Skip to Content

رۆژێكی خۆڵكه‌وه‌یی  … عارف كورده‌

رۆژێكی خۆڵكه‌وه‌یی … عارف كورده‌

Closed
by نیسان 28, 2017 General, Poems

ئه‌م شاره‌ ملوانكه‌ی دیرۆكی
لاپه‌ڕه‌ی پساوه‌
هه‌ر ده‌نكه‌ شیلانه‌و مه‌رجانه‌
له‌ كونجی خه‌یاڵی رابردووی خنكاوه‌
ئه‌م شاره‌ كفنێكی خۆڵ باوی
پۆشیوه‌و مه‌لووله‌..
له‌ ده‌ریای مت بووندا نوستووه‌و
ئه‌ندێشه‌ی له‌نگه‌ری
له‌ وه‌رزی سڕ بوونه‌..!
له‌م شاره‌ نه‌ مه‌جنوون بۆ له‌یله‌
ده‌شت و ده‌ر په‌ی ده‌كا
نه‌ فه‌رهاد بۆ شیرین
قوڵنگی له‌ شانه‌و
له‌ دڵی بێستوونا كانیاوێك ده‌ر ده‌كا!
به‌كره‌كه‌ی مه‌رگه‌وه‌ڕ؛
كه‌ڵه‌گای شه‌قامه‌و
كه‌س نیه‌ نه‌فره‌تێك.. تفێكی لێ بكا..!
سبه‌ینێ له‌م شاره‌ جه‌ژنه‌كه‌ی ئایاره‌
نه‌ مارشی راپه‌رین ده‌بیسترێ..
نه‌ خرنه‌ی بازنی بێریوان خرنه‌ی دێ!
ئه‌ستێره‌ی ئه‌م شاره‌ نابێته‌ قه‌قنه‌س و
له‌ پێناو ئه‌وینا داگیرسێ و بسووتێ..!
نه‌ زه‌نگی شیعره‌كه‌ی؛
سه‌د ساڵه‌ی ئایارم ده‌نگی دێ..!
نه‌ تێشووی پڕ وشه‌ی؛
وورایه‌ك.. ئه‌ژده‌رێك..
له‌ شانی هیچ كه‌سێك نابینرێ..!
توتیه‌كی كێویله‌ی زۆر بڵێی فشۆڵه‌
مێژوویه‌كی ئاوه‌ژوو ده‌نووسێ و
له‌لای ئه‌و ئاساییه‌
یه‌ك كه‌سیش گوێ نه‌گرێ..!
ئه‌سپێكی له‌ڕوو لات..داهه‌زاو.. سیسه‌ڵه‌
له‌ په‌ناو په‌سێو دا؛
هه‌ندێجار نووزه‌یه‌ك .. لرخه‌ی دێ ..!

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next