شیعر/ ئاونگ.. سەردار جاف
Closed
سپێدەيە
تک تک دەتکێی بە سەر ڕۆحی
خەرمانەی دڵی شێت بووما
نمەت ئاشنای پەڕەی گوڵ بوو
يا ديلی نێو داوی ڕاوچی
گلای بە سەر
هەناسەی پەرتبووی تێکچووما
………………………………….
لە تاریکی شەوڕا هاتووي
دڵم خۆری تیا ڕواوە
بە ئومێدەوە بڕوانە
ژيان پێکەوە تەواوە
………………………….
پەنجەکانی تۆ ئاونگن
بە سەر ڕايەڵەی نێوانمان
لەنجەيانە
سپێدان بەر لە گوڵ کەوتن
بۆنی سەبای ڕۆژگاريانە
…………………………..
گوڵ و شەونم
دار و گەڵا
هەور و باران
نسرمی شەوی تريفە
پێکڕا لە ژوانی بەیان
چاو و نيگا
دەست و گوشين
هەست و قوڵپ
دڵ وترپە
جاڕدانێکن بۆ گوڵ و سەمای ژيان
……………………………………………….
پەنجەکانم
دەبا يەک يەک هەڵبوەرێن
ئەگەر ئازاری نیاز بێ
چاوەکانم
لە ئاستتدا نابينا بن
گەر بە هەڵە لە ديقەتدان
بێ بۆن و سۆزی پڕ ناز بێ
ئەڵمانيا
٥. ١٢ . ٢٠٢١
