Skip to Content

ئێوارانە ٢٠.. سەردار جاف

ئێوارانە ٢٠.. سەردار جاف

Closed
by ئازار 7, 2023 General, Poems

ئێوارەيەک
بە لێوڕێژی لە خۆم تۆ دەبينم
وای لە ئينجانە جوانەکانی هەشتی سێ
وەک لانەيەکی خۆر دەتبينم ، تەڕتەڕ
لەرەبايەک دەتشنێنێ و
هەر تۆی دەبييە هەموو کەسێ
شنەبايەکی ئەوينیی، وا نوقمی لوولبوونت دەکا
گێژەڵوکەيش ناتترسێنێ
ئەم دەماغی پووچە، کەنگێ لە خەو ڕا دێ
هێدی هێدی لە کەنارت
ئارامبوون بۆ خۆی بسێنێ
ئێوارەيەک
رەدووی مەزنی تۆ کەوتم
هەتا ترۆپک چووم و دەچووم
لە نێو تۆدا ئەستوندەگی ژينم بينی
دوێنێ دييەم ناساغ و لێڵ
لە مەرکانەی دۆراندۆرم تێکشکابوو
جگە لە خود درۆ و رک و شينم بينی
ئێوارەيەک
ئاکنجی سارای سەرابيیم،
نامەوێ لێی قورتار ببم
هەر دەڕۆم و من پێت ناگەم
دوا وێستگەی پاسی لای ماڵتان شەڕانگێزی ئاوەزمە
لە کام کونجی رەحيماوا ئۆغر دەکەی
نابەڵەدم لێت تێناگەم
ئێوارەيەک
بە جانتاکەی بەرسينگتەوە
بە يەکپۆشاکی بەرتەوە
بە لەنجەی جوانی رێتەوە
بە نيگای سيحر و بيرتەوە
بە بزە و خەندەی خەياڵتەوە
بە باوەشێ ترس و هزری پڕ شۆکتەوە
لە ڕێی مەکتەب کە دێيتەوە
من لە کوێ بووم
لە نێو دەفتەر و جانتا، رێ دەرببڕم
ببمە قەڵەم بە دەستەوە
خەياڵدانت چراتۆڕی ژووری پياوێ
ئافاتی بير خرمژنی حەسرەت باوێ
خەونەکانت پوولەکەی رەنگاوڕەنگ تاوێ
ونبوونی رێی عيشقی دڵت
هەورازێکە و هيچ بێنەو بەردەی پێ ناوێ
من لە کوێ بووم
لە بری تۆ، نەک دەپەنجەم
هەموو لەش و هەست و نەستم، گڕ بگرێت و تيشکهاوێ
ئەم ئێوارە
لە غوربەتا تۆم ديتەوە
بووين بە ئيسکان، بە شۆريجە و رەحيماوە
بووين بە گەنجێکی سەرەڕۆ
بووين بە شارێ
بووين بە کەرکووک
لە ترۆپکی ئاوابوونا، نيگاکانت بوون بە خۆرێکی زەرد زەرد
بەر لە نغرۆیی و ئاوابوون
بەر لە دارەدارە و گۆچان
بەرلە رێگای زەهايمری
بەرەو دارا دوو داری دی گەڕايتەوە و بوويتەوە بووک
ئێستايش دەڵێم ئازيزەکەم خۆشمدەوێی خۆشەويسترين کەسم

ئەڵمانيا
٥ / ٣ / ٢٠٢٣

Previous
Next
Kurdish