فیلمێكی كوردی له‌فێستیڤاڵێكی سینه‌مایی نێونه‌ته‌وه‌یی كێبڕكێی بردنه‌وه‌ی خه‌ڵات ده‌كات
فیلمی (بێده‌نگی ئاسمان)ی ده‌رهێنه‌ری كورد جبرائیل ئه‌بوبه‌كر له‌فێستیڤاڵێكی سینه‌مایی نێونه‌ته‌وه‌یی به‌شداری ده‌كات‌و كێبركێی بردنه‌وه‌ی خه‌ڵات ده‌كات.
ده‌رهێنه‌ر جبرائیل ئه‌بوبه‌كر له‌باره‌ی فێستیڤاڵه‌كه‌وه وتی “فیلمه‌كه‌م له‌فێستیڤاڵی نێونه‌ته‌وه‌یی فیلمی كیرالا له‌وڵاتی هیندستان به‌شداری ده‌كات”.
وتیشی “فێستیڤاڵه‌كه له‌رۆژی 16ی حوزه‌یرانی 2017 چالاكییه‌كانی ده‌ستی پێكردوه‌‌و هه‌تا رۆژی 20ی حوزه‌یرانی 2017 به‌رده‌وام ده‌بێت”.
ده‌رهێنه‌ری فیلمی (بێده‌نگی ئاسمان) ئاماژه به‌وه ده‌كات كه” فێستیڤاڵه‌كه له‌سیرۆفانانسابورام له‌ویلایه‌تی كیرالا له‌وڵاتی هیندستان ئه‌نجام ده‌درێت”.
وتیشی “ئه‌مساڵ خولی ده‌یه‌می فێستیڤاڵه‌كه‌یه‌‌و فێستیڤاڵه‌كه‌ش تایبه‌ته به‌فیلمی دۆكیۆمێنته‌ری‌و كورته فیلم”.
فیلمه‌كه نوێترین به‌رهه‌می سینه‌مایی ئه‌م ده‌رهێنه‌ره‌یه و به‌سپۆنسه‌ری عه‌باس فازڵ عه‌بدولره‌حمان خاوه‌نی زانكۆی نۆلج به‌رهه‌مهێنراوه‌‌و له‌ئێستادا فیلمه‌كه له‌چه‌ندین فێستیڤاڵی سینه‌مایی نێونه‌ته‌وه‌یی وه‌رگیراوه و به‌شداری له‌پێشبڕكێ و بردنه‌وه‌ی خه‌ڵاتدا ده‌كات‌و دواهه‌مین به‌شداریشی له‌فێستیڤاڵی ئاشاریا تولسی بۆ كورته فیلم بو كه رۆژی 10ی حوزه‌یرانی 2017 له‌وڵاتی هیندستان، ئه‌نجامدرا.
(بێده‌نگی ئاسمان) كورته فیلمێكی ئه‌نیمه‌یشنه‌‌و له‌باره‌ی خه‌ونه‌كانی مرۆڤه بۆ ئازادی‌و له‌باره‌ی چیرۆكی فیلمه‌كه‌شه‌وه جبرائیل ئیبراهیم ده‌ڵێت “فیلمه‌كه باس له‌خه‌ونی مرۆڤ ده‌كات بۆ ئازادی، به‌وپێیه‌ی كه هیچ كه‌سێك ناتوانێت رێگا له‌ئازادی بگرێت‌و به‌ربه‌ستی بۆ دروست بكات”.
وتیشی “ماوه‌ی فیلمه‌كه 100 چركه‌یه و به‌رهه‌می ساڵی 2017-یه”.
جبرائیل ئه‌بوبه‌كر ره‌حمان له‌دایكبوی ساڵی 1983ی شاری هه‌ولێره، له‌ساڵی 2001ه‌وه ده‌ستیداوه‌ته كاری سینه‌مایی و له‌نزیكه‌ی 40 كورته فیلمدا یاریده‌ده‌ری وێنه‌گر بوه و له 13 فیلمی سینه‌مایی درێژیشدا یاریده‌ده‌ری وێنه‌گر بوه و له‌ساڵی 2010ه‌وه كاری ده‌رهێنانی سینه‌مایی ده‌كات و هه‌تا ئێستا چوار كورته فیلمی به‌رهه‌مهێناوه و نزیكه‌ی 20 خه‌ڵاتی نێوخۆیی و جیهانیشی به‌ده‌ستهێناوه.
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
