێوده‌ره‌كان و چاودێره به‌تاڵ و حه‌تاڵه‌كان. وای چۆن شاریان وێران كرد و خه‌ریكه سروشتیش ده‌سوتێنن ئه‌م مه‌خلوقه‌ی ناوی كورده. بیست و شه‌ش ساڵه شه‌ره‌فیان به‌ده‌ست نوخبه‌ی سیاسیه‌وه شكاوه، كه‌چی له‌نێو ڕانی ئافره‌تێكدا بۆ شه‌ره‌فی خۆیان ده‌گه‌ڕێن. وای چه‌ند خاڵیه ئه‌م تایپه له مرۆڤ.
