شیعر/ کۆمەڵێک چەقۆی فێندەمێنتالیست.. شەماڵ بارەوانی
..
تەعریبتان باش
من ناوم قەرەچوخە
دوێنێ شەو
ڕەوێک شمشێری توندئاژۆ
بەکۆمەڵێک
فەتوای خوڕافەو
زەمبیلێک جەهالەتەوە
بەسەتڵێک ڕق و
ئارپیچیەک دەمارگیریەوە
خۆیان کرد بە کەندیناوەمدا
و
جەستەی خدرجیجەیان
شەلالی خوێن کرد
کۆترێکیان شەهیدکردم
هێشتا گمەی نەگرتبوو
کانیەکیان کوێرکردمەوە
هەزاران ساڵە
دروشمی کوردایەتی دەوتەوە
درەختێکیان سەر بڕیم
هێشتا زامی دەستی سەدام
و
خوێنی ئازادی لێدەچۆڕا
کۆمەڵێک شەوەزەنگ
لەڕەنگی ڕەش تاریکتربوون
زمانیان نەدەزانی
نەمزانی کێن
بەڵام گوتیان ئێمە
لەشکری سەحراین
سەر بەچەمکی بەربەرین و
و
لەئارشیفی فەرهودەوە هاتووین
لەڕەچڵەکی قەحتان و نەوەی عەدنانین
لەمنداڵدانی عروبەوە لەدایک بووین
و
ڕەگمان دەچێتەوە سەر فتوحات
ئێمە درێژکراوەی مێژووی هەزارو چوارسەت ساڵ
بەر لەئێستاین و هاتووین پرۆسە
تەواونەکراوەکەی تەعریب تەواوکەین
کۆمەڵێک چەقۆی دەمارگیرو توندڕۆ
پڕ بوون لە توڕەیی و نەفرەت
دەستیان هەمووی خوێن بوو
بۆنی بەغداو بەعس
بۆنی ئەبو عیزرائیل و زەڕقاوی
بۆنی ئیمان و ئەنفالیان لێدەهات
نەمزانی کێن
بەڵام
گوتیان ئێمە پاشماوەی غەزەبی خوداوەندین
لە قافلەی مەعاویەو
سەربە توخمی مەرگین
لەدەماری عەفلەقەوە هەڵقوڵاوین
لەناو پۆستاڵەکانی عەلی کیمیاوییەوە
هاتووین
و
بە ئەسڵ دەچینەوە
سەر شەرعی ئیفلاس
هاتووین
تا سرودی ئەی رەقیبتان
مەحکوم بەزەندیک بکەین
و
دوایین یەزدەکوردتان
بسڕینەوە
بەڵێ ئەوان
کۆمەڵێک قەمەی ڕادیکاڵ و
بە حوشترێک لە تەعریب و
ڕەشماڵێک ئەجێندای سیاسی و
فنجانێک پیلانی عروبەوە هاتبوون
بەڵێ ئەوان
کۆمەڵێک چەقۆی فێندەمێنتالیست بوون
گوتیان کە
لەزۆنگاوی تیرۆرو
تونێڵی تاریکیەوە هاتووین
نەسەبمان دەچێتەوە
سەر خالد
و
لەمەزهەبی ڕەجمین
ئێمە
مۆڵەتی خوداوەندمان پێیە
بەمیتۆدی قەعقاع و
بە ئاگاداری
ئاسمانەوە هاتووین
