رێم بدەن منداڵ ببمەوە.. شیعری: ستیڤان شەمزینی
چی دەبوو
خوا بیکردبایە منداڵ ببمەوە؟
جارێکی دیکە
بە قادرمەی تەمەندا بۆ دواوە شەقاوم بنابا
خۆم دەمزانی چی دەکەم لەناو منداڵیدا
هەرگیز خەونم بە گەورەبوونەوە نەدەبینی
میلی کاتژمێری زەمەنم دەوەستاند
پێویستی نەدەکرد گەورە بم
پێویستی نەدەکرد لە منداڵی بترازێم
ئێستاش تامی نوقڵی شەوی بەرات و
چکلێتی جەژنان هەر لە دەممدا ماون
چۆن هێندە خێرا گەورە بووم؟
دوێنی بوو
گۆڵچی تیپی فوتبۆڵی گەڕەک بووم
ئەمڕۆ ریش چەرمۆی بازاڕی ژیان
دوێنی بوو
بەدەم خواردنی لەفەیەک قاورمەوە
لە ژێر دارهەناری حەوشە خەوم لێ دەکەوت
چۆن ئەمڕۆ بووم بەم پیاوە کامڵەی
لەو گەڕەکەی تێیدا لەدایکبووم
کوڕ و کاڵ بە خاڵۆ خاڵۆ بانگم بکەن؟
دوێنی بوو لەسەربان دەنووستم
چاوم دەبڕییە ئەستێرە درەوشاوەکان
لە خەونیشمدا
دەمکردنە ملوانکە بۆ دایکم
چۆن ئەمڕۆ لاجانگم بەفری بەسەردا باری و
لە ناو دەفتەری بیرەوەرییدا بورامەوە؟
دوێنی بوو وا بیرم دەکردەوە
جیهان بەو پانوپۆڕییەوە
هەر نێوان شاخەکانی ئەزمەڕ و بەرانانە
چۆن ئەمڕۆ
تەڵیسمی ئەو هزرە رەوینەوە
بە فڕۆکەیەکی رزیوی هێڵی ژێرمانیا
سنووری وڵاتان دەبڕم؟
چی دەبوو ئەژدیهای ناو یاری
مار و پەیژەی گەورەیی قوتی دابام
لە خانەی یەکەمی لە دایکبوون فڕێی بدابام؟
من چیم لە هەڵکشانی تەمەن دەست کەوت
جگە لە گۆڕانی دەمانچە ئاوییەکان
بە چەکە ئێسک تاڵەکانی ئێستا؟
من چیم لە خەونەکانم هێنایە دی
جگە لە قەڵەوبوونی ژمارەکانی تەمەن و
لاوازبوونی ئاسکەکێوی جوانیی؟
من چیم لە تێپەڕین بەنێو ساڵەکاندا
دەست کەوت
جگە لە رەتبوون بەنێو چەرخێکی کوێر و
ئاوڕنەدانەوە لە خۆڵەمێشی خەونەکان
من چیم لەم گەورەبوونەی لەش دەست کەوت؟
جگە لە دابەزین لە وێستگەی مەراق و
گوڵەوەچنی پەرچنەیەک لە ئازار؟
چی دەبوو ئەگەر گەورە نەبووبام؟
چیم دەدۆڕاند لە گەورەییدا
جگە لە ددانە کلۆرەکان و چاویلکەیەک؟
چیم لە کیسە دەردەچوو
بێجگە لە مشتێ پارەی ئاسن و
تۆفانێکی شاراوە
لە ژێر پێڵووی چاوەکانمدا؟
چیم هەبوو لێم زەوت بکەن
بێجگە لە پایپێکی چڵکنی رزیو و
پەرستگەیەکی بێ ناونیشانی
ناو تەمی مێژوو؟
ئاه خودایە چۆن منداڵیم تێپەڕی؟
بۆ ناهێڵیت جارێکی دیکە
دایە گەورەم
بەرچایی بخاتەوە بەردەستم و
بە گۆرانی جادە و چۆڵ و سێبەر بوو
لە خەو رابم؟*
بۆ ناشێ ئەم زەمەنە
بۆ دواوە بگەڕێتەوە؟
هەروەک چۆن چیاکانمان
بۆنی بیابانیان گرتووە
منیش بگەڕێمەوە
گەڕەکی خەونە ئاڵەکان
لەوێ مامۆستا ولیەم**
فێری نۆتەی ژیان و موزیکم بکاتەوە
مامۆستا فرانسیس***
گوێ بۆ مەقامێکی حیجازم بگرێت دەستم بگرێت بۆ ناو کەنیسەی مریەم عەزرا****
ئاه خودایە
بۆچی نابێت ئەم ماشێنی ژیانە بەگێک دانێ
تێیدا من لە قوتابخانەی بەرانان*****
لە ریزبوونی قوتابخانەکەماندا
دەستەسڕەکەمم بیرچووبێت
مامۆستا محێدین******
بە لەسەرخۆیی بڵێ ئەمە دواجارت بێ
دواتر بەبەردەم ماڵی کەژاڵ ئەحمەددا*******
بگەڕێمەوە بۆ ماڵەوە و
بەرد بگرمە تووی ماڵە دراوسێیەک
ئاه خودایە بۆ رێگە نادەیت منداڵ ببمەوە؟
ئێستا ناتوانم
هۆکارەکانت یەک یەک بۆ بژمێرم
تۆ رێگەم بدە
ئەم جارە بگەڕێمەوە منداڵی
لەوێ لە ناو منداڵیی، بە میکانۆکانم
ماڵێک لە پاکیزەیی چێ دەکەم
ناهێڵم شاعیرەکان بێنە ژوورەوە
ئەوان تەنیا لە نێو دەقەکانیاندا جوانن
ناهێڵم نووسەرەکان سەری پێدا بکەن
ئەوان لە کتێبەکانیاندا دەدرەوشێنەوە
لە دەرەوەی تێکست کۆمەڵێ مەیمونن
ناهێڵم سیاسییەکان بێنە ژوورەوە
نەبادا دیوارەکان بۆنی ناخۆشیان بگرن
ناهێڵم قەشەکان پێ بنێنە ناوی
ئەوان لەهەر کوێ بن گڵاوی دەکەن
ناهێڵم بازرگانەکان
لەناو ژووری میوان پاڵ بدەنەوە
ئەوان ژمارەگەلێک دەستی چەپەڵن
رەگی گولی وجودن
تەنها رێ دەدەم
عاشقەکان تێیدا بحەوێنەوە
لەناو هەیوانەکەیدا ژوان ببەستن
لە باخچەکەیدا
چاو لە مەعشوقەکانیان نەتروکێنن
چی دەبوو خوا بیکردایە
منداڵ ببمەوە؟
3-8-2014
رۆژی لە دایکبوونم و لە چاوەڕوانی نەشتەرگەرییدا
ئەڵمانیا- دوسڵدورف
پەڕاوێز:
*ئاماژەیە بۆ یەکێک لە گۆرانییە بەناوبانگەکانی هونەرمەندی شەهید “قادر کابان”.
**ئاماژەیە بۆ مامۆستا “ولیەم یوحەننا” هونەرمەندی ناوداری بواری موزیک، لە چالاکی قوتابخانەکان موزیکی فێر دەکردین. هونەرمەندی ناوبراو لەساڵی 1934 لە سلێمانی لەدایکبووە و ساڵی 2005 کۆچی دوایی کرد.
***مامۆستا فرانسیس داود، یەکێکی ترە لە مامۆستاکانی هونەری موزیک، یەکێکیشە لە هونەرمەندە ناسراوەکانی موزیکی کوردیی. هیوای تەمەن درێژیی بۆ دەخوازم و فەزڵی زۆری هەیە لەسەرم.
****کەنیسەی مریەم عەزرا کۆنترین کەنیسەی شاری سلێمانییە و دەکەوێتە گەڕەکی سابونکەران. کەنیسەکە ساڵی 1862 دروستکراوە بەهاوکاریی “ئیلیا”ی بازرگان.
***** قوتابخانەی بەرانانی سەرەتایی تێکەڵاو دەکەوێتە گەڕەکی شێخ محێدین- شاری سلێمانی.
****** مامۆستا محێدین بەڕێوەبەری قوتابخانەی بەرانان و دراوسێی ماڵمان بوو لە گەڕەکی سەهۆڵەکە.
*ئاماژەیە بۆ خانمە شاعیر “کەژاڵ ئەحمەد” کە هەموو رۆژێک بەبەردەم ماڵی ئەواندا دەڕۆیشتم بۆ قوتابخانە و لەو کۆڵانەشدا ماڵێک هەبوون دارتوویەکی گەورەیان هەبوو هەمیشە تاکە نەعل یان بەردمان دەگرتە دارەکە تاکو تووەکان بوەرێنە خوارەوە و بە تۆز و خۆڵەوە دەمانخواردن.
