مۆدلیانی … نه‌ژاد عزیز سورمێ
Closed
ڕووباره‌كانی دۆزه‌خ
له ژووری گریانه‌وه دێن ..
شوێنه‌واری هیچ ڕێگایێ دیار نییه ؛
دارستان و بڵندایی
پیلیان تێك هه‌ڵكێشاوه .
تۆ هه‌ر بڵێ و بڵێره‌وه !!
كه‌س به نرخی باوه‌رێنیش ئاوڕی لێ ناداته‌وه .
كێ ماسی له ناو ئاو ده‌كڕێ ؟
تۆ هه‌ر بڵێ !!
(لیڤۆڕنۆ) نوقمی كوێرایی ده‌ریا بووه
دانی له ده‌مامكه‌كانت گڕساندووه .
(( ئای ئیتاڵیای خۆشه‌ویستم ! ))
كه‌س نییه له ڕه‌شه شه‌وی پاریس دا
چرایه‌كی بۆ هه‌ڵبكا..
(جین) یش جۆگه‌ی ڕووباری دۆزه‌خه
له ژووری گریانی دانتی ده‌كاته‌وه ..
هاوارێكی بێ هوده‌یه ..
ته‌مه‌ننای مه‌رگی دووه‌مه .
(( ئای ئیتاڵیای خۆشه‌ویست !))
مه‌رگ كه‌ناره‌كانیشی ڕه‌ش كرده‌وه ..
باسكی مێژوویان باداوه
كه‌س نییه سه‌ره‌داوه‌كان گرێ داته‌وه
ئیتاڵیای خۆشه‌ویستم !
شوباتی/ 1989
