ڕووی شـاراوه ئه‌بستراكـتی جه‌نـگـه‌ڵ.. نه‌ژاد عزیز سورمێ
به‌ری خۆرنشینی دڵ مه‌گره
جه‌نگاوه‌ری كه‌پك و خه‌ره‌ندان !
ده‌بینی ئێمه
ئاسووده‌یی لێك ده‌ستێنینه‌وه
تاریكی پێك ده‌ڵێین
گۆشه‌گیریمان ،
به سێبه‌ری هێشووه گرمۆڵه‌بووه‌كانی
ڕه‌زی ته‌لانان سپاردووه
خه‌رمانه‌ی ڕوئیاكانمان
له چاڵی ڕوومه‌تی
كچانی خه‌ون ون كردووه ..
چ شه‌پۆلێكی تووشه ئه‌م شه‌پۆله
ڕووی له به‌نده‌ری خولیاكانمان كردووه
دێت و ناگه‌ڕێته‌وه ..
چ ئاوازێكی خامۆشه
له شه‌وی سه‌ركه‌شی برۆنزیمان ئه‌دا ..
بزه‌یه ، بزه‌یه ، بزه .
ڕۆحی مه‌رگ ،
دوای ده‌یان كۆستی دره‌وشاوه
پاش سه‌تان په‌ژاره‌ی ئاسنین
گه‌رداوی قایه‌خی كون كون
له ئاوێنه‌ی ده‌ستی
ڕووهه‌ڵگران ده‌رده‌كه‌وێته‌وه ..
گلێره‌یه ، گلێره‌یه ، گلێره .
گیانی ته‌ره‌بووی باران
سه‌مایه‌كی ژاكاو
چه‌شه‌خواز
شاڵاو دێنێ و
جه‌سته‌ی تووكنی چیایان ده‌كوتێ ..
ئێمه له كوێ و
عه‌شقی ژه‌نگاوی له كوێ .. ؟
ئێمه له كوێ و
ئه‌ته‌می هێللانه‌ی باڵندان له كوێ ؟
ئێمه له كوێ و
ڕه‌ونه‌قی
نان و ئاوی سبه‌ی له كوێ ؟
ئێمه له كوێ و
تامانی باڵانوێنی په‌سیوان له كوێ ؟
ئێمه له كوێ و
لاله‌زاری عه‌تر و
بۆنی مه‌له تۆراوه‌كان له كوێ ؟
پاسه‌وانی عه‌ییار و
له‌ككه‌ی نه‌هلستییان له كوێ ؟
ببینن !
ژووره بنمیچ شووشه‌ییه‌كان
به چ شه‌یدایی و نیازه‌وه
تارای ڕه‌ش
به‌سه‌ر خه‌یاڵی ئومێدا ئه‌ده‌ن ..
ببینن !
كێڵگه‌كانی هه‌ناومان
ده‌شته كاكی به كاكیه‌كانی بینایمان
چیمه‌نه چه‌رمووه‌كانی سنگمان
بڕستی هه‌نگاومانه
به‌سه‌ر سنووری
قه‌ڵه‌مڕه‌وی تاسان و
پێخوستی سه‌هه‌ند و
ئه‌ندازه‌ی دارایی .. ببینن !
ژێـی ده‌نگمان ببینن
كه نازانین موبته‌لای چی بوون
بۆ له پێكه‌نین و گریان كه‌وتن ..
ئه‌ی قیبله‌نماكان په‌یجووری چیان كرد ؟
ببینن !
په‌نجه‌ره و كڵاوڕۆژنان ببینن
چۆن وه‌رزی كوژاوه‌ی پێدا دێن ..
چ خه‌مێكی موچڕكداره (جیهانایه‌تی)
چ هه‌وایه‌كی ته‌وژمداره
یه‌كه‌مینایه‌تی ..
شنه‌ی دێ ناڵه‌ی عاشقان
زه‌مین بڕبڕه‌ی ناخمان
له ڕووی زبر و تینووی ده‌سوێ ..
له‌م باخچه‌یه‌دا
ئیتر دره‌خت
به په‌ینی پاك ته‌رز ناوێن ، هه‌ڵناچن
ڕووباره‌كان به هه‌ڵه‌داوان ، بێ ئاوڕدانه‌وه
تێده‌په‌ڕن
شتێكیان ون كردووه
نازانن چییه ..
هه‌ڵۆ به هاواری كوشنده‌وه
سه‌ره‌وخوار ده‌بنه‌وه
گوڵه‌گه‌نم
له ژنانی ئه‌ندێشه ڕووتترن ..
( ئای له‌و بنبه‌سته هه‌ڵایساوه
له‌م ونگه‌یه سه‌حه‌ركوژه )
فرمێسك وای ده‌گێڕێته‌وه .
تشرینی دووه‌می 2022
