بابەتێک لەسەر سەرپۆش فڕەدان و دژکردەوەی کۆماری ئیسلامی.. خەلیلی غەزەڵی
«سەرپۆش»(حێجاب) تەنافێک لە ملی کۆماری ئیسلامی
پاش زیاتر لە چوار دەیە حکمڕانیی ئیسلامی سیاسی لە ئێران و هەوڵدان بۆ سەپاندنی دەسەڵاتێکی رەشی دواکەوتوو لە شکڵی «شوان و مێگەل» دا، ئیمڕۆ لە راوەستانێکدا دەبینی کە کوشتنی جەنایەتکارانەی کچە کوردێک(ژینا) بەیەکجاری هەموو رێسە ئیدئۆلۆژیکیەکانی حکومەتی کردەوە بەخوری و شۆڕشێکی سیاسی ـ کۆمەڵایەتیی بەناوی «ژن ژیان ئازادی» هاتە ئاراوە کە لەماوەیەکی زۆر کورت دا کۆمەڵگەی ئەم دیو بۆ ئەو دیو کردوە.
هەر لە کاتی ناشتنی تەرمی ژیناوە، سنەی پێشەنگ هاتە سەر شەقام و کور و کچ پێکەوە بە دروشمی ژن ژیان ئازادی شۆڕشێکی نوێی مەدەنی و سەردەمیانەیان دژی دەسەڵاتی رەشی حکومەتی دینی بانگەواز کرد.هاوکات لە گۆڕستانی ئایچی(سەقز)یش کچان و کوڕان بەهەمان شێوە هاتنە سەر شەقام و لە ماوەیەکی فرە کوردتدا، بڵێسەی گڕ و قین و مافخوازی کچان و کوڕانی کورد وەک گڕکانێکی پەنگ خواردوو تەقیەوە و سەرانسەری کوردستان و لەوەش فراوانتر ، ئێرانی گرتەوە . کە پاش ماوەیەک سنوورەکانی ئێرانیشی تێپەڕاند و دونیا پێشوازیی لە حەرەکەتی ژن ژیان ئازادی کرد ، کە ژن بە پشتیوانیی کەم وێنەی کوڕان و پیاوان، پێشەنگایەتی دەکرد و حکومەتی جەهل و جەنایەتی لە کونجی کۆنەپەرستانەی خۆی پەساوتبوو و بە تەوژمی هێندە بەرەو پێش هەنگاوی نا کە بوە راپەڕینێکی گشتی و لە پڕۆسەی خۆیدا وەک «شۆڕشی ژن ژیان ئازادی» پێناسە کرا. شۆڕشێک کە تەنانەت سەرنجی کۆمەڵگەی جیهانی و زۆررێک کۆڕ و ناوەندی لە سەرتاسەری جیهان بۆلای خۆی راکێشا.
ئەم شۆڕشە گەرچی بە زۆر هۆ ی وەک ئاسۆیی بوون ( کە ئەزموونێکی نوێ لە حەرەکەت دژی کۆماری ئیسلامی بوو) و نەبوونی رێبەریەکی تۆکمە، قەتیس مان لە خۆپیشاندانی شەقام و پەل نەکوتان بۆ بواری دیکەی ئیعتراز وەک مانگرتن، بەستنی دەمارەکانی ئابووری و… پاش شەش مانگ حکومەت توانی بە سەرکوتی خوێناوی و بە رەچاوکردنی سیاسەتی گرتن، ئەشکەنجە ، دەسدرێژیی و کوشتاری بێڕحمانە خۆی کۆ بکاتەوە و شکڵی ئیعترازی خیابانی مەهار بکات، بەڵام بەهێچ شێوەیەک بە سەر ئەسڵی حەرەکەتەکەدا زاڵ نەبوو. ئەوەبوو شێوەیەکی دیکە لە ئیعیتاز بە شێوەی «نافەرمانی مەدەنی» دەستیێکرد. گەرچی هەر لە سەرەتاکاندا حکوومەت «رەوایەتی» (مەشرووعیەت)ی لە ئاستی ناوخۆ و دەرەوە چوە ژێر پرسیارەوە و بێ ئیعتبار ببوو، بەڵام درێژەی حەرەکەتی نافەرمانی مەدەنیی و دژایەتی کردنی بە فڕەدانی سەرپۆش، ئەوەندەی دیکە ئیعتبار و مەشرووعەتیان لە دەسەڵاتی ئیسلامی سڕیەەە.
حەرەکەتی نافەرمانی مەدەنیی بەتایبەت لە بواری سەرپۆش(حێجاب) فرەدان و گشتگیر بوونی ئەم دیاردەیە کە هەر لە سەرەتاوە ببوە گرفتێکی گەورەی حکوومەت، ئەمجار وەک رێبازێکی کەم هەزینەتر لە ئیعترازی خیابانی، بەربینگی بە دەسەڵات گرت و هێندەپەرەی ئەستاند کە حکومەت و هێزی سەرکوتی لەبەرابەریدا ئیفلیج بوون. گەرچی حکومەت بێکار دانەنیشت و لەو ماوەدا درێژەی بە گرتن و جەریمەکردن و لێدان و بەردانی «سەگەکانی خۆی»(بەسیج و لیباس شەخسی و لات و لومپەنی سازماندراو)بۆسەر گیانی خەڵک بەتایبەت لاوان، درێژەی داوە. بەڵام ئیستا کە دەبینێ هیچکام لەو زەبر و زەنگ و سیاسەتی سەرکوتە کاریگەر نەبوە و تا دێت شەپۆلی نافەرمانی بەرفراوانتر دەبێ و شیرازەی دەسەڵاتەکەی و نوێنگەی ئیدئۆلۆژیەکەی( دژایەتی ژن لە شکڵی حیجابی ئیجباری دا)وەمترسیی جیدی کەوتوە، لەم رۆژانەدا کەوتوەتە لەشکەرکەشیی یەکلاکەرەوە. ئەوەیە کە هەموو سەرکردەکانی بە کەف چەراندن کەوتوونەتە بێحورمەتی بە ژن و هەرشە و گوڕەشە و بەتەواوی هێز وتوانەوە هاتوونەتە مەیدان بۆ بەرگری کردن لە «بێ حێجابی» و سەرکوتی یەکجاریی شۆڕشی ژن ژیان ئازادی.تا ئەو رادەیە کە ئیمڕۆ ئێران بوەبە مەیدانی ریزبەستی شەڕ. واتا شەڕی دەسەڵات دژی کۆمەڵگە کە نوێنگەکەی(حێجاب)ی لە زبڵدان خستوە.
وەک دەزانین دژایەتی کردنی ژن و مافەکانی بوەبە ئیدئۆلۆژیی حکوومەتی ئێران ، هەر ئەوەشە کە ئەم شەپۆلە لە نافەرمانی( فرە دانی سەرپۆش) بە مەترسیی لەسەر دەسەڵاتەکەی دەبینێ. بۆیە بەتەواوی هێزەوە وبۆ یەکلایی کردن و سەرکوتی یەکجاریی «ژن ژیان ئازادی» هاتوەتە مەیدان. کە لە چەند رۆژی رابردوودا مەودای سەرکوت و هەڕەشەی گەیاندوەتە ئەوپەڕی خۆی. کە ئێمە لە داخستن و پلومپ کردنی دوکان و بازار و پاساژەکان و گرتن یا جەریمەکردنی ژنان و رەشبگیریی لە شەقامەکان دەیبینین. ئەوەی روونە ، بێگومان حکوومەت ناتوانێ لەم قۆناخە هەستیارەی سەرهەڵدانی ژن ژیان ئازادی خۆی دەرباز بکات. گەرچی بەتەواوی هێز و توانەوە بۆ سەرکوت هاتوەتە مەیدان و رەنگە بتوانێ بۆ ماوەیەکی کورت بە رژاندنی هەزاران و سەدان هەزار هێزی سەرکوتگەر شەقامەکان داگیربکات، بەڵام بە دڵنیایەوە کاتی دەبێ و هێزی بزوێنەری «ژن ژیان ئازادی » دیسان وەک گڕکان بڵێسە دەستێنێتەوە و تەوار و هەڵۆەکان شەقام داگیر دەکەنەوە و ئەم پڕۆسەیە تا گۆڕ کردنی ئیسلامی سیاسی درێژەی دەبێ.
ژن ژیان ئازادی
